Esra 7

₁Persia gonagasa Artaxerxes ráđđenáiggis Jerusalemii bođii Esra, Seraja bárdni. Su áddjá lei Asarja, su áhčči Hilkia, ₂su Šallum, su Sadok, su Ahitub, ₃su Amarja, su Asarja, su Merajot, ₄su Serahja, su Ussi, su Bukki, ₅su Abišua, su Pinehas, su Elasar ja su Aron, bajimusbáhppa. ₆Esra bođii Babylonis. Son lei čáloahppavaš ja dovddai bures Mosesa lága maid Hearrá, Israela Ipmil, lei addán. Son fidnii gonagasas buot maid siđai, danne go Hearrá, su Ipmil, lei suinna. ₇Su mielde vulge Babylonis Jerusalemii maiddái muhtun eará israellaččat, báhpat, levilaččat, lávlut, uksafávttat ja tempelbálvaleaddjit. Dat dáhpáhuvai gonagas Artaxerxesa čihččet ráđđenjagis. ₈Esra bođii Jerusalemii gonagasa čihččet ráđđenjagi viđát mánus. ₉Son lei mearridan vuolgit Babylonis vuosttaš mánu vuosttaš beaivvi, ja viđát mánu vuosttaš beaivvi son joavddai Jerusalemii, dasgo su Ipmila buorre giehta lei su badjel. ₁₀Dasgo Esra lei mearridan guorahallat Hearrá lága, doahttalit dan ja oahpahit Israelii lága ja rievtti.

₁₁Dát lea geardduhus reivves maid gonagas Artaxerxes attii báhppa Esrai, čáloahppavažžii, daid báhkkomiid ja mearrádusaid maid Hearrá lei addán Israelii:

₁₂“Artaxerxes, gonagasaid gonagas, báhppa Esrai, čáloahppavažžii, gii dovdá almmi Ipmila lága. ₁₃Mun gohčun ahte buot mu riikka olbmot geat gullet Israela álbmogii, maiddái báhpat ja levilaččat, buohkat geat dáhttot máhccat Jerusalemii, ožžot vuolgit du mielde, ₁₄go gonagas ja su čieža ráđđeaddi dál vuolggahit du Judai ja Jerusalemii. Don galggat dihtoštit, leatgo doppe doallan du Ipmila lága maid don dovddat. ₁₅Don galggat maid doalvut mielddát silbba ja golli maid gonagas ja su ráđđeaddit leat addán Israela Ipmilii gean ássansadji lea Jerusalemis. ₁₆Don galggat maiddái doalvut buot silbba ja golli maid oaččut Babylonia provinssas, ja buot attáldagaid maid álbmot ja báhpat addet Ipmileaset tempelii mii lea Jerusalemis.

₁₇Daid ruđaiguin don galggat oastit vuovssáid, vierccaid ja lábbáid ja borramušoaffariid ja juhkamušoaffariid mat gullet daidda, ja oaffaruššat daid áltára alde din Ipmila viesus Jerusalemis. ₁₈Jos silba ja golli vel báhcá, de don ja du vieljat oažžubehtet geavahit dan nugo dii Ipmileattet bálvaleaddjin atnibehtet buorrin. ₁₉Daid lihtiid maid leat ožžon tempelbálvalussii, don galggat guođđit Ipmila muođuid ovdii Jerusalemii. ₂₀Maid muđui dárbbašat Ipmilat tempelii ja maid šattat háhkat dohko, don oaččut gonagasa dávvirgámmáriin.

₂₁Mun, gonagas Artaxerxes, gohčun buot Eanu oarjjabeale provinssa dávvirvurkejeddjiid: Buot maid báhppa Esra, almmi Ipmila lága dovdi, sihtá, dii galgabehtet addit sutnje ollásit, ₂₂silbba čuođi taleantta rádjái, nisuid čuođi kora rádjái, viinni čuođi bata rádjái, oljju čuođi bata rádjái ja sáltti nu ollu go son sihtá. ₂₃Buot maid almmi Ipmil gohčču, dii galgabehtet dahkat viššalit su tempelii ávkin, vai su moarri ii deaivit gonagasa ja su bártniid riikka. ₂₄Mun maiddái mearridan ahte vearuid, divadiid dahje tuolu ii oaččo gáibidit báhpain, levilaččain, lávluin, uksafávttain, tempelbálvaleddjiin iige earáin geat bálvalit dán Ipmila tempelis.

₂₅Muhto don, Esra, galggat dainna viissisvuođain maid du Ipmil lea addán dutnje, ásahit duopmáriid ja fálddiid. Sii galget dubmet vuoiggalaččat buot Eanu oarjjabeale provinssa olbmuid, buohkaid geat dovdet du Ipmila lága, ja oahpahit lága daidda geat eai dovdda dan. ₂₆Juohkehačča gii ii doahttal du Ipmila lága iige gonagasa lága, galgá dubmet dan ráŋggáštussii mii vástida su rihkkuma, jogo jápmimii, rumašlaš ráŋggáštussii, sáhkkui dahje giddagassii.”

₂₇Máidnojuvvon lehkos Hearrá, áhčiideamet Ipmil, guhte bijai gonagasa váibmui jurdaga čiŋahit Jerusalema tempela! ₂₈Son lea dahkan gonagasa ja su ráđđeaddiid ja buot su fámolaš virgeolbmáid munnje buorredáhtolažžan. Go Hearrá, mu Ipmil, lei muinna, de mun roahkasmuvven čohkket muhtun Israela oaivámuččaid máhccat ovttas muinna Jerusalemii.