Sálmmaid girji 29

Gudnejahttet Hearrá,

ipmiliid bártnit,

addet Hearrái gudni ja fámu!

₂Gudnejahttet Hearrá nama,

luoitádehket Hearrá muođuid ovdii

bassi čikŋabiktasat gárvun!

₃Hearrá jietna čáziid badjel!

Gudni Ipmil čeargu,

Hearrá čeargu stuorra čáziid badjel.

₄Hearrá jietna lea fámolaš,

Hearrá jietna lea hearvái.

₅Hearrá jietna cuvke sederiid,

Hearrá ludde

Libanona sedermuoraid.

₆Son bidjá Libanona

njuikkodit dego gálbbi,

Sirjonvári dego meahcivuovssá.

₇Hearrá jietna časká

dollanjuokčamiid,

₈su jietna doarggistahttá meahci,

son bidjá Kadešmeahci doarggistit.

₉Hearrá jietna bidjá áldduid guoddit,

dat gaiku vuovddi báljisin.

Buot su tempelis čuorvu: “Gudni!”

₁₀Hearrá truvdnu lea almmiábi alde,

son ráđđe gonagassan agálašvuhtii.

₁₁Hearrá addá álbmogasas fámu,

Hearrá buressivdnida

iežas álbmoga ráfiin.