2. Muitalusaid girji 34

₁Jošia lei gávccijahkásaš go šattai gonagassan, ja son ráđđii Jerusalemis golbmalogiokta jagi. ₂Son dagai dan mii lea riekta Hearrá čalmmiin, vádjolii áhčis Davida geainnuid iige gáidan dain ii olgeš iige gurut beallái.

₃Gávccát ráđđenjagistis, go son lei ain hui nuorra, Jošia ohcagođii áhčis Davida Ipmila, ja guoktenuppelogát ráđđenjagistis son duššadišgođii Judas ja Jerusalemis oaffarbáikkiid, ašeračuolddaid ja čuhppojuvvon ja leikejuvvon ipmilgovaid. ₄Son gohčui duššadit Baal-ipmiliid áltáriid ja cuvket suovasáltáriid mat ledje huksejuvvon daid ala. Ašeračuolddat ja čuhppojuvvon ja leikejuvvon govat mollejuvvojedje, ja moalut gilvojuvvojedje daid olbmuid hávddiid ala geat ledje oaffaruššan daidda. ₅Báhpaid dávttiid Jošia bolddii sin iežaset áltáriid alde. Nu son buhtistii Juda ja Jerusalema. ₆Manasse, Efraima ja Simeona guovllu gávpogiid rájes gitta Naftali guovllu rádjái ₇son gaikkui áltáriid ja ašeračuolddaid, ja miehtá Israela son mollii ipmilgovaid ja cuvkii suovasáltáriid. De son máhcai Jerusalemii.

₈Gávccinuppelogát ráđđenjagistis, go son lei geargan buhtisteames eatnama ja tempela, Jošia vuolggahii Šafana, Asalja bártni, gávpotoaivámuš Maaseja ja čálli Joaha, Joahasa bártni, divvut Hearrá, Ipmilis, tempela. ₉Sii manne bajimusbáhppa Hilkia lusa ja adde sutnje ruđaid maid levilaš uksafávttat ledje čoaggán Manasse, Efraima ja oppa Israela ja maiddái Juda ja Benjamina guovllus ja Jerusalema ássiin. ₁₀Ruđat addojuvvojedje daidda geat galge hovdet bargguid Hearrá tempelis, ja sii fas adde daid bargiide, ₁₁snihkkáriidda ja huksejeddjiide geat divvo tempela. Ruđain sii skáhppojedje čullojuvvon geđggiid ja hirssaid bielkagerddiide daid huksehusaid divodeami várás, maid Juda gonagasat ledje diktán billašuvvat. ₁₂Olbmát barge oskkáldasat. Sin bargguid goziheaddjin ledje levilaččat Jahat ja Obadja, Merari soga olbmot, ja Sakarja ja Mešullam, Kehata soga olbmot. Dat levilaččat geat máhtte čuojahit, ₁₃gozihedje guddiid ja hovdejedje eará bargiidge. Muhtun levilaččat barge čállin, hoavdan ja uksafáktan.

₁₄Go sii ledje váldimin ovdan dan silbba mii lei boahtán Hearrá vissui, de báhppa Hilkia gávnnai girjji mas lei Hearrá láhka, mii lei addojuvvon Mosesa bokte. ₁₅Hilkia dajai gonagasa čállái Šafanii: “Mun gávdnen Hearrá tempelis láhkagirjji.” Ja son attii girjji Šafanii. ₁₆Šafan doalvvui girjji gonagassii ja dajai: “Du bálvaleaddjit dahket visot mii lea addojuvvon sin bargun. ₁₇Sii leat váldán ruđaid mat leat čoggon Hearrá tempelii, ja addán daid divvunbargguid goziheddjiide ja bargiide.” ₁₈Dasto čálli Šafan muitalii gonagassii ahte báhppa Hilkia lei addán sutnje girjji. Ja son logai girjji gonagassii.

₁₉Go Jošia gulai mii lágas daddjojuvvui, de son gaikkodii biktasiiddis. ₂₀Son dajai Hilkiai ja Šafana bárdnái Ahikamii, Mika bárdnái Abdonii, čálli Šafanii ja hoavvaolbmásis Asajai: ₂₁“Mannet jearrat Hearrás, maid gii galgat dahkat dál go dát girji lea gávdnon. Jerret dan mu beales ja oppa dan bázahasa beales mii vel lea Israelis ja Judas. Stuoris lea Hearrá moarri mii orru min badjelis, danin go min áhčit eai jeagadan Hearrá sáni eaige dahkan visot mii lea čállojuvvon dán girjái.”

₂₂Hilkia ja gonagasa olbmát manne profehtanisson Hulda lusa; su boadnjá lei bivttaslanja fákta Šallum, Tokhata bárdni, Hasra áddjut. Hulda ásai Jerusalema Ođđagávpogis. Go sii muitaledje sutnje mii sis lei áššin, ₂₃de son dajai sidjiide: “Ná cealká Hearrá, Israela Ipmil: ‘Dolvot olbmái gii vuolggahii din mu lusa, ₂₄dán Hearrá sáni: Mun divttán lihkuhisvuođa deaividit dán báikki ja dan ássiid. Mun ollašuhtán buot Juda gonagassii lohkkojuvvon girjjis namuhuvvon garuhusaid. ₂₅Sii leat hilgon mu ja cahkkehan oaffardola eará ipmiliidda, ja daiguin daguidisguin sii leat moaráhuhttán mu. Mu moarri lea cahkiidan dán báikki vuostá, iige dat čáskka.’ ₂₆Muhto go Juda gonagas vuolggahii din deike jearrat Hearrá dáhtu, de dadjet sutnje: Ná cealká Hearrá, Israela Ipmil: Don leat dál gullan duopmosániid. ₂₇Don ledjet vuollegaš ja vuolidit iežat Ipmila ovdii go gullet su sániid dán báikki ja dan ássiid vuostá. Don vuolidit iežat mu ovdii, don gaikkodit biktasiiddát ja čirrot mu muođuid ovddas. Dan dihte mungis lean guldalan du, cealká Hearrá. ₂₈Mun čohkken du áhčiidat lusa, ja don beasat hávdái ráfis. Don it dárbbaš oaidnit dan lihkuhisvuođa man mun divttán deaividit dán báikki ja dan ássiid.” Dán vástádusa sii bukte gonagassii.

₂₉Gonagas rávkkai čoahkkái buot Juda ja Jerusalema vuorrasiid. ₃₀Son manai Hearrá tempelii, ja oktan suinna buot Juda olbmát ja Jerusalema ássit, báhpat ja levilaččat ja oppa álbmot, sihke stuorrát ja smávvát. Son logai sin gullut buot mii Hearrá viesus gávdnon lihtugirjjis daddjojuvvui. ₃₁De gonagas čuoččastii sadjásis ja dagai lihtu Hearrá muođuid ovddas. Dan mielde sii galge čuovvut Hearrá ja oppa váimmus ja oppa sielus doallat su báhkkomiid, gohččumiid ja mearrádusaid. Nu sii deavddášedje dan, mii girjjis lei daddjojuvvon lihtu hárrái. ₃₂Son divttii buohkaid geat ledje čoahkkanan Jerusalemii, loaiddastit dan lihttui. Sii buohkat čatnasedje doallat Ipmila, áhčiideaset Ipmila, lihtu báhkkomiid. ₃₃Jošia jávkadii visot fasttes eahpeipmilgovaid buot israellaččaid guovlluin ja rávvii buot Israela ássiid bálvalit Hearrá, Israela Ipmila. Oppa su eallináiggis sii eai jorgalan eret Hearrás, áhčiideaset Ipmilis.