1. Korinta 6

₁Go dis soapmásis lea ášši guoimmis vuostá, de mo son jolggada lágastit báhkiniid ovddas? Manne son ii divtte bassi olbmuid čoavdit ášši? ₂Almma diehtibehtet ahte bassi olbmot oktii dubmejit máilmmi? Jos dii oažžubehtet dubmet máilmmi, de almma dii dalle máhttibehtet čoavdit smávva áššiid? ₃Almma diehtibehtet ahte mii oktii dubmet velá eŋgeliidge – manne mii dalle eat máhtáše čoavdit beaivválaš áššiid? ₄Muhto go dis leat dakkár beaivválaš áššit, de dii váldibehtet duopmárin olbmuid geaid searvegoddi ii ane árvvus. ₅Seađášeiddet heahpanit! Iigo din iežadet searvvis leat oktage viissis gii máhtášii čoavdit vieljažiid ášši? ₆Muhto viellja lágasta vieljas vuostá, velá eahpeoskkolaččaid ovddas. ₇Datge lea didjiide heahpadin go dis leat diggeáššit guhtet guimmiideattetguin. Manne ehpet baicca gillá veriid? Manne ehpet baicca vuoittáhala nubbái? ₈Muhto dál dii verrošehpet ja váldibehtet earáin, velá iežadet vieljainge. ₉Almma diehtibehtet ahte vuoigatmeahttun olbmot eai árbe Ipmila riikka? Allet čádjádala! Ipmila riikka eai árbe furrošeaddjit eaige eahpeipmiliid bálvaleaddjit, eai náittosrihkkut, eai olbmát geat veallájit olbmáiguin, ₁₀eai suollagat eaige ruhtaváibmilat, eai juhkkit, bilkárat eaige rievvárat. ₁₁Dii leiddet ovdal dakkárat, muhtumat dis, muhto dál dii lehpet bassojuvvon buhtisin ja dahkkojuvvon bassin ja vanhurskkisin Hearrá Jesus Kristusa nammii ja min Ipmila Vuoiŋŋa fámuin.

₁₂Buot lea munnje lobálaš, muhto ii buot leat ávkkálaš. Buot lea munnje lobálaš, muhto in mun oaččo diktit mange ráđđet iežan. ₁₃Borramuš lea čoavjji várás ja čoavji borramuša várás, muhto Ipmil dahká duššin goappašagaid. Rumaš ii leat furrošeami várás muhto Hearrá várás, ja Hearrá lea rupmaša várás. ₁₄Ipmil lea čuoččáldahttán jábmiid luhtte Hearrá ja čuoččáldahttá fámuinis minge. ₁₅Almma diehtibehtet ahte din rupmašat leat Kristusa rupmaša lahtut? Riemašingo mun dalle dahkat Kristusa lahtuid fuorá lahttun? In goassege! ₁₆Almma diehtibehtet ahte dat gii ovttastuvvá fuoráin, šaddá oktan rumašin suinna? Lea celkojuvvon: Dat guovttis šaddaba oktan oažžin. ₁₇Muhto dat gii ovttastuvvá Hearráin, šaddá suinna oktan vuoigŋan.

₁₈Báhtarehket furrošeamis! Buot eará suttut maid olmmoš dahká, leat rupmaša olggobealde, muhto furrošeaddji sudduda iežas rupmaša vuostá. ₁₉Almma diehtibehtet ahte din rumaš lea Bassi Vuoiŋŋa tempel? Dán Vuoiŋŋa Ipmil lea addán ássat din siste. Dii ehpet gula alcceseattet. ₂₀Ipmil lea oasttán din ja haddi lea máksojuvvon. Gudnijahttet dan dihte Ipmila din rupmašiin.