Sálmmaid girji 24

Eanan ja buot mii dan deavdá,

gullá Hearrái,

máilbmi ja dat geat ásset das,

leat su.

₂Son lea vuođđudan

eatnama meara ala,

ceggen dan rávnnjiid badjelii.

₃Gii oažžu mannat Hearrá várrái,

gii beassá čuožžut su bassibáikkis?

₄Dat geas leat vigihis gieđat

ja buhtis váibmu,

gii ii váinnut behtolašvuođa

iige vuortno vearrut.

₅Sutnje Hearrá addá

buressivdnádusa,

bestojumi Ipmil

atná su vanhurskkisin.

₆Dát lea dat álbmot mii ohcá du,

mii boahtá du muođuid ovdii,

Jakoba Ipmil. Sela

₇Bajidehket oaivvi, poarttat,

badjánehket, agálaš uvssat,

vai gudni gonagas boahtá sisa!

₈Gii lea gudni gonagas?

Son lea Hearrá, gievra ja veagalaš,

Hearrá, veagalaš soahtat.

₉Bajidehket oaivvi, poarttat,

badjánehket, agálaš uvssat,

vai gudni gonagas boahtá sisa!

₁₀Gii lea gudni gonagas?

Son lea Hearrá, Almmiveagaid Ipmil.

Son lea gudni gonagas. Sela