Esra 10

₁Go Esra tempela ovddas čipbeliid alde čierui ja rohkadalai ja dovddastii álbmoga suttuid, de čoahkkanedje su birra eatnat israellaččat, olbmát, nissonat ja mánát, ja buohkat čirro bahččagit. ₂Dalle Šekanja, Jehiela bárdni, Elama soga olmmoš, dajai Esrai: “Mii leat meannudan oskkáldasmeahttumit Ipmileamet vuostá, go leat váldán alcceseamet áhkáid eatnama álbmogiin. Dattetge lea Israelis ain doaivu. ₃Lohpidehkot dál Ipmilii ahte mii vuolggahit eret buot dáid áhkáid ja sin mánáid. Dat lea Hearrá ráva, ja maiddái buot daid ráva geat ballet Ipmila báhkkomiin. Dahkkot nugo láhka gáibida! ₄Čuožžil, dasgo don fertet čoavdit dán ášši. Mii doarjut du. Leage roahkkat ja bargagoađe!”

₅Dalle Esra čuožžilii ja bijai bajimuš báhpaid ja levilaččaid ja buot Israela oaivámuččaid vuordnut ahte sii dahket nugo lei celkojuvvon, ja sii vurdno. ₆De Esra vulggii dan sajis Hearrá tempela ovddas ja manai Johanana, Eljašiba bártni, gámmárii ja orui doppe ija. Son ii borran láibbi iige juhkan čázi, dasgo son lei morrašis daid eret dolvojuvvon olbmuid oskkáldasmeahttunvuođa geažil.

₇De Judas ja Jerusalemis gulahuvvui buohkaide geat ledje máhccan ahte sii galge čoagganit Jerusalemii. ₈Oaivámuččat ja vuorrasat ledje mearridan ahte jos muhtun ii boađáše golmma beaivvis, de oppa su opmodat váldojuvvošii ja son ieš čuldojuvvošii daid olbmuid searvegottis geat ledje máhccan. ₉Golmma beaivvi geažes, ovccát mánu guoktelogát beaivvi, buot Juda ja Benjamina olbmát ledje čoagganan Jerusalemii. Álbmot čoahkkanii Ipmila tempela šilljui, ja sii doarggistedje dán ášši geažil ja maiddái garra arvvi geažil. ₁₀Báhppa Esra čuožžilii ja dajai: “Dii lehpet leamaš oskkáldasmeahttumat go lehpet váldán vierronissoniid áhkkán, ja nu lasihan Israela sivalašvuođa. ₁₁Muhto dovddastehket dál suttuideattet Hearrái, din áhčiid Ipmilii, ja dahket nugo son dáhttu. Earuhehket iežadet dán eatnama álbmogiin ja daid nissoniin.”

₁₂Dalle oppa searvegoddi vástidii alla jienain: “Mii leat geatnegasat dahkat nugo don dajat. ₁₃Muhto dás leat ollu olbmot, ja lea arveáigi eatge mii sáhte šat čuožžut dáppe olgun. Dát ii leat dahkamis ovtta dahje guovtti beaivvis, dasgo olusat mis leat suddudan dán áššis. ₁₄Divtte min oaivámuččaid ovddastit oppa álbmoga. Juohke gávpogis buot olbmát geat leat váldán vierronissoniid áhkkán, galget čoagganit deike mearreáigái ovttas iežaset gávpoga vuorrasiiguin ja duopmáriiguin. Dušše nu mii sáhttit caggat Ipmileamet moari, mii lea buollán min vuostá daguideamet geažil.”

₁₅Dušše Jonatan, Asaela bárdni, ja Jahseja, Tikva bárdni, vuostálasttiiga dán, ja Mešullam ja levilaš Šabbetai doarjjuiga sudno. ₁₆Muhto dat geat ledje máhccan, dahke nugo lei daddjojuvvon. Báhppa Esra válljii namaid mielde muhtun bearašoaivámuččaid. Logát mánu vuosttaš beaivvi sii bohte čoahkkái ja guorahallagohte ášši. ₁₇Vuosttaš mánu vuosttaš beaivvi sii ledje geargan jearahallamis buot daid olbmáid geat ledje náitalan vierronissoniiguin.

₁₈Gávnnahuvvui ahte dát olbmát báhpabearrašiin ledje náitalan vieris nissoniiguin: Maaseja, Elieser, Jarib ja Gedalja Josadaka bártni Ješua sogas ja fulkkiin. ₁₉Sii lohpidedje duođas vuolggahit áhkáideaset eret ja adde viercca vealgeoaffarin suttuvealggiset ovddas. ₂₀Immera sogas Hanani ja Sebadja. ₂₁Harima sogas Maaseja, Elia, Šemaja, Jehiel ja Ussia. ₂₂Pašhura sogas Eljoenai, Maaseja, Ismael, Netanel, Josabad ja Elasa.

₂₃Levilaččain: Josabad, Šimi, Kelaja, gii maiddái gohčoduvvo Kelitan, Petahja, Juda ja Elieser. ₂₄Lávluin: Eljašib. Poartafávttain: Šallum, Telem ja Uri.

₂₅Eará israellaččain: Paroša sogas Ramja, Jissia, Malkia, Mijamin, Elasar, Malkia ja Benaja, ₂₆Elama sogas Mattanja, Sakarja, Jehiel, Abdi, Jeremot ja Elia, ₂₇Sattu sogas Eljoenai, Eljašib, Mattanja, Jeremot, Sabad ja Asisa, ₂₈Bebaja sogas Johanan, Hananja, Sabbai ja Atlai, ₂₉Bani sogas Mešullam, Malluk, Adaja, Jašub, Šeal ja Jeremot, ₃₀Pahat-Moaba sogas Adna, Kelal, Benaja, Maaseja, Mattanja, Besalel, Binnui ja Manasse, ₃₁Harima sogas Elieser, Jiššia, Malkia, Šemaja, Simeon, ₃₂Benjamin, Malluk ja Šemarja, ₃₃Hašuma sogas Mattenai, Mattatta, Sabad, Elifelet, Jeremai, Manasse ja Šimi, ₃₄Bani sogas Maadai, Amram, Uel, ₃₅Benaja, Bedja, Keluhu, ₃₆Vanja, Meremot, Eljašib, ₃₇Mattanja, Mattenai ja Jaasai, ₃₈Binnuja sogas Šimi, ₃₉Šelemja, Natan, Adaja, ₄₀Maknadbai Šašai, Šarai, ₄₁Asarel, Šelemja, Šemarja, ₄₂Šallum, Amarja ja Josef ₄₃ja Nebo sogas Jeiel, Mattitja, Sabad, Sebina, Jaddai, Joel ja Benaja. ₄₄Buot dát ledje váldán vierronissona áhkkán, muhto dál sii vuolggahedje sin eret, sihke áhkáid ja mánáid.