Esra 8

₁Dát leat daid bearašoaivámuččaid sohkalogahallamat geat vulge ovttas muinna ruoktot Babylonias dalle go Artaxerxes lei gonagassan:

₂Pinehasa sogas Geršom, Itamara sogas Daniel, Davida sogas Hattuš, ₃Šekanja bárdni, Paroša sogas Sakarja ja suinna čuođivihttalogi olbmá geat ledje čállojuvvon sohkalogahallamii, ₄Pahat-Moaba sogas Eljoenai, Serahja bárdni, ja guoktečuođi olbmá suinna, ₅Sattu sogas Šekanja, Jahasiela bárdni, ja golbmačuođi olbmá suinna, ₆Adina sogas Ebed, Jonatana bárdni, ja vihttalogi olbmá suinna, ₇Elama sogas Jesaja, Atalja bárdni, ja čiežalogi olbmá suinna, ₈Šefatja sogas Sebadja, Mikaela bárdni, ja gávccilogi olbmá suinna, ₉Joaba sogas Obadja, Jehiela bárdni, ja guoktečuođi gávccinuppelohkái olbmá suinna, ₁₀Bani sogas Šelomit, Josifja bárdni, ja čuođiguhttalogi olbmá suinna, ₁₁Bebaja sogas Sakarja, Bebaja bárdni, ja guoktelogigávcci olbmá suinna, ₁₂Asgada sogas Johanan, Hakkatana bárdni, ja čuođilogi olbmá suinna, ₁₃Adonikama sogas maŋimuččat, geat ledje Elifelet, Jeiel ja Šemaja, ja guhttalogi olbmá singuin, ₁₄ja vel Bigvaja sogas Utai ja Sakkur ja čiežalogi olbmá sudnuin.

₁₅Mun čohkkejin sin dan joga gáddái mii golgá Ahava guvlui, ja dohko mii dagaimet siidda golmma beaivái. Doppe mun fuobmájin ahte das ledje dábálaš olbmot ja báhpat, muhto ii oktage levilaš. ₁₆Dalle mun rávken lusan Eliesera, Ariela, Šemaja, Elnatana, Jariba, Elnatana, Natana, Sakarja ja Mešullama geat ledje sohkaoaivámuččat, ja Jojariba ja Elnatana geat leigga oahpaheaddjit. ₁₇Mun gohččon sin vuolgit Iddo lusa gii lei Kasifja báikki oaivámuš, ja dadjat sutnje ja su virgeguimmiide ja tempelbálvaleddjiide geat ásse doppe, ahte sii galge vuolggahit bálvaleddjiid min Ipmila vissui. ₁₈Ja go Ipmil anii mis fuola, de sii vuolggahedje min lusa Šerebja, jierpmálaš olbmá, ja su bártniid ja vieljaid, oktiibuot gávccinuppelohkái olbmá. Son lei israellaš ja gulai Levi čerdii ja Mahli sohkii. ₁₉Sii vuolggahedje maiddái Hašabja ja suinna Jesaja gii gulai Merari sohkii, ja su vieljaid ja bártniid, oktiibuot guoktelogi olbmá. ₂₀Dasa lassin sii vuolggahedje guoktečuođiguoktelogi tempelbálvaleaddji geaid David ja oaivámuččat ledje bidjan bálvalit levilaččaid. Sin buohkaid namat merkejuvvojit logahallamii.

₂₁Ahavajohkagáttis mun gulahin fásttu, vai mii vuollánivččiimet Ipmileamet muođuid ovddas ja rohkadalašeimmet buori mátkki alcceseamet ja mánáidasamet ja buot opmodahkaseamet. ₂₂Dasgo mun heahpanadden ánuheames gonagasas soahteolbmáid ja riidejeddjiid veahkkin várjalit min min vašálaččain mátkkis. Miihan leimmet dadjan sutnje ahte min Ipmil veahkeha daid geat bálvalit su, muhto son diktá buot fámus ja moaris deaividit daid geat hilgot su. ₂₃Nu mii fástudeimmet ja ánuimet veahki min Ipmilis, ja son gulai min.

₂₄De mun válljejin guoktenuppelohkása báhpaid oaivámuččain ja vel Šerebja ja Hašabja ja lohkása sudno virgeguimmiin. ₂₅Mun vihkkejin sidjiide silbba, golli ja lihtiid, buot attáldagaid maid gonagas, su ráđđeaddit ja oaivámuččat ja buot israellaččat geat ásse doppe, ledje addán min Ipmila vissui. ₂₆De mun vihkkejin ja adden sidjiide guhttačuođivihttalogi taleantta silbba, čuođi silbalihti maid árvu lei guokte taleantta, čuođi taleantta golli, ₂₇guoktelogi gollecearkki maid árvu lei duhát dareikka ja vel guokte fiinna, čuovgi bronsalihti mat ledje seammá mávssolaččat go golli. ₂₈Mun dadjen sidjiide: “Dii lehpet basuhuvvon Hearrái. Lihtit leat maid basuhuvvon, ja silba ja golli lea eaktodáhtolaš attáldat Hearrái, din áhčiid Ipmilii. ₂₉Atnet daid bures áimmuin dassá go beassabehtet vihkket daid Jerusalemis Hearrá tempela gámmáriidda, njunušbáhpaid, levilaččaid ja Israela bearašoaivámuččaid ovddas.” ₃₀Báhpat ja levilaččat válde silbba ja golli ja lihtiid mat ledje vihkkejuvvon, vai besset doalvut daid Jerusalemii min Ipmila tempelii.

₃₁Vuosttaš mánu guoktenuppelogát beaivvi mii vulggiimet Ahavajohkagáttis Jerusalema guvlui. Min Ipmil lei minguin ja várjalii min vašálaččain ja rievváriin mátkkis. ₃₂Go mii joavddaimet Jerusalemii, de mii vuoiŋŋasteimmet golbma beaivvi. ₃₃Njealját beaivvi mii vihkkiimet silbba ja golli ja lihtiid min Ipmila tempelis ja attiimet daid báhppa Meremotii, Uria bárdnái. Das ledje maiddái Elasar, Pinehasa bárdni, ja levilaččat Josabad, Ješua bárdni, ja Noadja, Binnuja bárdni. ₃₄Buot lohkkojuvvui ja vihkkejuvvui, ja daid deattut čállojuvvojedje girjái dan seammás.

₃₅Dat geat ledje máhccan fáŋgavuođas oaffarušše boaldinoaffariid Israela Ipmilii. Sii oaffarušše guoktenuppelohkái vuovssá oppa Israela ovddas, ovccilogiguhtta viercca, čiežalogičieža lábbá ja suddooaffarin guoktenuppelohkái bohká, buot boaldinoaffarin Hearrái. ₃₆Dasto sii geigejedje gonagasa gohččumiid Eanu oarjjabeale provinssa gonagaslaš satráhpaide ja eatnanhearráide, ja duot olbmát dorjo álbmoga ja Ipmila tempela.