2. Muitalusaid girji 32

₁Maŋŋil go Hiskia lei ollašuhttán oskkáldasat buot dáid doaimmaid, de Assyria gonagas Sanherib fallehii Juda ja birastahttigođii ladnegávpogiid, vai beassá váldit daid. ₂Go Hiskia ipmirdii ahte Sanheriba ulbmilin lei fallehit Jerusalema, ₃de son ráđđádalai iežas oaivámuččaiguin ja offisearaiguin ahte galggašii buođđut ádjagiid mat ledje gávpoga olggobealde, ja sii dorjo su. ₄Ollu olbmot čoagganedje, ja sii buđđo buot ádjagiid ja dan jogaža mii golggai eatnama čađa. Sii dadje: “Dahkkot ná, vai Assyria gonagas ii gávnna ollu čázi go boahtá.” ₅Hiskia roahkasmuvai ja divui muvrras visot mii lei gaikojuvvon, bajidii toartnaid, huksii olggobeallái nuppi muvrra ja nannii Millo mii lea Davida gávpogis. Son duddjohii maid ollu vearjjuid ja galbbaid. ₆Son bijai álbmogii oaivámuččaid ja rávkkai sin lusas gávpotpoartta šilljui. Son arvvosmahtii sin ja dajai: ₇“Lehket roahkkadat ja gievrrat! Allet suorgan Assyria gonagasas ja su stuorra soahteveagas, danin go son gii lea min bealde, lea stuorit. ₈Assyria gonagasa fápmu lea olbmuid fápmu, muhto min bealde lea Hearrá, min Ipmil. Son veahkeha min ja soahtá min beales.” Hiskia, Juda gonagasa, sánit adde álbmogii roahkkatvuođa.

₉Go Assyria gonagas Sanherib lei ain soahteveagainis birastahttimin Lakiša, de son vuolggahii Jerusalemii olbmáid sárdnut Hiskiai, Juda gonagassii, ja buot Juda olbmuide dáinna lágiin: ₁₀“Ná cealká Sanherib, Assyria gonagas: ‘Masa dii dorvvastehpet, go áigubehtet báhcit Jerusalemii birastahttojuvvot? ₁₁Hiskia fille din ja áigu diktit din jápmit nealgái ja goikui go son dadjá ahte Hearrá, din ipmil, gádju din Assyria gonagasa gieđas. ₁₂Iigo Hiskia duššadan din ipmila oaffarbáikkiid ja áltáriid ja gohččon din, Juda ja Jerusalema ássiid, rohkadallat ovtta áidna áltára ovddas ja dan alde boaldit suovvasiid? ₁₃Ehpetgo dii dieđe maid mun ja mu áhčit leat dahkan buot eará eatnamiid álbmogiidda. Nagodedjego daid álbmogiid ipmilat gádjut eatnameaset mu gieđas? ₁₄Guhtemuš buot ipmiliin mat ledje dain álbmogiin maid mu áhčit leat duššadan, lea nagodan gádjut iežas álbmoga mu gieđas, go juo dii jáhkkibehtet ahte din ipmil nagoda gádjut din? ₁₅Allet divtte Hiskia beahttit ja fillet iežadet dan láhkái. Allet jáhke sutnje! Ii oktage ipmil guđege álbmogis dahje riikkas leat nagodan gádjut álbmogis mu ja mu áhčiid gieđas. Mo dalle din ipmil galggašii gádjut din?’” ₁₆Ja Sanheriba áirasat sárdno velá eambbo dakkáriid Hearrá, Israela Ipmila, vuostá ja su bálvaleaddji Hiskia vuostá. ₁₇Sanherib čálii maiddái reivve mas son bilkidii Hearrá, Israela Ipmila, ja celkkii: “Nugo iežá álbmogiid ipmilat eai nagodan gádjut iežaset álbmoga mu gieđas, de ii Hiskia ipmilge nagot gádjut iežas álbmoga.” ₁₈Áirasat čurvo dán alla jienain hebreagillii, vai suorggahivčče Jerusalema ássiid geat ledje gorgŋon muvrra ala, ja vai beasašedje váldit gávpoga. ₁₉Sii sárdno Jerusalema Ipmila birra seammá láhkái go eará eatnamiid ipmiliid birra, mat leat dušše olbmo gieđaid duojit.

₂₀Dalle gonagas Hiskia ja profehta Jesaja, Amosa bárdni, rohkadalaiga ja čuorvvuiga almmi guvlui. ₂₁Ja Hearrá vuolggahii eŋgela gii duššadii Assyria gonagasa soahtesiiddas juohke soahteolbmá, stuorrá ja soahteoaivámučča. Gonagas šattai máhccat eatnamasas heahpanemiin. Go son de oktii manai ipmilis vissui, de su iežas bártnit godde su mihkiin. ₂₂Nu Hearrá besttii Hiskia ja Jerusalema ássiid Assyria gonagasa Sanheriba ja buot eará vašálaččaid gieđas ja attii sidjiide ráfi juohke guovllus. ₂₃Eatnagat bukte Jerusalemii attáldagaid Hearrái ja divrras skeaŋkkaid Hiskiai, Juda gonagassii, ja buot álbmogat atne su alla árvvus.

₂₄Daid áiggiid Hiskia buohccái bahás ja lei juo lahka jámi. Son rohkadalai Hearrá, ja Hearrá vástidii su rohkadussii ja attii sutnje ovddolaš mearkka. ₂₅Hiskia ii goit lean giitevaš Hearrá buriid daguid dihte, muhto čeavllui. Dalle Hearrá moaráhuvai sutnje ja oppa Judai ja Jerusalemii. ₂₆Hiskia goit vuollánii, ja maiddái Jerusalema ássit vuollánedje, iige Hearrá moarri deaividan sin nu guhká go Hiskia elii.

₂₇Hiskia oaččui ollu riggodaga ja gudni. Son huksii alccesis dávvirgámmáriid silbba, golli, divrras geđggiid, hádjaávdnasiid, galbbaid ja eará divrras gálvvuid várás. ₂₈Son huksii maid vuorkkáid gortni, viinni ja oljju várás, ja oapmesujiid ja gárddiid oapmeealuidasas. ₂₉Son huksii gávpogiid ja skáhppui alccesis ollu smávvaomiid ja stuorraomiid. Ipmil attii sutnje hui stuorra opmodaga. ₃₀Hiskia lei dat gii buođui Gihonádjaga bajit suorggi ja bijai čázi golgat eatnama vuole Davida gávpoga oarjjabeallái. Hiskiai menestuvai buot maid son dagai, ₃₁nu maiddái dalle go Babylonia ráđđejeddjiid áirasat ledje boahtán su lusa gulaskuddat dan ovddolaš mearkka mii lei dáhpáhuvvan eatnamis. Dalle Ipmil divttii Hiskia dahkat su iežas miela mielde, muhto dušše danin vai beassá geahččalit su siskkimus jurdagiid.

₃₂Mii muđui lea muitalit Hiskias ja su vuoigatlaš daguin, lea čállojuvvon profehta Jesaja, Amosa bártni, oainnáhusaide Juda ja Israela gonagasaid girjái. ₃₃Hiskia manai vuoiŋŋadit áhčiidis lusa, ja son hávdáduvvui bajás vieltái Davida soga hávddiide. Oppa Juda álbmot ja buot Jerusalema ássit gudnejahtte su, go son jámii. Su maŋŋil gonagassan šattai su bárdni Manasse.