2. Muitalusaid girji 33

₁Manasse lei guoktenuppelotjahkásaš go šattai gonagassan, ja son ráđđii Jerusalemis vihttalogivihtta jagi. ₂Son dagai dan mii lea bahá Hearrá čalmmiin, ja anii seammá fasttes vieruid go dat álbmogat maid Hearrá lei duššadan israellaččaid ovddas. ₃Manasse huksii ođđasis oaffarbáikkiid maid su áhčči Hiskia lei gaikon, ceggii áltáriid Baal-ipmiliidda, dagai ašeračuolddaid ja rohkadalai ja bálvalii buot almmiveaga. ₄Son maid ráhkadii vieris ipmiliid áltáriid Hearrá tempelii, vaikko Hearrá lei cealkán: “Jerusalem lea mu nama ássanbáiki agálaččat.” ₅Hearrá viesu goappáge ovdašilljui son huksii áltáriid buot almmivehkii. ₆Manasse bijai bártniidis mannat Ben-Hinnoma leagis dola čađa, einnostalai, diiddastii ja noaiddástalai ja jearai neavvaga jábmiid vuoiŋŋaid mánideddjiin ja mearkačilgejeddjiin. Son dagai ollu dakkára mii lea bahá Hearrá čalmmiin, ja nu moaráhuhtii su. ₇Son dagahii eahpeipmilbácci ja ceggii dan Ipmila tempelii, vaikko Ipmil lei cealkán Davidii ja su bárdnái Salomoi: “Dán viesu ja Jerusalema mun lean válljen buot Israela čearddaid gávpogiin iežan nama ássanbáikin agálaš áigái. ₈Mun in goassege šat bija israellaččaid vádjolit guhkkin dan eatnamis maid adden sin áhčiide, jos sii fal dollet buot maid mun lean gohččon sin doallat, oppa mu lága ja buot mu báhkkomiid ja mearrádusaid maid sii leat ožžon Mosesa bokte.” ₉Manasse fillii Juda ja Jerusalema ássiid dahkat eambbo bahá go dat álbmogat maid Hearrá lei jávkadan israellaččaid ovddas.

₁₀Hearrá sártnui Manassei ja su álbmogii, muhto sii eai dáhtton gullat. ₁₁Danne Hearrá divttii Assyria gonagasa soahteoaivámuččaid fallehit sin. Sii válde Manasse fáŋgan, bidje su bronsaláhkkiide ja dolvo su Babylonii. ₁₂Heađistis son ánuhii árpmu Hearrás, Ipmilisttis, ja son vuolidii iežas áhčiidis Ipmila muođuid ovddas. ₁₃Go Manasse rohkadalai Ipmila, de Ipmil gulai su vuollegis átnuma ja divttii su máhccat Jerusalemii ja truvdnosis. Dalle Manasse ipmirdii ahte Hearrá lea Ipmil.

₁₄Maŋŋil Manasse huksii Davida gávpogii hui alla olggut muvrra mii manai Gihonis oarjjás, doppe ain leagi vieltti mielde Guollepoartta rádjái ja de birra Ofela. Buot Juda ladnegávpogiidda son bijai soahteoaivámuččaid. ₁₅Son jávkadii Ipmila tempelis vieris ipmiliid ja bácci maid lei dagahan, duššadii buot áltáriid maid lei huksen tempelvárrái ja eará sajiide Jerusalemii, ja gohčui bálkestit daid gávpoga olggobeallái. ₁₆Son divui Hearrá áltára, ja dan alde son oaffarušai searvevuođaoaffariid ja giittusoaffariid. Son gohčui Juda álbmoga bálvalit Hearrá, Israela Ipmila. ₁₇Álbmot dattetge oaffarušai ain oaffarbáikkiin, muhto dál aivvefal Hearrái, iežaset Ipmilii.

₁₈Mii muđui lea muitalit Manasse daguin, mo son rohkadalai iežas Ipmila ja maid oaidnit sárdno sutnje Hearrá, Israela Ipmila, nammii, lea čállojuvvon Israela gonagasaid muitalusaid girjái. ₁₉Dat mo su rohkadus gullojuvvui, muhto maiddái su suddu ja oskkáldasmeahttunvuohta ja dat báikkit gosa son ásahii oaffarbáikkiid ja ceggii ašeračuolddaid ja ipmilgovaid ovdal go vuollánii, lea čállojuvvon su oidniid muitalusaid girjái. ₂₀Manasse manai vuoiŋŋadit áhčiidis lusa ja hávdáduvvui iežas šloahta lahka. Su maŋŋil gonagassan šattai su bárdni Amon.

₂₁Amon lei guoktelogiguovttejahkásaš go šattai gonagassan, ja son ráđđii Jerusalemis guokte jagi. ₂₂Son dagai dan mii lea bahá Hearrá čalmmiin, nugo su áhčči Manasse lei dahkan. Amon oaffarušai buot daidda ipmilgovaide maid su áhčči Manasse lei ráhkadan, ja bálvalii daid. ₂₃Muhto son ii vuolidan iežas Hearrái, nugo su áhčči Manasse lei dahkan, muhto baicce lasihii iežas sivalašvuođa. ₂₄Su olbmát dahke lihtu su vuostá ja godde su su šlohttii. ₂₅Muhto Juda álbmot gottii buohkaid geat ledje dahkan lihtu gonagas Amona vuostá, ja dagai su maŋŋil gonagassan su bártni Jošia.