Sálmmaid girji 21

₂Hearrá, du fápmu

illudahttá gonagasa,

son ávvuda sakka du bestojumis.

₃Masa su váibmu hálidii

dan don addet sutnje,

it biehttalan sus

maid su baksamat átno. Sela

₄Don addet sutnje

buressivdnádusa ja oasálašvuođa,

bidjet su oaivái gollekruvnnu.

₅Son ánui dus eallima,

ja dan don sutnje addet,

guhkes eallima,

eallinjagiid lohkameahttun ollu.

₆Du veahkki dahká

su gudni stuorisin,

don addet sutnje allatvuođa

ja hearvásvuođa.

₇Don attát sutnje

agálaš buressivdnádusa,

deavddát su iluin muođuidat ovddas.

₈Go gonagas dorvvasta Hearrái,

de son ii lihkahuvvo,

dasgo Alimus lea oskkáldas.

₉Du giehta fáhte buot vašálaččaidat,

du olgeš giehta deaivá daid

geat vašuhit du.

₁₀Don bijat sin dego dollaommanii,

go sii oidnet du muođuid.

Hearrá loaktá sin moaristis,

dolla njielasta sin.

₁₁Don duššadat sin mánáid eatnamis,

sin náli olbmuid gaskkas.

₁₂Sii smihttet baháid du vuostá,

sii hutket juonaid,

muhto dat eai lihkostuva.

₁₃Don gealddát dávggi sin njeaiga,

don áját sin báhtarussii.

₁₄Čuožžil, Hearrá, čájet gievravuođat!

Mii máidnut du stuorra fámu

lávlumiin ja čuojahemiin.