Apostala vuoigatvuođat
1Almma mun lean friddja? Almma mun lean apostal? Almma mun lean oaidnán Hearrámet Jesusa? Almma dii lehpet boađus mu barggus maid lean bargan Hearrá bálvalusas? 2Jos mun in leat apostal earrásiidda, de din apostal mun goit lean. Diihan lehpet seaila mii nanne dan ahte mun lean Hearrá apostal.
3Ná mun bealuštan iežan daid ovddas geat árvvoštallet mu: 4Almma mis lea vuoigatvuohta oažžut borramuša ja juhkamuša? 5Almma mis lea vuoigatvuohta váldit mátkkiidasamet áhká, oskkuoappá, nugo dahket eará apostalat ja Hearrá vieljat ja Kefas? 6Duššefal mus ja Barnabasisgo ii leat vuoigatvuohta orrut barggakeahttá? 7Almma ii oktage bálval soalddáhin iežas goasttádusain? Almma dat gii gilvá viidnegárddi, maiddái borrá dan šaddosiid? Ja almma dat gii geahččá omiid, maiddái juhká daid mielkki?
8Sártnungo mun dál dušše olbmuid láhkái? Almma láhkage cealká seammá? 9Mosesa lágas daddjojuvvo: Ale čana vuovssá njálmmi go dat lea ráidnemin gortni. Leago Ipmil dás atnimin ávvira vuovssáin? 10Almma son dadjá dan min dihte? Min dihtehan lea čállojuvvon ahte dat gii jorgu eatnama ja dat gii ráidne gortniid, galgá dahkat nu dan doaivvus ahte oažžu iežas oasi. 11Go moai letne gilván didjiide vuoiŋŋalaš buriid, de leago dalle menddo ollu jos moai láddješeimme dis áiggálaš buriid? 12Jos earáin lea vuoigatvuohta oažžut dis juoidá, de almma munnos vel eambbo? Moai ean dattetge leat atnán dán vuoigatvuođa, muhto girde buot, amame hehttet Kristusa evangeliuma.
13Ehpet go dii dieđe ahte sii geat bálvalit tempelis, ožžot tempelis ealáhusaset, ja sii geat bálvalit áltáris, ožžot oasi das mii oaffaruššojuvvo? 14Seammá láhkái Hearrá lea mearridan ahte dat geat sárdnidit evangeliuma, galget oažžut ealáhusa evangeliumis. 15Muhto mun in leat geavahan ovttage dáin vuoigatvuođain, inge mun čále danin go livččen daid gáibideamen. Ovdal mun vaikko jámášin, dasgo ii oktage sáhte váldit mus eret dan rámi. 16Dat ahte mun sárdnidan evangeliuma ii leat munnje rápmin, danin go dat lea mu geatnegasvuohta. Vuoi mu, jos in sárdnit evangeliuma! 17Jos mun dagan dan iežan friddja dáhtus, de munnje gullá bálká. Muhto jos mun in daga dan iežan dáhtus, de mun dušše doaimmahan barggu mii lea munnje oskkilduvvon. 18Mii lea dalle mu bálká? Dat ahte mun sárdnidan evangeliuma almmá bálkká haga inge ane daid vuoigatvuođaid mat gullet evangeliuma sárdnideaddjái.
19Vaikko mun lean friddja inge leat geange vuollásaš, de mun lean riepman buohkaid šlávvan, vai vuoittán Kristusii nu eatnagiid go vejolaš. 20Juvddálaččaide mun lean leamaš dego juvddálaš, vai vuoittán juvddálaččaid; daidda geat ellet lága vuložin, mun lean leamaš dego lága vuloš, vai vuoittán sin, vaikko in leatge lága vuloš. 21Daidda geat ellet almma lága haga, mun lean leamaš dego ealášin almma lága haga, vai vuoittán sin, vaikko in leatge almma Ipmila lága haga – mushan lea Kristusa láhka. 22Rašis olbmuide mun lean leamaš rašši, vai vuoittán rašis olbmuid. Buohkaide lean leamaš buot, vai beasttán juobe muhtumiidge. 23Buot dán mun dagan evangeliuma dihte, vai iešge lean das oasálaš.
24Almma diehtibehtet ahte vaikko viehkangilvvus buohkat vihket, de dušše okta oažžu bálkkašumi? Vihket dalle nu ahte dan vuoitibehtet! 25Juohke gilvvohalli atná meari juohke dáfus, viehkkit vai ožžot nohkavaš vuoitogierddu, miigis vai oažžut nohkameahttun vuoitogierddu. 26Mun in nappo viega sahtedohko inge čorpmadettiin fáippo áibmui. 27Mun bagadan iežan rupmaša ja bággen dan jeagadit, vai mun gii lean rávkan gilvui earáid, in ieš loahpas hilgojuvvo.
