₁Babylona eanuid gáttiin

mii čohkkáimet ja čieruimet,

go muittašeimmet Siona.

₂Gátti sieđggaide

mii heaŋggasteimmet lyraideamet.

₃Dat geat dolle min fáŋgan,

gohččo min lávlut,

dat geat ledje dolvon min dohko,

gáibidedje mis illulávlagiid:

“Lávlot midjiide Siona lávlagiid!”

₄Mo mii sáhtášeimmet

lávlut Hearrá lávlagiid

vieris eatnamis?

₅Jerusalem, jos mun vajáldahtán du,

de jávkos mu olgeš gieđa vuoibmi!

₆Darvánehkos mu njuovčča guopmái,

jos mun in muitte du,

jos in ane stuorimus illunan

du, Jerusalem!

₇Hearrá, muitte Jerusalema

lihkuhisvuođa beaivvi,

muitte mo edomlaččat čurvo:

“Gaikkodehket, gaikkodehket dan

eatnama ráje!”

₈Ja don, Babylon,

hevvui dubmejuvvon nisson!

Lihkolaš dat gii mávssaha dutnje

dan maid dahket midjiide!

₉Lihkolaš dat gii váldá

du uhca mánážiid

ja cuvke daid bávtti njeaiga!