Sálmmaid girji 22

₂Ipmilan, Ipmilan,

manne leat mu guođđán?

Mun váidalan heađistan,

muhto don leat guhkkin.

₃Ipmilan, mun čuorvvun du beaivet,

muhto don it vástit,

ja ihkku, inge oaččo mášu.

₄Dattetge don leat bassi,

du truvdnui badjánit

Israela rámáduslávlagat.

₅Dutnje dorvvastedje min áhčit,

dutnje sii dorvvastedje,

ja don bestet sin.

₆Sii čurvo du, ja don gádjot sin,

sii dorvvastedje dutnje

eaige beahtahallan.

₇Muhto mun lean máhtu inge olmmoš,

juohkehaš bilkida mu,

olbmot badjelgehččet mu.

₈Buohkat geat oidnet mu,

bilkidit mu,

sii njezzot, bárdet oaivvi ja dadjet:

₉“Son lea dorvvastan Hearrái,

gádjos dal Hearrá su.

Bestos Hearrá su, go juo ráhkista su!”

₁₀Donhan gesset mu eatni goaŧus,

don diktet mu orrut oadjebassan

eatni ratti vuostá.

₁₁Riegádeami rájes mu eallin

lea leamaš du gieđas,

eatni goaŧu rájes don

leat leamaš mu Ipmil.

₁₂Ale leage guhkkin,

dasgo áŧestus lea mu lahka,

iige oktage veahket mu.

₁₃Mu birra leat eatnat vuovssát,

Bašana burrut birastahttet mu.

₁₄Dat cagget munnje njálmmi

dego gaikkodeaddji, čeargu ledjonat.

₁₅Mu fápmu golgá eatnamii dego čáhci,

buot mu dávttit luovvanit.

Mu váibmu lea dego gáhčči,

dat suddá rattistan.

₁₆Mu čotta lea goikan

dego láirálihttebihttá,

mu njuovčča darvánaddá guopmái.

Don bijat mu jápmima muldii.

₁₇Beatnagat birastahttet mu,

veahkaválddálaččat čohkiidit mu birra,

sii ráiget mu gieđaid ja julggiid.

₁₈Mun sáhtán lohkat buot dávttiidan.

Olbmot gávket, sii gehččet munnje.

₁₉Sii juogadit gaskaneaset mu biktasiid

ja vuorbádit mu gárvvu.

₂₀Hearrá, ale leage mus guhkkin,

mu gievravuohta, doama veahkehit mu!

₂₁Gájo mu miehkis,

gájo mu divrras heakka beatnagiin!

₂₂Beastte mu ledjona njálmmis,

beastte mu meahcivuovssáid čorvviin!

₂₃Mun gulahan du nama vieljaidasan,

máinnun du searvegottis:

₂₄“Máidnot Hearrá,

dii geat ballabehtet Hearrás,

Jakoba nálli, gudnejahte su!

Bala sus, Israela nálli!

₂₅Ii son badjelgeahččan váivváša

iige fasttášan vártnuheami

vártnuhisvuođa.

Ii son čiehkan sus muođuidis,

muhto gulai go son čuorvvui veahki.”

₂₆Dus boahtá mu rámáduslávlla,

go mun rámidan du stuorra čoakkalmasas.

Mun ollašuhtán lohpádusaidan

daid čalmmiid ovddas geat ballet dus.

₂₇Váivvášat borret ja gallánit,

dat geat ohcet Hearrá, rámidit su.

Ellos din váibmu agálaš áigái!

₂₈Muitoset buot eatnama ravddat

Hearrá daguid

ja jorgalehkoset Hearrá beallái,

gopmirdehkoset sutnje

buot álbmogiid sogat,

₂₉dasgo gonagasváldi gullá Hearrái.

Son ráđđe álbmogiid.

₃₀Gopmirdehkoset sutnje

buot eatnama válddálaččat,

sojaldahttoset čippiid sutnje

buohkat geat njidjet muldii.

Muhto mun ealán Hearrái,

₃₁mu mánát bálvalit su

ja muitalit su daguid

boahtti buolvvaide.

₃₂Ođđa buolvvaide sii gulahit

Hearrá vanhurskkisvuođa,

dasgo son lea dahkan dán.