Matteus 26

₁Ko Jeesus lâi sárnum puoh taam, sun eeđâi máttááttâspárnáidis: ₂»Kyevti peeivi keččin, tego tietivetteđ, laa pessijááh. Talle Ulmuu Alge adeluvvoo riistânnavliimân.»

₃Siämmáá ääigi čokkânii alemuuh paapah já aalmug puárásumoseh ollâpappâ Kaifas palaccân ₄ráđádâllâđ, magaráin juonáin sij uážuččii Jeesus kiddâ já puávtáččii koddeđ suu. ₅»Ij kuittâg koskân juhle», sij ettii, »amas aalmug stuimáskiđ.»

₆Ko Jeesus lâi Betaniast spiitaal puoccâm Simmoon táálust, ₇te suu kuuvl poođij nissoon, kiäst lâi alabasterputtâlist hirmâd tivrâs opsâoljo. Ko Jeesus čokkái peevdist, nissoon kulgâttij oljo suu uáiván. ₈Mut ko máttááttâspárnááh oinii tom, sij paaduvvii já ettii: »Maggaar tuhledem! ₉Ličijhân tom puáhtám vyebdiđ šiev haadan já adeliđ ruuđâid kievhijd.»

₁₀Jeesus huámášij taam já eeđâi sijjân: »Mondiet tij nievridvetteđ nissoon mielâ? Sun toovâi munjin šiev tavo. ₁₁Kievhih tist láá ain tii kulen, mut mun jiem lah ain tii kulen. ₁₂Ko sun vuoidâi muu, tot tábáhtui muu hävdidem várás. ₁₃Tuođâi: jyehi saajeest maailmist, kost ihenis evaŋgelium saahâ kulluuttuvvoo, mušteh meiddei taam nissoon já muštâleh, maid sun toovâi.»

₁₄Talle ohtâ kyevtnubálov máttááttâspárnáást, Juudas Iskariot, moonâi ollâpaapâi kuuvl ₁₅já eeđâi: »Ennuv-uv tij mäksivetteđ munjin, jis mun toimâttâm suu tii kieđáid?» Sij soppii suin kuulmâlov silbâruuđâst. ₁₆Tastmaŋa sun usâškuođij vuovâs mudo kävildiđ Jeesus.

₁₇Suvrodhánnáá leeibi juhle vuosmuu peeivi máttááttâspárnááh pottii Jeesus kuuvl já koijâdii: »Kuus tun táátuh mii valmâštiđ tunjin pessijâšmálásijd?» ₁₈Jeesus eeđâi: »Moonnâđ kaavpugân.» Sun ravvij, kiän kuuvl sij kolgii tobbeen moonnâđ já kočoi ettâđ taas: »Máttáátteijee iätá: ’Muu äigi lii alda. Tuu kulen mun puurâm pessijâšmálásijd máttááttâspárnáidânguin.’» ₁₉Máttááttâspárnááh porgii tego Jeesus lâi koččom já sij valmâštii pessijâšmálásijd.

₂₀Ko eehid šoodâi, te Jeesus čokánij piävdán suu kyevtnubálov máttááttâspárnáin. ₂₁Puurâddijnis sun eeđâi: »Tuođâi: ohtâ tist šadda kävildiđ muu.» ₂₂Murâšmieláin sij algii kyeimi kyeimis maŋa koijâdâllâđ: »Hiärrá, jiemhân tot lah mun?» ₂₃Jeesus västidij sijjân: »Muu käävild almai, kote porá siämmáá litteest ko mun. ₂₄Ulmuu Alge vuálgá meddâl eidu nuuvt ko čalluin sust iättoo, mut vuoi tom, kiäst šadda Ulmuu Alge kävildeijee! Ton ulmui ličij pyereeb, et sun ij liččii šoddâmgin.» ₂₅Talle Juudas, suu kävildeijee, koijâdij: »Rabbi, jiemhân tot lah mun?» »Jiešpa tun tom ettih», västidij Jeesus.

₂₆Purâdem ääigi Jeesus vaaldij leeibi, sivnedij, tojâlij já adelij tom máttááttâspárnáidis já eeđâi: »Väldiđ já puurrâđ, taat lii muu ruumâš.» ₂₇Talle sun vaaldij kaalhâ, kiijtij Immeel, adelij sijjân já eeđâi: »Juuhâđ täst, tij puohah. ₂₈Taat lii muu vorrâ, lito vorrâ, mii puohâi peeleest kulgâttuvvoo sudoi addâgâsadelem tiet. ₂₉Já mun eeđâm tijjân: tästmaŋa jiem smakkii viiniponnjoos adalduv ovdil ko ton peeivi, kuás mun juuvâm uđđâ viini tiiguin Iäččán väldikoddeest.»

₃₀Ko sij lijjii lávlum kijttosaalmâ, sij vuolgii Oljováárán. ₃₁Talle Jeesus eeđâi sijjân: »Taan iijâ tij puohah luopâvetteđ must, tastko lii čallum: ’Mun časkam paimân enâmân, já čage saavzah pieđgâneh.’ ₃₂Mut maŋeláá ko mun lam pajanâm jämimist, mun moonâm tii ovdiibeln Galilean.» ₃₃Piättár koskâldutij suu já eeđâi: »Veik puohah iäráseh luovâččii tust, te mun jiem kuássin luovâ.» ₃₄Jeesus västidij: »Tuođâi: taan iijâ, ovdilgo käniores piško, tun kulmii kiäldáh muu.» ₃₅Piättár eeđâi: »Veik mun kolgâččim tuin jäämmiđ, te mun jiem kuássin tuu kieldi.» Siämmáá oskottii eres-uv máttááttâspárnááh.

₃₆Talle Jeesus poođij máttááttâspárnáiguin Getsemane-nommâsii sajan já eeđâi sijjân: »Pääcciđ tij taas tassaažân ko mun iälám tyebbin ruhâdâlmin.» ₃₇Piättár já kuohtuid Sebedeus oolgijd sun vaaldij fárusis. Muurâš aatâštškuođij tääl suu, já sun šoodâi tooskán. ₃₈Sun eeđâi sijjân: »Mun lam stuorrâ toskeest, jäämmim toske vyelni. Vyerdiđ täst já kocceeđ muin.» ₃₉Sun moonâi váhá olgoláá, leggistâđâi komolâs enâmân já ruhâdâlâi: »Eeči, jis tot lii máhđulâš, te manos taat kalkkâ muu lappâd. Mut ij tego mun táátum, mut nuuvtko tun táátuh.»

₄₀Sun maacâi máttááttâspárnái kuuvl já kaavnâi sii uáđimin. Talle sun eeđâi Piätárân: »Eppeđ-uv tij uánihis áigáágin vaijaam kocceeđ muin? ₄₁Kocceeđ já ruhâdâllâđ, amas tij šoddâđ kivsádâsân. Táttu ulmust lii, mut luándu lii hiäju.»

₄₂Sun moonâi oppeet olgoláá já ruhâdâlâi nube keerdi: »Eeči, jis taat kalkkâ ij pyevti moonnâđ muu lappâd nuuvt et mun jiem juuvâ tom, te šados tuu táttu.» ₄₃Maassâd puáđidijnis sun kaavnâi oppeet máttááttâspárnáid uáđimin, tastko naver lâi tediškuáttám sii čoolmijd. ₄₄Sun kuođij sii toos, moonâi oppeet olgoláá já ruhâdâlâi kuálmád keerdi siämmái sanijguin. ₄₅Talle sun poođij máttááttâspárnái kuuvl já eeđâi sijjân: »Vala-uv tij uáđivetteđ já vuoiŋâstvetteđ? Äigi lii puáttám. Ulmuu Alge adeluvvoo suddogâsâi kieđáid. ₄₆Čyežžiliđ, tääl mij vyelgip! Muu kävildeijee lii jo alda.»

₄₇Ko Jeesus lâi vala sárnumin, poođij Juudas, ohtâ suu kyevtnubálov máttááttâspárnáást, já oovtâst suin miehijguin já karbâiguin stuorrâ almaijuávkku, mon ollâpaapah já aalmug puárásumoseh lijjii vuolgâttâm. ₄₈Jeesus kävildeijee lâi sooppâm almaiguin meerhâst: »Tot lii tot almai, kiäm mun cummâlâm. Väldiđ suu kiddâ.» ₄₉Sun moonâi njuolgist Jeesus kuuvl já eeđâi: »Tiervâ, rabbi!», já cummâlij suu. ₅₀Jeesus eeđâi sunjin: »Ustev, taan tiet tun lah puáttám.» Talle almaah lävkkejii aldeláá, valdii Jeesus kiddâ já fäŋgejii suu.

₅₁Ohtâ Jeesus čuávvoin vuástálistškuođij, ruttij miehis já čooskij ollâpaapâ palvâleijee nuuvt, et täst luovânij pelji. ₅₂Talle Jeesus eeđâi sunjin: »Piejâ miähád tuupân. Kote miehi tuáppee, tot miäkán virá. ₅₃Jurdáh-uv tun, et mun jiem puávtáččii pivdeđ iše Ejistân? Sun vuolgâttičij teehin tállân kyehtnubáloh legioonad eŋgâlijd já eenâb-uv. ₅₄Mut maht talle olášuuččii čalluuh, moi mield näävt kalga tábáhtuđ?»

₅₅Jeesus eeđâi talle almaijuávkun: »Tijhân leppeđ vuálgám tego riävvár vuástá! Miehih já kaarbah kieđâin tij puátivetteđ muu faŋgiđ. Mun lam jyehi peeivi čokkám temppâlist máttátmin, eppeđge tij lah váldám muu kiddâ. ₅₆Mut puoh taat lii tábáhtum, vâi profetij čalluuh olášuuččii.»

Talle puoh máttááttâspárnááh kuođđii suu já patârii.

₅₇Fäŋgejeijeeh tolvuu Jeesus ollâpappâ Kaifas kuuvl, kuus laavâmáttáátteijeeh já aalmug puárásumoseh lijjii čokkânâm. ₅₈Piättár čuávui suu määđhi keččin ollâpaapâ šiljo räi. Tobbeen sun čokánij palvâlâsjuávkun, vâi uáináččij, maht puoh nuvâččij.

₅₉Ollâpaapah já ubâ rääđi uccii Jeesus vuástá puástutuođâštâs, mon vuáđuld sij puávtáččii koddeđ suu. ₆₀Taggaar ij kuittâg kavnum, veik maaŋgah puástutuođâšteijeeh pottii. Viijmâg poođijn almaakyevtis, ₆₁kiäh naggijn, et Jeesus lâi ettâm: »Mun puávtám pieđgiđ Immeel temppâl já huksiđ tom oppeet kuulmâ peeivist.» ₆₂Talle ollâpappâ pajanij sajestis já koijâdij: »Jieh-uv tun ollágin västid sii sujâttâssáid?» ₆₃Mut Jeesus oroi joskâ. Talle ollâpappâ eeđâi sunjin: »Mun vuárnuttâm tuu ellee Immeel noomâst: eeđâ mijjân, lah-uv tun Messias, Immeel Alge?» ₆₄»Jiešpa tun tom ettih», Jeesus västidij. »Já mun eeđâm tijjân: tästmaŋa tij uážžuvetteđ uáiniđ Ulmuu Alge čokkáámin Vyeimi uálgispeln já puátimin alme poolvâi alne.» ₆₅Talle ollâpappâ kiškettij pihtâsis já eeđâi: »Sun pilkked Immeel. Maid mij innig tuođâšteijeid tarbâšep! Kuulâidhân, maht sun pilkkedij. ₆₆»Maid tij juurdâšvetteđ?» Sij västidii: »Sun lii ánsášâm jäämmim.»

₆₇Sij čulgii tääl Jeesus muáđoid já caimii suu. Motomeh toškâlii suu nierân ₆₈já pilkkedii: »Ennust, Messias, eeđâ, kii tuu caaimij!»

₆₉Piättár čokkái olgon šiljoost. Suu kuuvl poođij pijgá já eeđâi: »Tun še lijjih tuon galilealii Jeesus fáárust.» ₇₀Mut sun kieldij tom puohâi kulâdijn já eeđâi: »Jiem ibbeerd, mast tun sáárnuh.» ₇₁Sun sirdâšui tobbeen poortâ kulij, mut mottoom eres nieidâ ooinij suu já eeđâi toid, kiäh lijjii tobbeen: »Taat almai lâi nasaretlii Jeesus juávhust.» ₇₂Oppeet sun kieldij tom vuárnáin vuárnumáin já vuárnui: »Mun jiem tuubdâ tom almaa.» ₇₃Mut mottoom ääigi keččin suu kuuvl pottii iäráseh, kiäh tobbeen čuážudii, já sij ettii: »Tun lah vissásávt siämmáá juávhust, tomhân kulá jo tuu sárnumist.» ₇₄Talle Piättár ciähudškuođij já vuárnui: »Mun jiem tuubdâ tom almaa.» Siämmást käniores piškoi. ₇₅Piättár muuštij, maid Jeesus lâi ettâm: »Ovdilgo käniores piško, tun kulmii muu kiäldáh.» Sun moonâi olgos já čiäruškuođij čuuvtij.