Sálmmaid girji 9

₂Hearrá, mun giittán du

oppa váimmustan,

muitalan buot du oavdudaguid.

₃Mun illudan ja ávvudan du siste,

mun máinnun du nama, don Alimus.

₄Mu vašálaččat geassádedje,

sii jorraledje ja dušše

du muođuid ovdii.

₅Duođaid, don leat dubmen

ja addán munnje vuoigatvuođa,

don, vuoigatlaš duopmár,

leat čohkánan truvdnosat.

₆Don ráŋgot álbmogiid

ja duššadit ipmilmeahttumiid,

don sihkkot sin nama

agálaččat ja álelassii.

₇Vašálaš lea cuvkejuvvon

ja duššaduvvon agibeaivái,

sin gávpogiid don leat njeaidán,

iige sis leat báhcán oppa muituge.

₈Hearrá ráđđe agálaš áigái,

duomu várás son lea ceggen truvnnus.

₉Son dubme máilmmi vanhurskásit,

cealká vuoigatlaš duomu álbmogiidda.

₁₀Hearrá lea sordojuvvon

olbmuid ladni,

ladni áŧestusa áiggiid.

₁₁Dutnje dorvvastit buohkat

geat dovdet du nama,

dasgo don, Hearrá,

it beahte sin geat ohcet du.

₁₂Lávlot máidnuma Hearrái

gii ássá Sionis,

almmuhehket su stuorra daguid

álbmogiidda!

₁₃Son gii mávssaha vara, muitá,

ii son vajáldahte vártnuhemiid

bárguma.

₁₄Leage munnje árbmugas, Hearrá,

geahča gillámuša

maid vašálaš lea dagahan munnje.

Don bajidat mu eret

jápmima poarttain,

₁₅vai mun beasan máidnut du

rámáduslávlagiiguin

ja ávvudit du bestojumi

Siona poarttain.

₁₆Álbmogat vudjo roggái

maid ieža ledje goivon,

sin juolggit sorrojedje fierbmái

maid sii ieža ledje gokčan.

₁₇Hearrá almmustuvai

ja doalai duomu,

ipmilmeahttumat darvánedje

iežaset gieđaid daguide. Higgajon. Sela

₁₈Jábmiidáibmui

mannet ipmilmeahttumat,

buot álbmogat mat vajáldahttet Ipmila.

₁₉Muhto váivvášat eai vajálduva

agálaččat,

vártnuhemiid doaivu ii dušša

agálaš áigái.

₂₀Čuožžil, Hearrá!

Ale suova olbmuid oažžut fámu,

dubme álbmogiid muođuidat ovddas.

₂₁Hearrá, surget álbmogiid,

vai sii ipmirdit

ahte sii leat dušše olbmot. Sela