Roma 12

₁Vieljat, mun rávven din Ipmila árbmugasvuođa dihte: Buktet rupmašeattet ealli ja bassi oaffarin mii dohkke Ipmilii. Dát lea din vuoiŋŋalaš ipmilbálvalus. ₂Allet heivet iežadet dán máilmmi mielde, muhto nuppástuvvet nu ahte ođasmahttibehtet iežadet miela, vai áddešeiddet mii Ipmila dáhttu lea: dat mii lea buorre, su miela mielde ja ollis.

₃Dan árpmus maid Ipmil lea addán munnje, mun dajan iešguhtiige dis: Allet ane iežadet alibun go lea heivvolaš, muhto lehket jierpmálaččat, iešguhtege dan oskku mihtu mielde maid Ipmil lea addán. ₄Dasgo nugo mis lea okta rumaš ja das leat máŋga lahtu main guđesge lea sierra doaibma, ₅nu maiddái mii buohkat leat okta rumaš Kristusis, muhto sierra mii leat guhtet guimmiideamet lahtut. ₆Mis leat iešguđetlágan árpmuattáldagat, juohkehaččas dan árpmu mielde maid Ipmil lea addán midjiide. Dat geas lea profehtalaš attáldat, geavahehkos dan oskkus mielde. ₇Dat geas lea bálvalus, bálvalehkos, dat gii lea oahpaheaddji, oahpahehkos. ₈Dat gii lea ožžon arvvosmahttima attáldaga, arvvosmahttos. Dat gii addá opmodagastis, addos árvasit; dat gii jođiha, jođihehkos áŋgirvuođain; dat gii čájeha váibmoláđisvuođa, dahkos dan iluin.

₉Lehkos din ráhkisvuohta duohta. Fasttášehket bahá, dollet gitta das mii lea buorre. ₁₀Ráhkistehket guhtet guimmiideattet váimmolaččat dego vieljažat, atnet guhtet guimmiideattet gudnis. ₁₁Lehket áŋgirat, alletge láikkit, bullos dis Vuoiŋŋa dolla, bálvalehket Hearrá. ₁₂Illudehket doaivagis, lehket gierdavaččat áŧestusas, rohkadallet heaittekeahttá. ₁₃Veahkehehket bassi olbmuid oažžut maid sii dárbbašit, lehket árvasat. ₁₄Buressivdnidehket daid geat doarrádallet din, buressivdnidehket, alletge garut. ₁₅Illudehket daiguin geat leat ilus, čirrot daiguin geat čirrot. ₁₆Lehket ovttamielalaččat guhtet guimmiideattetguin. Allet ane iežadet buorebun go earáid, muhto lehket vuollegaččat, alletge viissástala. ₁₇Allet mávssat geasage bahá baháin, muhto váinnuhehket dan mii lea buorre buohkaide. ₁₈ Ellet ráfis buot olbmuiguin dađi mielde go lea vejolaš ja nu guhkás go sáhttibehtet. ₁₉Ráhkkásiiddán, allet ieža mávssat, muhto addet saji Ipmila moarrái. Dasgo lea čállojuvvon: Duopmu gullá munnje, mun mávssahan, cealká Hearrá. ₂₀Ja velá: Jos du vašálaš nealgu, de atte sutnje borrat; jos sus lea goiku, de atte sutnje juhkat. Dalle don čohkket buolli hilaid su oaivvi ala. ₂₁Ale vuoittáhala bahái, muhto vuoitte bahá buriin!