Roma 9

₁Mun sártnun duođa Kristusis, mun in gielis. Mu oamedovdu duođašta dan Bassi Vuoiŋŋas, ₂dasgo mu váimmus lea stuorra moraš ja nohkameahttun bávččas. ₃Mun sávašin ahte mun ieš livččen garuhuvvon ja earuhuvvon Kristusis, jos dat fal livččii ávkin mu vieljaide, iežan álbmoga olbmuide. ₄Sii leat israellaččat, ja sidjiide gullá mánáid vuoigatvuohta, hearvásvuohta, lihtut, láhka, ipmilbálvalus ja lohpádusat. ₅sidjiide gullet áhčit, geain Kristus bođii olmmožin, son guhte lea Ipmil buot badjel, máidnojuvvon agálašvuhtii. Amen.

₆Ii dattetge nu ahte Ipmila sátni livččii meaddán, dasgo eai buot israellaččat duođaid gula Israelii, ₇eaige Abrahama nális buohkat leat Abrahama mánát. Lea čállojuvvon: Dušše Isaka mánát gohčoduvvojit du nállin. ₈Dat mearkkaša ahte eai su lunddolaš mánát leat Ipmila mánát. Muhto dat mánát geat riegádit Ipmila lohpádusa mielde, adnojuvvojit su nállin. ₉Dasgo dát lei lohpádus: Boahtte jagi dán muttus mun máhcan, ja dalle Saras lea bárdni. ₁₀Iige duššefal dat. Maiddái Rebekka bártniguoktás lei okta áhčči, min áhčči Isak. _11-12Juo ovdal go soai riegádeigga, ovdal go soai leigga dahkan maidege buriid dahje baháid, de Ipmil celkkii Rebekkai: Boarráset šaddá bálvalit nuorabu. Nu galggai Ipmila áigumuš ja válljejupmi bissut nanusin, ii olbmuid daguid dihte, muhto su dihte guhte rávká. ₁₃Lea maiddái čállojuvvon: Jakoba mun ráhkistin, muhto Esau mun vašuhin.

₁₄Maid mii dása dadjat? Leago Ipmil vuoigatmeahttun? Ii eisege! ₁₅Son cealká Mosesii: Mun árpmihan su gean árpmihan ja lean váibmoláđis sutnje geasa lean váibmoláđis. ₁₆Ii leat nappo dehálaš dat maid olmmoš dáhttu dahje viggá, muhto dat ahte Ipmil árpmiha. ₁₇Dasgo čála cealká faraoi: Danne mun lean čuoččáldahttán du vai čájehivččen iežan fámu, ja mu namma sárdniduvvošii miehtá máilmmi. ₁₈Ipmil nappo árpmiha gean dáhttu ja buoššuda gean dáhttu.

₁₉Muhtin dis sáhttá jearrat: “Manne Ipmil dalle láitá olbmuid? Iihan oktage sáhte vuostálastit su dáhtu.” ₂₀Gii don leat, olmmošriehpu, gii nágget Ipmiliin? Sáhttágo dat mii lea ráhkaduvvon, dadjat ráhkadeaddjái: “Manne don dahket mu dákkárin?” ₂₁Iigo láirálihttedahkki sáhte hábmet láirrá nugo ieš dáhttu, nu ahte son seammá láirrás ráhkada guokte lihti, nuppi divrras ja nuppi hálbbes lihti? ₂₂Nu maiddái Ipmil lea dahkan, vai beassá čájehit iežas moari ja fámu. Stuorra gierdavašvuođastis son gal sesttii vel daid moari lihtiidge mat ledje ráhkaduvvon duššadeami várás. ₂₃Son divttii iežas nohkameahttun hearvásvuođa boahtit oidnosii dain lihtiin maidda son čájeha váibmoláđisvuođa ja maid son lea gárvvistan hearvásvuhtii. ₂₄Dákkár lihttin son lea rávkan maiddái min, leažžat dal juvddálaččat dahje báhkinat. ₂₅Hosea girjjis son cealká: Dán álbmoga mii ii lean mu, gohčodan iežan álbmogin, ja su gean in ráhkis, gohčodan iežan ráhkisin. ₂₆Ja dan báikkis gos sidjiide celkojuvvui: Dii ehpet leat mu álbmot, sii vel gohčoduvvojit ealli Ipmila mánnán. ₂₇Jesaja čuorvu Israela birra: Vaikko Israela mánát livčče eatnagat dego meara sáttočalmmit, de dušše bázahas sis bestojuvvo. ₂₈Hoahpus Hearrá ollašuhttá sánis eatnama alde. ₂₉ Jesaja lea maid cealkán: Jos Hearrá, Almmiveagaid Ipmil, ii livčče guođđán midjiide náli, de midjiide livččii geavvan nugo Sodomai, mii livččiimet šaddan Gomorra láhkásažžan.

₃₀Maid mii dása dadjat? Dan ahte báhkinat mat eai bivdán vanhurskkisvuođa, leat ožžon dan, dan vanhurskkisvuođa mii boahtá oskku bokte. ₃₁Muhto Israel mii háhpohalai lága vanhurskkisvuođa, ii juksan dan. ₃₂Manne ii? Danne go israellaččat eai luohttán oskui, muhto daguide. Sii leat jorralan dan geađgái ₃₃man birra lea čállojuvvon: Geahča, mun bijan Sionii norddastusgeađggi ja jorralusa bávtti. Muhto dat gii sutnje osku, ii šatta heahpadii.