1. Korinta 8

₁Go lea sáhka eahpeipmiliidda oaffaruššojuvvon bierggus, de dan áššis mis buohkain lea diehtu. Diehtu čeavluda, muhto ráhkisvuohta duddjo buori. ₂Jos muhtin navdá diehtit juoidá, de sus ii vel leat albma diehtu. ₃Muhto gii ráhkista Ipmila, su Ipmil dovdá.

₄Go lea sáhka das ahte oažžut borrat bierggu mii lea oaffaruššojuvvon eahpeipmiliidda, de mii diehtit ahte máilmmis ii leat oktage eahpeipmil iige oktage eará Ipmil go dat áidna okta. ₅Jos vel leatge ipmilat almmis ja eatnama alde – ja leat gal ollu ipmilat ja ollu hearrát – ₆de mis lea dušše okta Ipmil, Áhčči. Sus boahtá buot, ja mii leat su várás. Mis lea dušše okta Hearrá, Jesus Kristus. Son lea sivdnidan buot, ja mii eallit su bokte.

₇Muhto ii buohkain leat dát diehtu. Go muhtumat dán rádjái leat hárjánan bálvalit eahpeipmiliid, de sii borret bierggu namalassii oaffarbiergun, ja sin rašis oamedovdu duolvá. ₈Muhto ii borramuš doalvvo min lagabui Ipmila. Mii eat šatta buorebun jos borrat, eatge heajubun jos eat bora. ₉Muhto váruhehket vai din friddjavuohta ii šatta jorralussan rašis olbmuide! ₁₀Jos du rašis viellja oaidná du geas lea dát diehtu, boradeamen eahpeipmila tempelis, de almma dalle su oamedovdu oažžu das doarjaga ja roahkasmahttá sunai borrat oaffarbierggu? ₁₁Ná du diehtu doalvu hevvui rašis olbmo, du iežat vielja gean ovddas Kristus lea jápmán. ₁₂Go dii dán láhkái suddudehpet vieljaideattet vuostá ja hávváduhttibehtet sin rašis oamedovddu, de dii suddudehpet Kristusa vuostá. ₁₃Dan dihte: Jos borramuš vearránahttá mu vielja, de mun in šat goassege bora bierggu, aman vearránahttit iežan vielja.