Roma 7

₁Vai ehpetgo dii dieđe, vieljažiiddán – mun sártnun sidjiide geat dovdet lága – ahte láhka ráđđe olbmo nu guhká go son eallá? ₂Láhka čatná náitalan nissona boadnjásis nu guhká go boadnjá eallá. Muhto jos boadnjá jápmá, de nisson lea čovdojuvvon dan lágas mii čanai su boadnjái. ₃Jos nisson manná eará olbmá lusa nu guhká su boadnjá lea eallimin, de nisson rihkku náittosdili. Muhto jos boadnjá jápmá, de son lea luovus lágas iige rihko náittosdili jos náitala eará olbmáin. ₄ Nu lehpet maiddái dii, vieljaidan, jápmán Kristusa rupmaša bokte lágas eret vai gulašeiddet earái, sutnje guhte bajásčuoččáldahttojuvvui jábmiid luhtte, vai mii šaddadivččiimet šattuid Ipmilii.

₅Dalle go oažži ráđđii min, de láhka bovttii suttolaš anistumiid min lahtuin, nu ahte mii šaddadeimmet šattuid jápmimii. ₆Muhto dál mii leat čovdojuvvon lágas ja jápmán eret das mii čanai min. Dál mii bálvalit Ipmila ođđa vuogi mielde, Vuoiŋŋas, eat šat boares vuogi mielde, bustáva mielde.

₇Maid mii dása dadjat? Leago láhka suddu? Ii eisege. Muhto lága haga mun in livčče dovdan suttu. Mun in livčče diehtán mii anistupmi lea, jos láhka ii livčče cealkán: Don it oaččo anistuvvat. ₈Suddu geavahii báhkkoma ja bovttii mus buotlágan anistumiid, dasgo lága haga suddu lea jápmán. ₉Ovdal mun ellen lága haga, muhto go báhkkon bođii, de suddu eallái ₁₀ja mun jápmen. Nu geavai ahte báhkkon mii galggai addit eallima, doalvvui mu jápmimii. ₁₁Dasgo suddu geavahii báhkkoma ja behtii ja gottii mu dainna. ₁₂De láhka lea nappo bassi, ja báhkkon lea bassi, vuoigat ja buorre.

₁₃Leago dalle dat mii lea buorre, šaddan munnje jápmimin? Ii eisege, dat lei suddu mii dagai dan. Suddu šattai munnje jápmimin dan bokte mii lea buorre vai dat almmustuvašii suddun. Nu suddu lága báhkkoma bokte čájehivččii suttu issorasvuođa.

₁₄Mii diehtit ahte láhka lea vuoiŋŋalaš, muhto mun lean oaččálaš, vuvdojuvvon suttu šlávvan. ₁₅Dasgo mun in dieđe maid dagan: Mun in daga dan maid dáhtun, muhto baicca dan maid vašuhan dahkat. ₁₆Muhto jos mun dagan dan maid in dáhto, de mun mieđihan ahte láhka lea buorre. ₁₇De in leat šat mun ieš gii dan dagan, muhto suddu mii ássá mu siste. ₁₈Mun gal dieđán ahte mus, mu oaččis, ii ása mihkkege buriid. Mus lea gal dáhttu dahkat buori, muhto mun in veaje. ₁₉Dan buori maid dáhtun, dan mun in daga, muhto dan bahá maid mun in dáhto, dan mun dagan. ₂₀Muhto jos mun dagan dan maid in dáhto, de dan in daga šat mun ieš, muhto suddu mii ássá mu siste.

₂₁Dalle mun fuomášan dán lága: Mun dáhtun dahkat buori, muhto in máhte dahkat iežá go baháid. ₂₂Mu siskkáldas olmmoš gal iluin dohkkeha Ipmila lága, ₂₃muhto das maid mun dagan, mun oainnán nuppi lága mii soahtá mu miela lága vuostá ja doallá mu dan suttu lága fáŋgan mii lea mu lahtuin. ₂₄Mun vártnuhis olmmoš! Gii beastá mu dán jápmima rupmašis? ₂₅Ipmilii lehkos giitu Jesus Kristusa, Hearrámet, bokte! De mun nappo bálvalan Ipmila lága jirpmiin, muhto suttu lága oččiin.