Sálmmaid girji 16

Várjal mu, Ipmil,

dasgo mun dorvvastan dutnje.

₂Mun dajan Hearrái:

“Don leat mu Hearrá,

mus ii leat mihkkege buriid earret du.”

₃Eatnama bassi olbmuide

son čájeha iežas ovddolaš ráhkisvuođa,

₄muhto ollu leat bákčasat dain

geat huovidit eará ipmiliid maŋŋái.

Mun in golggat varraoaffara daidda

inge váldde njálbmái daid namaid.

₅Hearrá, don leat mu árbeoassi

ja mu cearki,

don mearridat mu vuorbbi.

₆Mun lean ožžon iežan oasi

čáppa eatnamis, duođaid,

hearvás árbbi mun lean ožžon.

₇Mun máinnun Hearrá

guhte rávve mu,

velá ihkkuge mun gulan su rávvagiid

siskkildasastan.

₈Mun muittán Hearrá álelassii.

Go son lea mu olgeš bealde,

de mun in goassege suoibbo.

₉Danne mu váibmu illuda

ja mu siellu ávvuda,

velá mu rumašge lea oadjebas.

₁₀Don it hilggo mu sielu

jábmiidáibmui,

don it suova iežat oskkáldas

bálvaleaddji oaidnit hávddi.

₁₁Don válddahalat munnje

eallima geainnu,

du muođuid ovddas

lea ilu dievasvuohta,

agálaš ávvu du olgeš gieđa bealde.