Roma 6

₁Maid mii dadjat dása? Galgatgo mii ain suddudit, vai árbmu šattašii ain stuoribun? ₂Eat eisege. Go mii leat jápmán suttus eret, de mo mii dalle sáhtášeimmet šat eallit suttus? ₃Ehpetgo dii dieđe ahte mii buohkat geat leat gásttašuvvon Kristus Jesusii, leat gásttašuvvon su jápmimii? ₄Mii leat gásttas hávdáduvvon suinna jápmimii. Nugo Kristus bajásčuožžilii jábmiid luhtte Áhčis hearvásvuođa bokte, nu galgat miige vádjolit ođđa eallimis. ₅Dasgo jos mii leat ovttastahttojuvvon suinna go jápmit nugo son, de mii maiddái ovttastahttojuvvot suinna go bajásčuožžilit jábmiid luhtte nugo son. ₆Mii diehtit ahte min boares olmmoš lea russiinávlejuvvon suinna, vai dát suttolaš rumaš dahkkojuvvo duššin, amamet mii leat šat suttu šlávat. ₇Dasgo dat gii lea jápmán, lea beassan suttu válddis. ₈Muhto jos mii leat jápmán Kristusiin, de mii oskut ahte mii maiddái galgat eallit ovttas suinna. ₉Mii diehtit ahte go Kristus lea bajásčuožžilan jábmiid luhtte, de son ii šat jáme, iige jápmin šat ráđđe su. ₁₀Go Kristus jámii, de son jámii ovtta gearddi eret suttus. Go son dál eallá, de son eallá Ipmilii. ₁₁Jurddašehket seammá láhkái iežadet birra: Dii lehpet jápmán suttus eret ja eallibehtet Ipmilii Kristus Jesusis.

₁₂Allet nappo divtte suttu ráđđet iežadet jámolaš rupmaša, nu ahte čuovvubehtet dan anistumiid. ₁₃Allet atte lahtuideattet suttu háldui vearrivuođa gaskaoapmin. Go dii dál lehpet jorgalan jápmimis eallimii, de addet iežadet Ipmilii ja lahtuideattet sutnje vanhurskkisvuođa gaskaoapmin. ₁₄Suddu ii oaččo šat ráđđet din, dasgo dii ehpet leat lága vuolde muhto árpmu vuolde.

₁₅Mo lea? Oažžutgo mii suddudit, danne go mii eat leat lága vuolde, muhto árpmu vuolde? Eat eisege! ₁₆Ehpetgo dieđe ahte jos dii dahkabehtet iežadet muhtuma šlávvan ja jeagadehpet su, de dii lehpet dan šlávat gean dii jeagadehpet, jogo suttu vuolde, mii doalvu jápmimii, dahje dan gulolašvuođa vuolde mii doalvu vanhurskkisvuhtii? ₁₇Muhto Ipmilii lehkos giitu! Dii leiddet suttu šlávat, muhto dál dii lehpet váimmusteattet gulolaččat dan ohppii mii didjiide lea oahpahuvvon. ₁₈Dii lehpet čovdojuvvon suttus ja bálvalehpet vanhurskkisvuođa. ₁₉Mun sártnun olbmuid láhkai din oačči headjuvuođa dihte. Nugo dii ovdal attiidet lahtuideattet buhtismeahttunvuođa ja lágahisvuođa šlávvan ja šattaidet lágaheapmin, nu addet dál lahtuideattet vanhurskkisvuođa šlávvan vai dii šaddabehtet bassin. ₂₀Dalle go dii leiddet suttu šlávat, de dii ehpet sáhttán bálvalit vanhurskkisvuođa. ₂₁Makkár šattuid dii dalle rájaidet? Šattuid main dii dál heahpanaddabehtet, dasgo dat dolvot jápmimii. ₂₂Muhto dál go dii lehpet čovdojuvvon suttus ja šaddan Ipmila šlávvan, de din šaddu lea bassindahkkojupmi ja loahpas agálaš eallin. ₂₃Suttu bálká lea jápmin, muhto Ipmila attáldat lea agálaš eallin Kristus Jesusis, min Hearrás.