1. Korinta 4

₁Atnet min nappo Kristusa bálvaleaddjin ja Ipmila čiegusvuođaid dállodoallin. ₂Das gean háldui juoga lea oskkilduvvon, gáibiduvvo oskkáldasvuohta. ₃Munnje gal lea seammá, dubmehalango mun didjiide vai dubmego mu muhtin olbmuid duopmostuollu. In mun iešge dubme iežan. ₄Mu oamedovdu lea buhtis, muhto in mun dan dihte vel leat gávnnahuvvon sivaheapmin. Mu duopmár lea Hearrá. ₅Allet dan dihte dubme ovdal áiggi, ovdal go Hearrá boahtá. Son čuvge seavdnjadasa čiegáid ja buktá ovdan váimmuid jurdagiid, ja dalle iešguhtege oažžu rámi Ipmilis.

₆Vieljat, mun lean atnán iežan ja Apollosa ovdamearkan, vai oahppabehtet áddet maid dát sánit mearkkašit: “Duhtet dasa mii lea čállojuvvon.” Allet nappo čeavláivuođain čuožžil nubbi nuppi vuostá. ₇Gii dutnje addá buoretvuođa earáid ektui? Mii dus lea maid it leat ožžon? Jos don dalle leat ožžon visot, de manne don čeavllástalat dego don ieš livččet dan ánssášan? ₈Dii gusto lehpet juo gallánan, dii lehpet riggon, dii lehpet juo šaddan gonagassan, muhto mii eat. Vare dii livččiidetge gonagasat, vai miigis beasašeimmet ráđđet gonagassan dinguin! ₉Ipmil lea gusto bidjan min apostaliid buot heajumussan: Mii leat dego jápmimii dubmejuvvon olbmot; mii leat šaddan oppa máilmmi geahčadeamušin, eŋgeliid ja olbmuid. ₁₀Mii leat jallat Kristusa dihte, dii lehpet viisát Kristusis. Mii leat heajut, dii lehpet gievrrat. Olbmot gudnejahttet din, min badjelgehččet. ₁₁Velá dán bottu rádjáige mii leat nealggis ja goikkus, mii vádjolit bealleálásin, mii illastuvvot iige mis leat orrunsadji, ₁₂mii háhkat eallámuša iežamet gieđaid rahčamiin. Mii hiddjiduvvot, muhto mii buressivdnidit. Mii doarrádallojuvvot, muhto mii gierdat. ₁₃Mii bilkiduvvot, muhto mii vástidit ustitlaččat. Gitta dássážii mii leat adnojuvvon oppa máilmmi hilggohassan, buohkaid suohpahassan.

₁₄In mun čále dán danin go dáhtun heahppášuhttit din, muhto vai beasan nevvodit din nugo iežan ráhkis mánáid. ₁₅Dasgo vaikko dis livčče logiduhát oahpaheaddji Kristusis, de dattetge dis eai leat máŋga áhči. Mun dat šadden din áhččin Kristus Jesusis evangeliuma bokte. ₁₆Mun neavvun din atnit mu ovdamearkan.

₁₇Dan dihte mun lean vuolggahan din lusa Timoteusa, iežan ráhkis ja oskkáldas bártni Hearrás. Son muittuha didjiide mu njuolggadusaid das mo eallit Kristus Jesusis ja maid mun oahpahan juohke báikkis buot searvegottiin. ₁₈Muhtumat dis leat čevlon ja gáddet ahte mun in oppa máhcage din lusa. ₁₉Muhto mun boađán fargga, jos Hearrá dáhttu, ja dalle mun áiggun diđoštit daid čeavllástalliid fámu. Sin sániin mun in beroš, ₂₀dasgo Ipmila riika eai leat sánit, muhto fápmu. ₂₁Goappá sihtabehtet? Boađángo mun din lusa rissiin vai ráhkisvuođain ja láđisvuođain?