Roma 11

₁Mun jearan dalle: Leago Ipmil hilgon iežas álbmoga? Ii eisege! Mun maid lean israellaš, Abrahama nális, Benjamina čearddas. ₂Ipmil ii leat hilgon álbmogis maid ovdal juo lea válljen. Dii diehtibehtet maid čállagat muitalit Elia birra. Son sivahallá Israela Ipmila ovddas: ₃Hearrá, sii leat goddán du profehtaid ja gaikkodan du áltáriid. Mun lean okto vel báhcán, ja dál sii bivdet mu heakkage. ₄Muhto maid Ipmil vástida sutnje? Mun lean diktán báhcit alccesan čiežaduhát olbmá geat eai leat čippostan Baala ovddas. ₅Seamma láhkái lea dáláš áiggige bázahas maid Ipmil árpmustis lea válljen. ₆Muhto jos dat lea árpmus, de ii dat leat buriid daguid dihte. Muđuihan árbmu ii livčče árbmu. ₇ Maid dalle? Dan maid Israel lea ohcan, dan dat ii leat ožžon, muhto sii geat leat válljejuvvon, leat ožžon dan. Earát leat buššon, ₈nugo lea čállojuvvon: Ipmil lea addán sidjiide lossa vuoiŋŋa, čalmmiid mat eai oainne, ja beljiid mat eai gula, gitta dán beaivvi rádjái. ₉Ja David cealká: Šaddos sin beavdi sidjiide giellan ja gillarin, jorralussan ja ráŋggáštussan. ₁₀Sevnnjodehkoset sin čalmmit, amaset oaidnit. Sojat sin čielggi agálaš áigái.

₁₁Mun jearan dalle: Guossaledjego sii danin vai jorralivčče? Eai eisege! Muhto go sii jorraledje, de dat šattai bestojupmin báhkiniidda, ja dat lea boktán juvddálaččaid gáđašvuođa. ₁₂Jos sin jorraleapmi lea šaddan riggodahkan máilbmái ja sin vádjitvuohta riggodahkan báhkiniidda, man ollu eambbo dalle go sin lohku dievvá!

₁₃Muhto didjiide báhkiniidda mun cealkkán: Mun rámidan iežan bálvalusa báhkiniid apostalin, ₁₄danin go ná mun sáhtán boktit iežan álbmoga gáđašvuođa ja beastit muhtumiid sis. ₁₅Jos sin hilgojupmi lea buktán máilbmái soabahusa, de mii dáhpáhuvvá dalle, go Ipmil dohkkeha sin? Dalle jábmit ožžot eallima! ₁₆Jos vuosttaš láibi lea bassi, de oppa dáigi lea bassi, ja jos ruohtas lea bassi, de maiddái oavssit leat basit.

₁₇Jos muhtun oavssit leat doddjojuvvon eret, ja don gii ledjet meahcceoliivamuora oaksi leat laktojuvvon gilvojuvvon oliivamuora ovssiid gaskii ja ožžon oasi dan ruohttasa máihllis, ₁₈de ale rámit iežat eará ovssiid gaskkas! Muhto jos rámádalat, de muitte ahte it don guotte ruohttasa, muhto ruohtas guoddá du. ₁₉Don veaját dadjat: “Dat oavssit doddjojuvvojedje, vai mun laktojuvvošin daid sadjái.” ₂₀Dat lea duohta. Dat doddjojuvvojedje danne go eai oskon, muhto don bisut go oskkut. Ale čeavlástala, muhto bala! ₂₁Jos Ipmil ii seastán lunddolaš ovssiid, de ii son gal seastte duge. ₂₂Don oainnát ahte Ipmil lea sihke láđis ja garas. Son lea garas daidda geat leat jorralan, muhto láđis dutnje jos bisut su buorrevuođas; muđui donge čuhppojuvvot eret. ₂₃Muhto maiddái dat earát laktojuvvojit murrii, jos sii eai biso eahpeoskkus, danin go Ipmilis lea fápmu laktit sin murrii ođđasis. ₂₄Dasgo jos don čuhppojuvvojit eret meahcceoliivamuoras masa lunddolaččat gullet, ja luonddu vuostá laktojuvvojit gilvojuvvon oliivamurrii, man ollu álkibut lunddolaš oavssit sáhttet laktojuvvot iežaset oliivamurrii!

₂₅Vieljat, mun dáhtošin din dovdat dán čiegusvuođa, amadet luohttit iežadet viissisvuhtii: Oassi Israela álbmogis lea buššon, ja nu dat bissot dassážii go báhkiniid lohku lea dievvan. ₂₆Dalle oppa Israel bestojuvvo, nugo lea čállojuvvon: Sionis boahtá Beasti, son jávkada ipmilmeahttunvuođa Jakobis. ₂₇Ja dát lea mu lihttu singuin: Mun válddán eret sin suttuid.

₂₈Evangeliuma dáfus sii leat gal Ipmila vašálaččat, din dihte, muhto válljejumi dáfus Ipmil ráhkista sin, áhčiid dihte. ₂₉Ipmil ii gáđa árpmuattáldagaidis iige rávkojumis. ₃₀Ovdal dii leiddet jeagoheamit Ipmilii, muhto daid earáid jeagohisvuođa geažil Ipmil lea dál árpmihan din. ₃₁Seammá ládje sii dál leat jeagoheamit, vai sii maiddái árpmihuvvojit, go dii lehpet ožžon árpmu. ₃₂Dasgo Ipmil lea bidjan buohkaid jeagohisvuođa fáŋgan, vai son árpmihivččii buohkaid.

₃₃Man čieŋal lea Ipmila riggodat, viisodat ja diehtu! Man suokkardallameahttumat leat su duomut ja man árvitmeahttumat su geainnut! ₃₄Gii dovdá Hearrá jurdagiid, gii sáhttá addit sutnje ráđi? ₃₅Gii lea addán sutnje juoidá maid son galggašii buhtadit? ₃₆Dasgo sus ja su bokte ja sutnje lea buot mii lea. Sutnje lehkos gudni agálašvuhtii! Amen.