Sálmmaid girji 6

₂Hearrá, ale ráŋggáš mu moaristat,

ale bagat mu suhtustat!

₃Leage munnje árbmugas, Hearrá,

mun lean vuoimmehuvvan.

Buorit mu, Hearrá,

mu rumaš sotná.

₄Mu siellu lea sakka suorganan.

Man guhká, Hearrá?

₅Hearrá, jorgal mu beallái

ja gájo mu heakka,

veahket mu buorrevuođastat.

₆Iihan jábmiid luhtte oktage muitte du,

ii oktage rámit du jábmiidáimmus.

₇Mun lean váiban šuohkkimis,

čierrun láktada mu seaŋgga juohke ija,

gatnjalat leat njuoskadan mu oađđinsaji.

₈Bahča moraš lea sotnadan

mu čalmmiid,

dat leat šaddan boarisin

eatnat vuostálastiidan geažil.

₉Gáidet mus, buot vearredahkkit!

Hearrá lea gullan mu čierrunjiena.

₁₀Son lea gullan mu njuoras átnuma

ja vástida mu rohkadussii.

₁₁Buot mu vašálaččat

heahppášuhttojuvvojit.

Sii suorganit,

ja fáhkka sii báhtarit heahpanemiin.