Sálmmaid girji 18

₂Hearrá, du mun ráhkistan,

don leat mu fápmu.

₃Hearrá, mu bákti ja mu ladni,

mu beasti, mu Ipmil, mu várri

gosa mun báhtaran, mu galba,

mu bestojumi čoarvi ja suodji.

₄Mun čurvon Hearrá

guhte lea máidnojuvvon,

son besttii mu mu vašálaččain.

₅Jápmima báttit čavge mu birra,

heavahusa rávnnjit

suorggahedje mu.

₆Jábmiidáimmu čatnasat

giessasedje mu birra,

mu ovddas ledje jápmima gielat.

₇Áŧestusastan mun čurvon Hearrá,

mun čurvon Ipmilasan.

Son gulai mu jiena tempelisttis,

mu čuorvvas bođii su beljiide.

₈Dalle eanan doarggistii

ja sparaidii,

váriid vuođđudusat lihkadedje,

su moarri doarggistahtii daid.

₉Suovva badjánii su njunis,

duššadeaddji dolla su njálmmis,

son rusui čuotnamiid ja hilaid.

₁₀Son sojahii almmi ja njiejai,

seavdnjatvuohta julggiid vuolde.

₁₁Son girddii keruba alde,

biekka soaját dolvo su hoahpus.

₁₂Son dagai

seavdnjadasa čiehkánis,

suhkkes arvebalvvaid

iežas govččasin.

₁₃Su báitima ovddas manne balvvat,

čuorbmasat ja áhcagas hilat.

₁₄Hearrá čearggui almmis,

Alimus divttii jienas gullot

čuorbmasiid ja áhcagas hilaid siste.

₁₅Son bážii njuolaidis

ja biđgii vašálaččaid,

son balddii sin álddagasaiguin.

₁₆Mearrabotni rokkit ihte,

eatnama vuođđudusat bohte oidnosii

go don áitet, Hearrá,

go du moari riđđu bosui dan badjel.

₁₇Son geigii allagasas gieđa

ja dohppii mu,

son gesii mu bajás čiekŋalis čáziin.

₁₈Son gájui mu

fámolaš vašálaččain,

vuostálastiin geat ledje munnje

menddo gievrrat.

₁₉Sii fallehedje mu

mu lihkuhisvuođa beaivvi,

muhto Hearrá bođii munnje doarjjan.

₂₀Son buvttii mu friddjavuhtii

ja besttii mu,

dasgo son ráhkista mu.

₂₁Hearrá mávssii munnje

mu vuoigatvuođa mielde,

son bálkkašii mu danne go

mu gieđat leat buhttásat.

₂₂Munhan ledjen vádjolan

Hearrá geainnuid

inge lean bahávuođas gáidan Ipmilis.

₂₃Buot su lágaid

mun lean atnán čalmmiid ovddas,

mun in leat hilgon su báhkkomiid.

₂₄Mun lean leamaš

láitemeahttun su ovddas,

mun lean váruhan suddudeames.

₂₅Hearrá mávssii munnje

mu vuoigatvuođa,

son oinnii ahte mu gieđat

leat buhttásat.

₂₆Don leat oskkáldas oskkáldassii

ja vuoigatlaš vuoigatlažžii.

₂₇Don leat buhtis buhttásii

muhto nággár dasa gii lea nággár.

₂₈Don beasttát vártnuhemiid,

muhto vuolidat daid geain leat

gorges čalmmit.

₂₉Hearrá, don divttát

mu lámppá čuovgat,

mu Ipmil čuvge mu seavdnjatvuođa.

₃₀Du vehkiin mun fallehan

soahteveaga,

Ipmilan vehkiin mun njuiken

muvrra badjel.

₃₁Ipmila geaidnu lea ollis,

Hearrá sátni lea buhtis.

Dego galba son suodjala daid

geat dorvvastit sutnje.

₃₂Gii lea Ipmil juos ii Hearrá,

gii lea bákti juos ii min Ipmil?

₃₃Ipmil vearjuda mu fámuin,

son dahká mu vádjolusa

láitemeahttumin.

₃₄Son dahká mu julggiid

fallin dego sarvvaálddu juolggit

ja addá munnje coavcci alážiin.

₃₅Son oahpaha mu gieđaid soahtat,

son máhttáha mo gealdit veaikedávggi.

₃₆Don attát munnje

bestojumát galbba,

don doarjjut mu olgeš gieđainat.

Don gulat mu rohkosa

ja dagat mu stuorisin.

₃₇Don rabat luotta mu lávkkiide,

mu láhpelađđasat eai vealčas.

₃₈Mun doarridan vašálaččaidan

ja jovssan sin,

mun in jorggit ovdal go lean

duššadan sin.

₃₉Mun cuvken sin,

nu ahte sii eai sáhte čuožžilit.

Sii gahččet mu julggiid vuollái.

₄₀Don vearjudat mu soahtái,

don bágget mu vuostálastiid

vuollánit.

₄₁Don áját mu vašálaččaid báhtui,

mun loahpahan daid

geat vašuhit mu.

₄₂Sii čurvot,

muhto ii oktage gájo sin,

sii čurvot Hearrái,

muhto son ii vástit sidjiide.

₄₃Mun cuvken sin gavjan biggii,

duolmman sin dego bálgáid stánžži.

₄₄Don gádjot mu

stuibmideaddji álbmogiin,

don bidjet mu

álbmogiid oaivámužžan.

Vieris álbmot ferte bálvalit mu,

₄₅sii jeagadit ovdal go

mun oppa gohčunge sin.

Amas olbmot dohkkestuvvet munnje.

₄₆Sii leat fámohuvvan,

doarggistemiin sii bohtet olggos

ladniineaset.

₄₇Hearrá eallá!

Rámiduvvon lehkos mu bákti!

Leage aliduvvon,

mu bestojumi Ipmil!

₄₈Ipmil diktá mu mávssahit,

son bidjá álbmogiid mu julggiid vuollái.

₄₉Don čoavddát mu vašálaččainan,

loktet mu mu vuostálastiid

bajábeallái,

don gájut mu veahkaválddálaččaid gieđas.

₅₀Danne mun rámidan du

álbmogiid gaskkas, Hearrá,

mun lávllun du nama máidnuma.

₅₁Son addá gonagassasis

stuorra vuoittuid,

son lea oskkáldas

dasa gean lea vuoidan,

Davidii ja su nállái, agálaččat.