Beassážat dollojuvvojit
1Jošia doalai Hearrá gudnin beassážiid Jerusalemis. Beassášláppis njuvvojuvvui vuosttaš mánu njealljenuppelogát beaivvi. 2Gonagas gohčui báhpaid loaiddastit sajiidasaset ja movttiidahtii sin doaimmahit bálvalusbargguset Hearrá tempelis. 3Levilaččaide geat oahpahedje israellaččaid ja ledje basuhuvvon bálvalit Hearrá, son dajai: “Maŋŋil go bassi árka buktojuvvui dán tempelii maid Israela gonagas Salomo, Davida bárdni, huksii, de dii ehpet leat dárbbašan šat guoddit dan olggiid alde. Dál din bargun lea bálvalit Hearrá, Ipmileattet, ja su álbmoga Israela. 4Ráhkkanehket bearrašiid mielde ja juhkosiid mielde bálvalit nugo Israela gonagas David ja su bárdni Salomo leat mearridan. 5Čuoččastehket bassibáikái bearrašiid mielde nugo lea mearriduvvon din vieljaide, vihatkeahtes olbmuide, ja nugo lea mearriduvvon levilaš bearašjuhkosiidda, 6ja njuvvet beassášlábbá ja ráhkadehket bassi attáldagaid vieljaidasadet, nu ahte buot dáhpáhuvvá Hearrá sáni mielde Mosesii.”
7Jošia attii beassášoaffarin olbmuide iežas smávvaomiin golbmalogiduhát lábbá ja gihci, ja gonagasa opmodagas addojuvvojedje maid golbmaduhát vuovssá. 8Maiddái su oaivámuččat adde eaktodáhtolaš attáldagaid álbmogii, báhpaide ja levilaččaide. Ipmila tempela njunušolbmát Hilkia, Sakarja ja Jehiel adde báhpaide beassášoaffarin guokteduhát guhttačuođi lábbá ja vel golbmačuođi vuovssá. 9Levilaččaid njunušolbmát Konanja ja su vieljat Šemaja ja Netanel ja maiddái Hašabja, Jeiel ja Josabad adde levilaččaide beassášoaffarin vihttaduhát lábbá ja vel vihttačuođi vuovssá.
10Go ráhkkanandoaimmat ledje doaimmahuvvon, de báhpat čuoččastedje iežaset sajiide ja levilaččat loaiddastedje ovdan joavkkuid joavkkuid, nugo gonagas lei gohččon. 11Dasto levilaččat njuvve beassášlábbáid. Báhpat riškkuhedje vara maid levilaččat ledje áimmahuššan, ja levilaččat njalde lábbáid. 12Sii čulde dihto osiid sierra ja juhke daid álbmogii bearrašiid mielde, vai dat oaffaruššojuvvošedje Hearrái, nugo lea čállojuvvon Mosesa girjái. Seammá láhkái sii dahke vuovssáide. 13Sii basse beassášlábbá dolas nugo lei ásahuvvon, ja bassi attáldagaid sii vušše báđiin, bánnuin ja givnniin ja dolvo daid hoahpus álbmogii. 14Dasto sii ráhkadedje mállásiid alcceseaset ja báhpaide. Báhpat, Arona bártnit, šadde oainnat oaffaruššat buoidebihtáid boaldinoaffarin gitta ija rádjái, ja danin levilaččat ráhkadedje mállásiid alcceseaset ja sidjiide. 15Lávlut, Asafa bártnit, čužžo sajisteaset, nugo David, Asaf, Heman ja Davida oaidni Jedutun ledje mearridan, ja uksafávttat fáktejedje buot poarttaid. Ii oktage dárbbašan vuolgit bálvalusbáikkistis, danin go sin vieljat, levilaččat, ráhkadedje sidjiide mállása.
16Ná dollojuvvojedje dan beaivvi Hearrá beassážat ja Hearrá áltára alde oaffaruššojuvvojedje boaldinoaffarat, nugo gonagas Jošia lei gohččon. 17Beassážiid maŋŋil israellaččat geat ledje čoahkkanan Jerusalemii, dolle čieža beaivvi suvrutkeahtes láibbiid basiid. 18Dakkár beassážat eai lean dollojuvvon Israelis profehta Samuela beivviid rájes. Ii oktage Israela gonagasain lean doallan dakkár beassážiid go dat maid Jošia, báhpat ja levilaččat ja buot Juda, Israela ja Jerusalema ássit dolle. 19Dat beassážat dollojuvvojedje Jošia gávccinuppelogát ráđđenjagi.
Jošia jápmá
20Muhtun áiggi geažes das maŋŋil go Jošia lei divvon tempela, de Neko, Egypta gonagas, vulggii soahtat Karkemišii, Eufrata gáddái. Jošia vulggii su vuostá, 21muhto Neko vuolggahii áirasiid cealkit sutnje: “Manin don seahkanat mu áššiide, Juda gonagas? Mun in áiggo dál soahtat duinna, muhto dainna álbmogiin mainna mus lea soahti, ja Ipmil lea gohččon mu doapmat. Ale vuostálastte Ipmila, gii lea muinna, muđui son duššada du!” 22Jošia ii goit murdán, muhto gárvodii dovdameahttumin ja soahttái. Son ii gullan Neko sániid mat bohte Ipmila njálmmis, muhto vulggii soahtat Megiddojalgadassii. 23Dávgebáhččit deive gonagas Jošiai. Son dajai olbmáidasas: “Dolvot mu eret, mun lean bahás hávváduvvan.” 24Gonagasa olbmát sirde su soahtevovnnain nuppiide vovnnaide ja dolvo Jerusalemii. Dohko son jámii, ja son hávdáduvvui áhčiidis hávdebáikái. Oppa Juda ja Jerusalem moraštedje Jošia. 25Jeremia dagai Jošiai váidaluslávlaga, ja Israelis šattai vierrun ahte buot lávlut, sihke olbmát ja nissonat, leat lávlon Jošia birra iežaset váidaluslávlagiin. Dat leat čállojuvvon váidaluslávlagiidda.
26Mii muđui lea muitalit Jošias ja su vuoigatlaš daguin, mat dahkkojuvvojedje nugo Hearrá láhka gohčču, 27álggu rájes gitta loahpa rádjái, lea čállojuvvon Israela ja Juda gonagasaid girjái.
