Sálmmaid girji 23

Hearrá lea mu báimman,

ii mus váillo mihkkege.

₂Son livvuda mu ruonas gittiide,

son láide mu

vuoiŋŋadusa čáziid lusa.

₃Son áhpásmahttá mu sielu,

son láide mu

vanhurskkisvuođa bálgáid mielde

namas dihte.

₄Jos mun velá vádjolivččen

jápminsuoivana leagis,

de in mun bala mange bahás,

dasgo don leat mu mielde.

Du soabbi, du báimmansoabbi jeđđe mu.

₅Don ráhkadat munnje beavddi

mu vašálaččaid čalmmiid ovdii.

Don vuoiddat mu oaivvi oljjuin,

ja mu juhkanlihtti golgá badjel.

₆Aivvefal buorrevuohta

ja árbmugasvuohta čuovvu mu

buot mu eallinbeivviid,

ja mun beasan ássat Hearrá viesus

nu guhká go ealán.