Sálmmaid girji 30

₂Mun máinnun du, Hearrá,

dasgo don gesset mu

bajás čiekŋalasas,

it diktán mu vašálaččaid illudit.

₃Hearrá, Ipmilan,

mun čurvon du,

ja don dearvvasmahttet mu.

₄Hearrá, jábmiidáimmus

don loktejit mu,

addet munnje eallima

ja gádjot mu hávddis.

₅Lávlot Hearrái, dii su oskkáldasat,

máidnot su bassi nama.

₆Čalbmeravkalanbotta bistá su moarri,

oppa eallináiggi bistá su árbmu.

Eahkedis čierrun boahtá guossái,

muhto iđedis ávvulávlla.

₇Go mun dovden iežan oadjebassan,

de mun jurddašin:

“Mun in suoibbo goassege.”

₈Hearrá, árpmustat

don ledjet veahkehan mu dorvui várrái,

muhto go don čihket muođuidat,

de mun suorganin.

₉Hearrá, dalle mun čurvon du,

dus, Hearrán, mun átnon njuorrasit:

₁₀Mii ávkkiid lea das

ahte mun jámán,

das ahte mun manan hávdái?

Sáhttábat muolda máidnut du,

gulahago dat du oskkáldasvuođa?

₁₁Hearrá, gula mu,

leage munnje árbmugas.

Hearrá, leage don mu veahkeheaddji!

₁₂Don jorgalit

mu morašteddjiid čierrumiid dánsumin,

nullet mus morašbiktasiid

ja gárvvuhit munnje ilu.

₁₃Danne mun lávllun dutnje

máidnuma,

mun in jávohuva goassege.

Hearrá, Ipmilan,

mun rámidan du agálaččat.