Sálmmaid girji 17

Hearrá, gula mu vuoigatlaš ášši,

fuomáš go mun čuorvvun.

Guldal mu rohkadusa – dat boahtá

vuoigadis baksamiin.

₂Dus mun vuorddán vuoigatvuođa.

Du čalmmit oidnet mii lea duohta.

₃Don geahččalat mu váimmu,

iskkadat dan ihkkunai,

don guorahalat mu,

muhto it gávnna mus vearrivuođa.

Mun in suddut njálmmiinan

₄olbmuid láhkái.

Du sáni mielde mun lean váruhan

veahkaválddálaččaid bálgáin.

₅Mun lean vádjolan du luottaid,

mu juolggit eai leat suibbodan.

₆Mun čuorvvun du, Ipmil,

ja don vástidat munnje.

Guldal mu, gula mu sániid,

₇čájet munnje iežat ovddolaš

buorrevuođa.

Don beasttát olgeš gieđainat

daid geat báhtarit vašálaččain

ja ohcet suoji du luhtte.

₈Várjal mu dego čalbmegáhkát,

čiega mu soajáidat suoivanii

₉ipmilmeahttumiin

geat fallehit mu,

jápminvašálaččain

geat birastahttet mu.

₁₀Sii leat garradan váimmuset

ja váldán njálbmái čeavlás sániid.

₁₁Dál sii birastahttet mu

gosa ain manan,

sii fáktejit mu

ja dáhttot časkit mu eatnamii.

₁₂Sii leat dego gaikkodeaddji

nealgeledjon,

nugo vuođgŋi beahtu.

₁₃Čuožžil, Hearrá!

Vuosttil vašálačča ja časkke su eatnamii!

Beastte mihkiinat mu heakka

ipmilmeahttumis.

₁₄Hearrá, beastte mu gieđainat

dán máilmmi olbmuin,

dain geat leat ožžon

bálkkáset dán eallimis.

Muhto gallet daid

geaid don suodjalat,

divtte sin gallánit

ja guođđit valljugasvuođa

mánáidasaset.

₁₅Mun beasan oaidnit du muođuid

danne go mun lean vuoiggalaš.

Go gohccán, de mun gallánan

du muođuid oaidnimiin.