Roma 8

₁De ii leat šat mihkkege dubmehusaid sidjiide geat leat Kristus Jesusis. ₂Vuoiŋŋa láhka mii addá eallima Kristus Jesusis, lea čoavdán du suttu ja jápmima lágas. ₃Ipmil dagai dan mii lei veadjemeahttun láhkii, danne go dat lei fámuheapme oačči geažil. Son vuolggahii Bártnis suttolaš olbmo hámis soabahit suttuid ja dubmii suttu mii lea oaččis, ₄vai lága gáibádus ollašuvvá min siste geat eat eale oačči mielde, muhto Vuoiŋŋa mielde. ₅Sis geat ellet oačči mielde, lea oačči miellaláhki, ja sis geat ellet Vuoiŋŋa mielde, lea Vuoiŋŋa miellaláhki. ₆Oačči hállu lea jápmin, muhto Vuoiŋŋa hállu lea eallin ja ráfi. ₇Dan dihte oačči hállu lea vašálašvuohta Ipmilii, dasgo dat ii leat Ipmila láhkii vuolibuš, iige oppa sáhtege leat. ₈Dat geat ellet oačči mielde, eai dohkke Ipmilii.

₉Dii ehpet eale oačči mielde, muhto Vuoiŋŋa mielde, jos fal Ipmila Vuoigŋa ássá din siste. Dat geas ii leat Kristusa Vuoigŋa, ii gula Kristusii. ₁₀Muhto jos Kristus lea din siste, de rumaš lea gal jápmán suttu dihte, muhto Vuoigŋa addá eallima danin go dii lehpet dahkkojuvvon vanhurskkisin. ₁₁Jos su Vuoigŋa guhte bajásčuoččáldahtii Jesusa jábmiid luhtte, ássá din siste, de son guhte bajásčuoččáldahtii Kristusa jábmiid luhtte, maiddái dahká eallin din jámolaš rupmaša Vuoiŋŋas bokte mii ássá din siste.

₁₂Vieljažiiddán, mii eat leat oažžái velggolaččat, nu ahte galggašeimmet eallit oačči mielde. ₁₃Dasgo jos dii eallibehtet oačči mielde, de dii jápmibehtet. Muhto jos dii Vuoiŋŋa bokte jámihehpet rupmaša daguid, de oažžubehtet eallit. ₁₄Buohkat geaid Ipmila Vuoigŋa láide, leat Ipmila mánát. ₁₅Dii ehpet leat ožžon šlávvavuođa vuoiŋŋa nu ahte šattašeiddet fas eallit balus, muhto dii lehpet ožžon Vuoiŋŋa guhte addá midjiide máná vuoigatvuođa, nu ahte mii sáhttit čuorvut: “Abba! Áhčči!” ₁₆Vuoigŋa ieš duođašta min vuoiŋŋain ahte mii leat Ipmila mánát. ₁₇Muhto jos mii leat mánát, de mii leat maiddái árbbolaččat, Ipmila árbbolaččat ja Kristusa mielárbbolaččat. Jos mii gillát oktan Kristusiin, de mii maiddái oktan suinna leat oasálaččat hearvásvuhtii.

₁₈Mun oaivvildan ahte dálá áiggi gillámušat eai leat mahkkege dan hearvásvuođa ektui mii oktii almmustuvvá ja šaddá min. ₁₉Oppa sivdnádus vuordá áibbašemiin Ipmila mánáid almmustuvvama. ₂₀Buot mii lea sivdniduvvon lea biddjojuvvon nohkavašvuođa vuollái, ii iežas dáhtus, muhto su dáhtus guhte lea vuolidan dan. ₂₁Nu sivdnádus čovdojuvvo nohkavašvuođa šlávvavuođas dan friddjavuhtii maid Ipmila mánát ožžot hearvásvuođas.

₂₂Mii diehtit ahte oppa sivdnádus ovttas šuohkká ja gillá dego riegádahttinávttain. ₂₃Iige duššefal sivdnádus, muhto maiddái mii geat leat ožžon Vuoiŋŋa álgošattu, šuohkkit ja áibbašit dasa ahte šattašeimmet Ipmila mánnán ja son lonistivččii min rupmaša friddjan. ₂₄Mii leat juo bestojuvvon, dat lea min nana doaivu. Muhto doaivu maid olmmoš juo oaidná ollašuvvan, ii leat šat doaivu. Mo sáhttá oktage doaivut dan maid juo oaidná! ₂₅Muhto jos mii doaivut juoidá maid eat oainne, de mii vuordit dan gierdavaččat.

₂₆Maiddái Vuoigŋa veahkeha min min headjuvuođas. Dasgo mii eat dieđe maid galggašeimmet rohkadallat, muhto Vuoigŋa ieš rohkadallá min ovddas šuohkáhusaiguin sániid haga. ₂₇Ja son guhte suokkarda váimmu, diehtá maid Vuoigŋa hálida, dasgo Vuoigŋa rohkadallá bassi olbmuid ovddas Ipmila dáhtu mielde. ₂₈Mii diehtit ahte buot šaddá sidjiide buorrin geat ráhkistit Ipmila, sidjiide geaid son lea rávkan áigumušas mielde. ₂₉Dasgo sin geaid son juo ovdal lea dovdan, son lea maid ovddalgihtii mearridan hábmet Bártnis gova mielde, vai su Bárdni livččii vuosttašriegádeaddji eatnat vieljaid gaskkas. ₃₀Sin geaid son ovdal lea válljen, son lea maid rávkan, ja daid geaid son lea rávkan, son lea maid dahkan vanhurskkisin; sidjiide geaid son lea dahkan vanhurskkisin, son lea maid addán iežas hearvásvuođa.

₃₁Maid mii dása dadjat? Jos Ipmil lea min beale, gii dalle sáhttá leat min vuostá? ₃₂Son guhte ii seastán iežas Bártni, muhto attii su min buohkaid ovddas, iigo son dalle attáše midjiide buot earáge oktan suinna? ₃₃Gii sáhttá váidalit sin geaid Ipmil lea válljen? Ipmil lea dat guhte dahká vanhurskkisin. ₃₄Gii sáhttá dubmet? Kristus Jesus lea dat guhte jámii ja velá bajásčuoččáldahttojuvvui, ja čohkká Ipmila olgeš gieđa bealde ja rohkadallá min ovddas. ₃₅Gii sáhttá earuhit min Kristusa ráhkisvuođas? Sáhttágo áŧestus, ballu, doarrádallojupmi, nealgi, álásvuohta, heahti dahje miehkki? ₃₆Nugo lea čállojuvvon: Du dihte mii goddojuvvot geažos beaivvi, mii adnojuvvot njuovvansávzan. ₃₇Muhto buot dáid badjel mii oažžut vuoittu su bokte guhte ráhkistii min. ₃₈Dasgo mun lean vissis ahte ii jápmin iige eallin, eai eŋgelat eaige oaivámuččat, eai dálážat eaige boahttevaččat, eaige mahkkege fámuid, ₃₉ii mihkkege allagasas iige mihkkege čiekŋalasas iige mihkkege eará sivdnádusaid sáhte earuhit min Ipmila ráhkisvuođas Kristus Jesusis, min Hearrás.