Sálmmaid girji 7

₂Hearrá, mu Ipmil,

dutnje mun dorvvastan.

Beastte mu ja gájo mu buohkain

geat doarridit mu,

₃muđui vašálaš gaikkoda mu

dego ledjon

ja geassá mu eret,

iige oktage veaje mu gádjut.

₄Hearrá, mu Ipmil,

jos mun lean sivalaš,

jos mu gieđain lea

vuoigatmeahttunvuohta,

₅jos lean dahkan bahá ustibii

ja speadjan vuostálasti

almmá siva haga,

₆de doarridehkos ja joksos

vašálaš mu,

dulbmos mu heakka eatnamii

ja bálkestehkos mu gudni

muldii. Sela

₇Hearrá, čuožžil moaristat,

vuostálastte daid geat vašuhit mu.

Morit, mu Ipmil,

don guhte gohčut dupmui.

₈Bovde ovdasat álbmogiid,

čohkán truvdnosat allagassii.

₉Hearrá dubme álbmogiid.

Veahket mu oažžut vuoigatvuođa,

dasgo munhan lean vanhurskkis

ja láitemeahttun.

₁₀Loahpat ipmilmeahttumiid

bahávuođa,

muhto divtte vanhurskása

bissut nanusin,

don oskkáldas Ipmil,

donhan dutkkat váimmu

ja monimuččaid.

₁₁Ipmil lea mu galba,

son beastá daid

geaid váibmu lea vuoigatlaš.

₁₂Ipmil lea vanhurskkis duopmár,

Ipmil guhte moaráhuvvá

juohke beaivvi.

₁₃Jos muhtun ii vuollán,

de son sadjá miehkis,

gealdá dávggis ja sikte.

₁₄Son ráhkada goddi vearjjuid

ja gárvvista buolli njuolaid.

₁₅Geahča, ipmilmeahttun guoddá

bahávuođa goaŧus,

sahkanahttá vearrivuođa

ja riegádahttá behttosa.

₁₆Son lea goivon rokki

ja dahkan dan čieŋalin,

muhto ieš son gahččá dan roggái

maid goaivvui.

₁₇Vearrivuohta maid son smiehtai,

jorggiha su iežas vuostá,

veahkaváldi deaivá su iežas oaivečohkkii.

₁₈Mun rámidan

Hearrá vanhurskkisvuođa

ja máinnun Hearrá, Alimusa, nama.