Roma 13

₁Juohkehaš galgá leat vuolibuš eiseválddiide. Dasgo ii leat eiseváldi mii ii boađe Ipmilis, ja Ipmil lea ásahan daid mat leat. ₂Dan dihte dat geat vuostálastet eiseválddiid, vuostálastet Ipmila ásahusa, ja dat geat dan dahket, ožžot ráŋggáštusa. ₃Ráđđejeaddjit eai leat ballun buriide daguide, muhto bahás daguide. Jos it dáhto ballat eiseválddis, de daga buriid, ja dalle don oaččut das rámi. ₄Eiseváldi lea Ipmila bálvaleaddji, dutnje ávkin. Muhto jos dagat baháid, de bala! Ii eiseváldi guotte miehki duššás; dat lea Ipmila bálvaleaddji ja ollašuhttá ráŋggáštusa dasa gii dahká baháid.

₅Danin lea dárbbašlaš leat eiseváldái vuolibuš, ii dušše ráŋggáštusa dihte, muhto maiddái oamedovddu dihte. ₆Dan dihtehan dii máksibehtet vearu, dasgo eiseválddit leat Ipmila bálvaleaddjit buot doaimmaineaset. ₇Addet juohkehažžii dan mii sutnje gullá: Vearu dasa geasa vearru gullá, tuollu dasa geasa tuollu gullá, balu dasa geasa ballu gullá, gudni dasa geasa gudni gullá.

₈Allet leage geasage velggolaččat, earret dan ahte ráhkistehpet guhtet guimmiideattet. Dasgo dat gii ráhkista lagamuččas, lea ollašuhttán lága. ₉Báhkkomat Don it oaččo rihkkut náittosdili, Don it oaččo goddit, Don it oaččo suoládit, Don it oaččo anistuvvat ja buot eará báhkkomat sáhttet čohkkejuvvot dán sátnái: Ráhkis lagamuččat nugo iežat. ₁₀Ráhkisvuohta ii daga lagamužžii maidege baháid. Danne ráhkisvuohta ollašuhttá oppa lága.

₁₁Diihan diehtibehtet mii áiggiid dál lea. Boddu lea juo boahtán lihkkat nahkáriin, dasgo bestojupmi lea dál lagabus go dalle go oskugođiimet. ₁₂Idja lea fargga gollan, beaivi lea lahka. Bidjot dan dihte eret seavdnjadasa daguid ja gárvodehkot čuovgasa ruovdegárvvuid. ₁₃Vádjolehkot láitemeahttumit nugo beaivet galgá vádjolit, allot borešvuođas ja jugešvuođas, váccešvuođas ja nuoskivuođas, riidduin ja gáđašvuođas. ₁₄Gárvodehket Hearrá Jesus Kristusa alletge ane fuola oaččisteattet nu ahte dan himut gohccájit.