Roma 10

₁Vieljat, mun sávan olles váimmus ja rohkadalan Ipmila ahte sii bestojuvvošedje. ₂Mun sáhtán duođaštit ahte sii áŋgiruššet Ipmila beale, muhto sis váilu áddejupmi. ₃Sii eai dovdda Ipmila vanhurskkisvuođa, ja go sii vigget ráhkadit iežaset vanhurskkisvuođa, de sii eai vuollán Ipmila vanhurskkisvuhtii. ₄ Kristus lea lága loahppa, nu ahte juohkehaš gii osku šaddá vanhurskkisin.

₅Moses čállá dan vanhurskkisvuođa birra maid láhka addá: Dat gii dahká daguid maid láhka gáibida, oažžu dain eallima. ₆Muhto oskku vanhurskkisvuohta cealká ná: Ale jurddaš váimmustat: Gii sáhttá mannat bajás albmái? – namalassii viežžat Kristusa vuolás – ₇dahje: Gii njiedjá čiekŋalassii? – namalassii viežžat Kristusa jábmiid luhtte. ₈Muhto maid dat cealká? Sátni lea du lahka, du njálmmis ja du váimmus. Dat lea dat oskku sátni maid mii sárdnidit. ₉Jos don dovddastat njálmmiin ahte Jesus lea Hearrá ja oskkut váimmus ahte Ipmil lea bajásčuoččáldahttán su jábmiid luhtte, de don bestojuvvot. ₁₀Váimmu oskkuin olmmoš šaddá vanhurskkisin ja njálmmi dovddastusain son bestojuvvo. ₁₁Čála cealká: Ii oktage gii osku sutnje, šatta heahpadii. ₁₂Dasgo ii leat erohus juvddálačča ja greikalačča gaskkas. Buohkain lea seammá Hearrá, ja son addá valjistis buohkaide geat čurvot su. ₁₃Dasgo juohkehaš gii čuorvu Hearrá nama, bestojuvvo.

₁₄Muhto mo sii sáhttet čuorvut su geasa eai oskko? Mo sii sáhttet oskut sutnje gean birra eai leat gullan? Mo sii sáhttet gullat, jos ii oktage sárdnit? ₁₅Mo oktage sáhttá sárdnidit, jos son ii leat vuolggahuvvon? Nugo lea čállojuvvon: Man čábbát leat daid lávkkit geat buktet buriid ságaid. ₁₆Muhto eai buohkat leat leamaš gulolaččat evangeliumii. dasgo Jesaja cealká: Hearrá, gii oskkui min sárdnái? ₁₇Osku boahtá gullamis ja gullan boahtá Kristusa sánis. ₁₈Mun jearan: Eaigo sii leat gullan? De leat: Sin jietna lea ollán miehtá máilmmi, sin sánit gitta eatnama ravddaide. ₁₉Mun jearan: Iigo Israel leat ádden dan? Moses juo cealká: Mun dagahan din gáđaštit álbmoga mii ii leat álbmot. Mun moaráhuhtán din jierpmehis álbmoga vuostá. ₂₀Ja Jesaja cealká vel roahkkadeappot: Dat geat eai ohcan mu, gávdne mu. Mun almmustuvven daidda geat eai jearran mu. ₂₁Muhto Israela birra son cealká: Geažos beaivvi mun lean geaigguhan gieđaid jeagohis ja nággáris álbmogii.