Sálmmaid girji 28

Hearrá, mun čuorvvun du.

Mu bákti, ale leage jávohaga.

Jos don it vástit,

de mun šattan daid láhkásažžan

geat leat mannan hávdái.

₂Gula mu njuoras rohkosa

go mun čuorvvun dutnje

ja lokten gieđaid du tempela

basimus boaššu guvlui.

₃Ale gaikkit mu eret

oktanaga ipmilmeahttumiiguin,

daiguin geat dahket veriid.

Sii sárdnot ustitlaččat

lagamužžaseaset,

muhto sin váimmus lea bahávuohta.

₄Mávssat sidjiide sin daguid,

buot bahávuođa maid sii leat dahkan.

Atte sin daguid čuohcit

sidjiide alcceseaset,

divtte sin deaivvahaddat

iežaset daguide.

₅Siihan eai dovdda Hearrá daguid,

eai dan maid su gieđat leat dahkan.

Son gaikkoda sin,

son ii šat sin hukse.

₆Máidnojuvvon lehkos Hearrá,

dasgo son lea gullan

mu njuoras rohkadusaid.

₇Hearrá lea mu gievravuohta

ja mu galba,

mu váibmu dorvvasta sutnje.

Mun ožžon veahki,

ja mu váibmu ávvuda,

mun rámidan su lávlagiinnán.

₈Hearrá lea álbmogis givrodat,

iežas vuidojuvvon gonagasa

suodji ja bestojupmi.

₉Beastte álbmogat

ja buressivdnit iežat opmodaga.

Leage sin báimman,

guotte sin agálaš áigái.