Roma 5

₁Go mii dál leat dahkkojuvvon vanhurskkisin go oskut, de mis lea ráfi Ipmiliin Hearrámet Jesus Kristusa bokte. ₂Kristus lea diktán min beassat dán árbmui mas mii dál leat. Mii leat ilus go mis lea dat doaivu ahte mii beassat Ipmila hearvásvuhtii. ₃Mii leat ilus velá áŧestusainge, danin go mii diehtit ahte áŧestusat duddjojit gierdavašvuođa, ₄gierdavašvuohta duddjo geahččaluvvon miela, ja geahččaluvvon miella addá doaivvu. ₅Ja doaivu ii beahte min, dasgo Ipmil lea golggahan iežas ráhkisvuođa min váibmui dalle go son attii midjiide Bassi Vuoiŋŋa.

₆Dalle go mii ain leimmet rašit, de Kristus jámii mearriduvvon áiggi ipmilmeahttun olbmuid ovddas. ₇Illá oktage dáhttu jápmit oppa vanhurskkis olbmo ovddasge. Buori olbmo ovddas gal muhtun veajášii jápmit. ₈Muhto Ipmil čájeha midjiide iežas ráhkisvuođa das ahte Kristus jámii min ovddas go mii ain leimmet suttolaččat. ₉Go su varra dál lea dahkan min vanhurskkisin, de dađe vissáseappot son beastá min boahttevaš moaris. ₁₀Dasgo jos mii leimmet Ipmila vašálaččat ja soabahuvvuimet Ipmiliin su bártni jápmima bokte, de dađe vissáseappot Ipmila bártni eallin beastá min dál go mii leat soabahuvvon. ₁₁Ja ii duššefal dat. Min rápmi lea Ipmilis, Hearrámet Jesus Kristusa dihte, gean bokte mii leat ožžon soabahusa.

₁₂Suddu bođii máilbmái ovtta olbmo bokte, ja suttu bokte jápmin. Ja nu lea jápmin joksan buot olbmuid, dasgo buohkat suddudedje. ₁₃Suddu gal lei máilmmis juo ovdal go láhka addojuvvui, muhto suddu ii logahallojuvvo doppe gos ii leat láhka. ₁₄Almmatge jápmin ráđđii Adama rájes Mosesa rádjai singe geat eai lean rihkkon lága nugo Adam. Adam lei ovdagovva sus gii bođii maŋŋil.

₁₅Muhto rihkkuma ii sáhte veardidit árpmuin. Jos buohkat leat jápmán ovtta olbmo rihkkuma geažil, de buohkat leat dál ožžon Ipmila valljugas árpmu, dan árpmuattáldaga mii lei okta áidna olmmoš, Jesus Kristus. ₁₆Dán attáldaga ii sáhte veardidit dainna mii bođii ovtta olbmo suttus. Dasgo duopmu bođii ovtta olbmo suttus ja šattai dubmehussan, muhto árbmu buvttii friddjavuođa duomu buohkaide guđet ledje jorralan. ₁₇Jos jápmin ráđđegođii ovtta olbmo jorralusa geažil, de sii geat ožžot vanhurskkisvuođa valljugas árpmu ja attáldaga besset dađe vissáseappot ráđđet ja eallit dan ovtta olbmo, Jesus Kristusa, bokte.

₁₈Nugo nappo ovtta olbmo rihkkun lea šaddan dubmehussan buot olbmuide, nu maiddái ovtta olbmo vanhurskkis dahku šaddá vanhurskkisvuohtan ja eallimin buohkaide. ₁₉Nugo ovtta olbmo jeagohisvuohta dagai buohkaid suttolažžan, nu ovtta olbmo gulolašvuohta dahká buohkaid vanhurskkisin. ₂₀Láhka bođii máilbmái vai rihkkun šattašii stuoribun. Muhto gos suddu lea šaddan stuorisin, das árbmu lea šaddan velá stuoribun. ₂₁Ja nugo suddu lea ráđđen ja dolvon jápmimii, nu maiddái árbmu ráđđe vanhurskkisvuođa bokte ja doalvu agálaš eallimii Hearrámet Jesus Kristusa bokte.