Esra 9

₁Go dát lei dahkkojuvvon, de oaivámuččat bohte mu lusa ja dadje: “Ii Israela álbmot, eai báhpat eaige levilaččat leat earuhan iežaset vieris álbmogiin, kanaanlaččain, hetlaččain, perisselaččain, jebuslaččain, ammonlaččain, moablaččain, egyptalaččain eaige amorlaččain ja sin bahávuođas. ₂Sii leat váldán alcceseaset ja bártniidasaset áhkkán sin nieiddaid, nu ahte eará álbmogat leat seahkanan bassi sohkii. Oaivámuččat ja njunnošat leat leamaš vuosttamuččat dahkat dakkár oskkáldasmeahttunvuođa.” ₃Go mun gullen dan, de mun gaikkodin iežan gávtti ja oalgebiktasa, gaikon vuovttaid ja skávžžáid ja čohkkájin jávohis morrašis. ₄Buohkat geat balle Israela Ipmila sániin, ledje suorganan daid eret dolvojuvvon olbmuid oskkáldasmeahttunvuođa dihte. Sii čoahkkanedje mu birra, muhto mun čohkkájin jávohis morrašis gitta eahketoaffara rádjái.

₅Eahketoaffara áigge mun čilgen dárpmehuvvan dilistan. Mun luoitádin čippiid ala, gákti ja oalgebivttas gaikkoduvvon, geigejin gieđaid Hearrá, Ipmilan, beallái ₆ja rohkadallen: “Ipmilan, mun heahpanan nu sakka ahte illá duosttan jorgalit ámadaju du guvlui, dasgo min suttut leat loktanan juo min oaivvi badjel, ja min vealgi ollá gitta albmái. ₇Áhčiideamet beivviid rájes ja gitta dássážii lea min vealgi leamaš stuoris. Suttuideamet dihte mii ja min gonagasat ja báhpat leat addojuvvon vieris gonagasaid gihtii, miehkkái, fáŋgavuhtii, rieviduvvot ja heahppášuhttojuvvot, ja nu lea dálge. ₈Muhto dál Hearrá, min Ipmil, lea oanehis bottoža leamaš midjiide árbmugas ja diktán bázahasa mis beassat báhtui ja diktán min cegget goađi iežas bassibáikái. Son lea čuvgen min čalmmiid ja addán midjiide ođđa searaid šlávvavuođasteamet. ₉Vaikko mii leat šlávat, de min Ipmil ii leat guođđán min šlávvavuohtaseamet. Son lea sojahan Persia gonagasaid árkkálmastit min, nu ahte sii leat suovvan min cegget Ipmileamet tempela čievračomas ja addán midjiide suoji Judas ja Jerusalemis.

₁₀Ipmileamet, maid mii sáhttit dadjat dán maŋŋil? Mii leat hilgon du báhkkomiid ₁₁maid don addet midjiide du bálvaleddjiid, profehtaid, bokte: ‘Eanan maid dii mannabehtet váldit oapmineattet, lea buhtismeahttun. Eatnama álbmogat leat buhtismeahttunvuođasteaset deavdán dan fastivuođaideasetguin geažis geahčái. ₁₂Dan dihte dii ehpet oaččo náitit nieiddaideattet sin bártniide ehpetge váldit sin nieiddaid bártniidasadet áhkkán. Dii ehpet oaččo goassege ovddidit sin lihku ja buori. Nu dii šaddabehtet gievran ja beassabehtet návddašit buot dán eatnama buriid, ja din mánát ožžot dan iežaset opmodahkan agálaš áigái.’ ₁₃Mii leat šaddan gierdat ollu, danin go min dagut leat leamaš bahát ja min vealgi stuoris. Muhto don, min Ipmil, leat ráŋggáštan min uhcit go min vearredagut livčče ánssášan, ja leat diktán bázahasa beassat báhtui, nugo dál lea dáhpáhuvvan. ₁₄Galggašeimmet go mii fas rihkkut du báhkkomiid nu ahte náitaladdat daiguin olbmuiguin geat dahket daid fastivuođaid? Almma don dalle moaráhuvašit ja duššadivččet min, nu ahte ii oktage bázáše iige beasaše báhtui? ₁₅Hearrá, Israela Ipmil, don leat vuoigatlaš, miihan leat odne bázahas mii lea beassan báhtui. Mii leat sakka vealgáduvvan, go mii dál boahtit du ovdii. Maŋŋil dan mii lea dáhpáhuvvan, ii oktage biso du muođuid ovddas.”