1. Korinta 5

₁Mun lean gullan ahte din gaskkas lea fuorrávuohta, ja velá dakkár mii ii leat báhkiniid gaskkasge: Muhtun eallá eadnebeliinis. ₂Ja dii vel goarggastallabehtet, vaikko galggašeiddet baicca moraštit ja ádjit iežadet searvvis eret dan gii dahká dakkáriid. ₃Vaikko mun rumašlaččat in leat din luhtte, de mun lean din luhtte vuoiŋŋas ja lean juo cealkán duomu sivalažžii, dego mun livččen dieppe. ₄Go dii čoahkkanehpet Hearrámet Jesusa nammii, ja mun lean dinguin vuoiŋŋas ja Hearrámet Jesusa fápmu lea das, ₅de addet dan olbmo Sáhtánii ja diktet su rupmaša duššat, vai su vuoigŋa bestojuvvo Hearrá beaivvi.

₆Din rápmi ii leat buorre. Almma dii diehtibehtet ahte uhca suvrradáiggáš suvruda oppa dáiggi? ₇Čorgejehket eret boares suvrradáiggi, vai šaddabehtet ođđa dáigin. Diihan lehpet suvrutkeahttájat, min beassášláppis Kristus lea juo njuvvojuvvon. ₈Dollot nappo basiid, allot dakkárin geaid bahávuohta ja suddu leat suvrudan, muhto buhtisvuođa ja duohtavuođa suvrutkeahtes láibin.

₉Mun čállen didjiide ahte dis ii oaččo leat mihkkege dahkamušaid furrošeddjiiguin. ₁₀In mun oaivvildan dán máilmmi furrošeddjiid inge ruhtaváibmiliid, rievváriid inge eahpeipmilbálvaleddjiid, danin go dallehan dii fertešeiddet vuolgit máilmmis eret. ₁₁Mun oaivvildin ahte dis ii oaččo leat mihkkege dahkamušaid dakkár olbmuin gii gohčoduvvo vielljan, muhto gii lea furrošeaddji, ruhtaváibmil, eahpeipmilbálvaleaddji, bilkár, juhkki dahje suola. Allet oppa boratge ovttas dakkár olbmuin. ₁₂Ii suige mu ášši leat dubmet olggobealolbmuid? Almma diige dubmebehtet dušše daid geat gullet din iežadet searvái? ₁₃Daid geat leat olggobealde, dubme Ipmil. Ádjet eret luhtádet dan gii lea bahá.