2. Muitalusaid girji 36

₁Eatnama álbmot dagai Joahasa, Jošia bártni, Jerusalemis gonagassan áhčis maŋŋil.

₂Joahas lei guoktelogigolmmajahkásaš go šattai gonagassan, ja son ráđđii Jerusalemis golbma mánu. ₃De Egypta gonagas heaittihii su gonagasvuođa ja bijai Juda máksit ráŋggáštusvearu, čuođi taleantta silbba ja taleantta golli. ₄Son dagai Juda ja Jerusalema gonagassan Joahasa vielja Eljakima ja molssui su nama Jojakimin. Joahasa Neko doalvvui Egyptii.

₅Jojakim lei guoktelogiviđajahkásaš go šattai gonagassan, ja son ráđđii Jerusalemis oktanuppelohkái jagi. Jojakim dagai dan mii lea bahá Hearrá, su Ipmila, čalmmiin. ₆Babylona gonagas Nebukadnesar vulggii soahtat suinna, bijai su láhkkiide ja doalvvui Babylonii. ₇Nebukadnesar doalvvui maid Hearrá tempela lihtiid ja bijai daid iežas tempelii. ₈Mii muđui lea muitalit Jojakimis ja su issoras daguin maidda son gávnnahuvvui sivalažžan, lea čállojuvvon Israela ja Juda gonagasaid girjái. Su maŋŋil šattai gonagassan su bárdni Jojakin.

₉Jojakin lei gávccinuppelotjahkásaš go šattai gonagassan, ja son ráđđii Jerusalemis golbma mánu ja logi beaivvi. Son dagai dan mii lea bahá Hearrá čalmmiin. ₁₀Jahkemolsumis gonagas Nebukadnesar vieččahii su ja ollu Hearrá tempela divrras lihtiid Babylonii. Juda ja Jerusalema gonagassan son dagai Jojakina vielja Sidkia.

₁₁Sidkia lei guoktelogiovttajahkásaš go šattai gonagassan, ja son ráđđii Jerusalemis oktanuppelohkái jagi. ₁₂Son dagai dan mii lea bahá Hearrá, su Ipmila, čalmmiin iige vuollánan, vaikko profehta Jeremia sártnui sutnje, maid Hearrá lei gohččon. ₁₃Sidkia maid stuimmáskii gonagas Nebukadnesara vuostá, vaikko lei Ipmila bokte vurdnon sutnje oskkáldasvuođa. Son lei gážžár ja buoššudii váimmus iige jorgalan Hearrá, Israela Ipmila, beallái. ₁₄Maiddái buot álbmoga njunnošat, báhpat ja álbmot hilgo Hearrá, atnigohte eará álbmogiid fasttes vieruid ja dahke buhtismeahttumin Jerusalema tempela, maid Hearrá lei basuhan alccesis. ₁₅Hearrá, sin áhčiid Ipmil, várrii sin eatnat gerddiid áirasiiddis bokte, danin go son dáhtui seastit iežas álbmoga ja viesu. ₁₆Muhto olbmot bilkidedje Ipmila áirasiid, badjelgehčče su sániid ja hiddjidedje su profehtaid, dassá go Hearrá moarri álbmogasas šattai nu stuorisin ahte dat ii lean šat doalaheames.

₁₇Dalle Hearrá divttii Babylonia gonagasa fallehit Juda ássiid. Nebukadnesar gottii sin nuorra olbmáid tempelis, son ii seastán nuorra olbmáid iige nieiddaid, ii vuorrasiid iige čurgesvuovttagiid. Buohkat addojuvvojedje Nebukadnesara gihtii. ₁₈Ja buot tempela lihtiid, smávva ja stuorra lihtiid, tempela dávviriid ja gonagasa ja su oaivámuččaid dávviriid gonagas doalvvui Babylonii. ₁₉Kaldealaččat bolde Ipmila tempela, gaiko Jerusalema muvrra, buolláhedje buot gávpoga ladniid ja duššadedje dan divrras dávviriid.

₂₀Son doalvvui fáŋgan Babylonii dan bázahusa mii lei vealtan miehkis. Doppe sii ledje su ja su maŋisbohttiid šlávvan gitta dassážii go persialaš riika šattai – ₂₁vai ollašuvašii Hearrá sátni maid Jeremia lei sárdnon – ja gitta dassážii go eanan lei duohpan doalakeahtes sabbahiiddis. Oppa áiggi go eanan lei ávdin, das lei sabbat, dassážii go čiežalogi jagi ledje vássán.

₂₂Persia gonagasa Kyrosa vuosttaš ráđđenjagi Hearrá bijai Kyrosii jurdaga addit almmuhusa – vai ollašuvašii dat sátni maid Hearrá lei sárdnon Jeremia bokte – ja son gulahii miehtá riikkas, njálmmálaččat ja čálalaččat: ₂₃“Ná cealká Kyros, Persia gonagas: Hearrá, almmi Ipmil, lea addán munnje buot eatnama riikkaid, ja son lea gohččon mu hukset alccesis viesu Jerusalemii Judas. Dii buohkat geat gullabehtet su álbmogii, galgabehtet vuolgit dohko. Vare Hearrá, din Ipmil, livččii dinguin!”