Sálmmaid girji 10

₁Hearrá, manne leat nu guhkkin,

manne čiehkádat áŧestusa áigge?

₂Ipmilmeahttumat oaguhit

vártnuheami čeavllisteaset,

muhto darvánit iežaset juonaide.

₃Ipmilmeahttun rábmo

iežas vuovdás anistumi,

buressivdnida ruhtaváibmila

ja hiddjida Hearrá.

₄Ipmilmeahttun čevllohallá

ja jurddaša:

“Ii Ipmil ráŋggáš.

Ipmil ii oppa leatge.”

₅Son lihkostuvvá buot das maid dahká,

du duomut leat guhkkin eret sus.

Vašálaččainis son ii beroš.

₆Son dadjá váimmustis:

“Ii mihkkege lihkat mu,

lihkuhisvuohta ii deaivit mu.”

₇Su njálmmi dievva leat garrudusat,

behtolašvuohta ja veahkaváldi,

su njuovčča gokčá

vearrivuođa ja bahávuođa.

₈Son vuođgŋá dáluid lahkosiin,

čihkosis son goddá sivaheami.

Su čalmmit vákšot vigiheami,

₉son šokčá čihkosis dego ledjon rođus.

Son šokčá vártnuheami,

dohppe su ja sorrá su fierbmásis.

₁₀Son njahkala vuođgŋit,

vártnuheapme vuollána su fápmui.

₁₁Son dadjá váimmustis:

“Ii Ipmil beroš.

Son lea gokčan muođuidis,

ii son oainne maidege.”

₁₂Hearrá, čuožžil! Ipmil,

lokte gieđa,

ale vajáldahte vártnuhemiid!

₁₃Manne ipmilmeahttumat

ožžot hiddjidit Ipmila

ja dadjat váimmusteaset:

“Ii son ráŋggáš”?

₁₄Don oainnát heađi ja morraša

don oainnát buot ja anát fuola.

Vártnuheapme bidjá áššis

du ovdii,

donhan leat oarbása

veahkeheaddji.

₁₅Doaje ipmilmeahttun

ja bahás olbmo fámu,

ozahala su bahávuođa,

vai dat ii leat šat.

₁₆Hearrá lea gonagas agálašvuhtii,

vieris álbmogat leat jávkaduvvon

su eatnamis.

₁₇Hearrá, don gulat

váivvášiid átnumušaid,

don guldalat sin

ja nannet sin váimmu.

₁₈Don veahkehat oarbásiid

ja sordojuvvon olbmuid

oažžut vuoigatvuođa,

vai ii oktage šat dárbbaš

báhtarit eatnamis balus.