Sálmmaid girji 20

₂Vare Hearrá vástidivččii dutnje

heahtebeaivvi,

vare Jakoba Ipmila

namma várjalivččii du!

₃Vare son vuolggahivččii dutnje veahki

bassibáikkistis

ja attášii dutnje doarjaga Sionis.

₄Vare son muittášii buot

du borramušoaffariid

ja válddášii bures vuostá

du boaldinoaffariid. Sela

₅Vare son attášii dutnje dan

maid du váibmu sávvá,

ja ollašuhtášii buot du áigumušaid.

₆De mii beassat ávvudit du bestojumi

ja loktet leavgga Ipmileamet nammii.

Vare Hearrá deavddášii buot du átnumiid!

₇Dál mun dieđán ahte Hearrá addá

vuidojuvvon gonagassasis vuoittu.

Son vástida sutnje bassi almmistis,

gádju su olgeš gieđainis.

₈Muhtumat dorvvastit vovnnaide,

muhtumatgis heasttaide,

muhto mii dorvvastit Hearrá,

Ipmileamet, nammii.

₉Dot vuollánit ja gahččet,

muhto mii čuožžut ja ceavzit.

₁₀Hearrá, atte gonagassii vuoittu!

Vástit midjiide dan beaivvi

go mii čuorvut.