1. Korinta 3

₁Vieljat, mun in sáhttán sárdnut didjiide nugo vuoiŋŋalaš olbmuide, muhto nugo ferte sárdnut daidda geaid sin iežas boares luondu hálddaša, daidda geat Kristusa dovdamis leat ain njuoratmánát. ₂Mun adden didjiide mielkki juhkat, in addán garra borramuša, dasgo dan dii ehpet gierdan. Dii ehpet gierdda dan velá dálge, ₃danne go dis lea ain din boares luondu. Go dis lea gáđašvuohta ja riidu, de dallehan din boares luondu hálddaša din ja dii eallibehtet nugo olbmot juo lávejitge. ₄Go okta dadjá: “Mun lean Paulusa beale”, nubbigis: “Mun lean Apollosa beale”, de almma dii dalle lehpet nugo olbmot juo lávejitge? ₅Mii Apollos lea? Nabai Paulus? Soai leaba bálvaleaddjit geat oahpisteigga din oskut, goappašagat dan doaimmas maid Hearrá lea sudnuide addán. ₆Mun gilven, Apollos láktadii, muhto Ipmil attii šattu. ₇Dan dihte gilvi ii leat mihkkege iige láktadeaddjige, muhto visot lea Ipmila gieđas, son addá šattu. ₈Gilvi ja láktadeaddji leaba ovtta barggus, muhto goappašagat oažžuba bálkká dan mielde maid bargaba. ₉Mii leat Ipmila bargoguoimmit, dii lehpet Ipmila bealdu ja Ipmila viessu.

₁₀Dan árpmu mielde maid lean ožžon Ipmilis, mun lean dasto čeahpes huksejeaddji láhkái bidjan vuođu man ala muhtun eará hukse. Muhto gehččos juohkehaš, mo hukse. ₁₁Dasgo ii oktage sáhte bidjat eará vuođu go dan mii lea biddjojuvvon, ja dat lea Jesus Kristus. ₁₂Jos muhtun hukse dan vuođu ala gollis, silbbas, divrras geđggiin, muoras, suinniin dahje oalggain, ₁₃de áigi čájeha mo iešguhtege lea huksen. Duopmobeaivi buktá dan albmosii: Dat beaivi almmustuvvá dolas, ja dolla geahččala maid iešguhtege lea olahan dahkat. ₁₄Dat gean dagut bissot, oažžu bálkká. ₁₅Dat gean dagut bullet, gillá vahága. Son ieš bestojuvvo, almmatge dego dola čađa.

₁₆Almma diehtibehtet ahte dii lehpet Ipmila tempel ja ahte Ipmila Vuoigŋa ássá din siste? ₁₇Jos muhtin bilida Ipmila tempela, de Ipmil dagaha heavu sutnje. Ipmila tempel lea bassi, ja dii lehpet dat tempel.

₁₈Allos oktage behtto iežas. Jos muhtin dis gáddá iežas viissisin dán máilmmis, son ferte vuos šaddat jallan, vai šaddá viissisin. ₁₉Dasgo dán máilmmi viisodat lea oainnat jallodat Ipmila čalmmiin. Lea čállojuvvon: Son giellá viisáid sin iežaset gávvilvuhtii, ja vel: ₂₀Hearrá dovdá viisáid jurdagiid, son diehtá daid duššálažžan. ₂₁Allos dan dihte oktage rámádallo olbmuin. Dasgo buot gullá didjiide: ₂₂Paulus, Apollos ja Kefas, máilbmi, eallin ja jápmin, dálážat ja boahttevaččat. Buot dat lea din, ₂₃muhto dii lehpet Kristusa, ja Kristus lea Ipmila.