Vijses já tuávhis hejânieidah
1»Talle oolmij väldikodde kalga leđe tággáár. Lijjii love hejânieidâd, kiäh valdii lampuidis já vuolgii irge oovdeld. 2Viiđâs sist lijjii vijsáh já viiđâs tuávhih. 3Tuávhih valdii lampuidis mut iä väridâm oljo fárusis. 4Vijsáh pelestis valdii laampu lasseen fárusis oljolite. 5Ko irge ájánij, sij puohah uáđistuuškuottii já nohádii. 6Mut koskâiijâ kullui čuárvum: ’Irge puátá! Moonnâđ suu oovdeld!’ 7Talle puoh hejânieidah moránii já tipšuu lampuidis. 8Tuávhih ettii vijsáid: ’Adeliđ mijjân váhá oljo, mii laampuh čäskih.’ 9Mut vijsáh västidii: ’Ep mij pyevti, tot ij lah tuárvi mijjân puohháid. Moonnâđ uástiđ tom kävppijâsâin.’ 10Mut ko sij lijjii uástimin oljo, te irge poođij. Toh, kiäh lijjii valmâšeh, monnii suin hejâtáálun, já uksâ toppui. 11Mottoom ääigi keččin iäráseh-uv pottii tohon já čuorvuu: ’Hiärrá, Hiärrá, leehâst mijjân!’ 12Mut sun västidij: ’Tuođâi, mun jiem tuubdâ tii.’
13»Kocceeđ tondiet, tastko tij eppeđ tieđe peeivi eppeđge ääigi.»
Palvâleijeid uskum ruuđah
14»Talle kiävá näävt: Almai lâi varriimin enâmist. Sun kočoi jieijâs savváid palvâleijeid já oskoi ubâ omâduvvâs sii tuáhá. 15Oohtân sun adelij vittâ taaleent siilbâ, nuubán kyehti já kuálmádân oovtâ, jieškiäs-uv suu naavcâi mield. Tastoo sun varrij enâmist.
16»Tot, kote lâi uážžum vittâ taaleent, riemâi tállân paargon: sun kavpâšij toiguin já haavâi vuáitu toos lasseen vittâ taaleent. 17Siämmáánáál tot, kote lâi uážžum kyehti taaleent, vuoitij lasseen kyehti. 18Mut tot, kote lâi uážžum tuše oovtâ taaleent, kuáivui enâmân kyepi já čievâi tohon išedis ruuđâ.
19»Kuhes ääigi keččin iššeed poođij maassâd já vaađâi palvâleijein lovo. 20Tot, kote lâi uážžum vittâ taaleent, puovtij vittâ toos lasseen já eeđâi: ’Hiärrá, tun adelih munjin vittâ taaleent. Tego tun uáináh, mun lam haahâm vuáitu toos lasseen vittâ.’ 21Iššeed eeđâi sunjin: ’Šiev! Tun lah šiev já lyetittettee palvâleijee. Ucceest lah lamaš oskolâš, mun piejâm tuu ennuv haldâšeijen. Puáđi hiärád ilojuuhlán!’
22»Meiddei tot, kote lâi uážžum kyehti taaleent, poođij já eeđâi: ’Hiärrá, tun adelih munjin kyehti taaleent. Tego uáináh, lam haahâm vuáitu toos lasseen kyehti.’ 23Iššeed eeđâi sunjin: ’Šiev! Lah šiev já lyetitteijee palvâleijee. Ucceest lah lamaš oskolâš, mun piejâm tuu haldâšiđ ennuv.’ Puáđi hiärád ilojuuhlán!’
24»Majemustáá poođij tot palvâleijee, kote lâi uážžum tuše oovtâ taalent, já sun eeđâi: ’Hiärrá, mun tiettim, et tun lah korrâ almai. Tun čuopah tobbeen, kuus jieh lah kalvam, já nuurah tobbeen, kuus jieh lah siemmân leggistâm. 25Mun poollim já koivum talentâd enâmân. Taa lii tuu uámi!’ 26Iššeed västidij sunjin: ’Tun kiälbuttes já läškis palvâleijee! Tun tiettih, et mun čuopâm tobbeen, kuus mun jiem lah kalvam, já nuurâm tobbeen, kuus mun jiem lah siemmân leggistâm. 27Tallehân tun lijjih kolgâđ tuálvuđ muu ruuđâ paaŋkin, vâi mun liččim puáđidijnân uážžum jieččân uámi maassâd riäntuiguin. 28– Väldiđ meddâl suu taaleent já adeliđ toos, kiäst láá love talenttid. 29Juáhážân, kiäst lii, adeluvvoo, já sun uážžu valjeeht, mut kiäst ij lah, tast váldoo meddâl tot-uv, mii sust lii. 30Leggistiđ tuom kiälbuttes palvâleijee olgos sevŋâdâsân. Tobbeen lii čiärrum já paanij kiccâm.’»
Majemuš tuámu
31»Ko Ulmuu Alge puátá kirkkâdvuođâstis eŋgâlijdiskuin, sun čokkáán kirkkâdvuođâs väldičokkámsajan. 32Puoh aalmugeh čuákkejuvvojeh suu oovdân, já sun rátká ulmuid kyeimistis, tego paaimân rátká saavzâid kaaicâin. 33Sun piäjá saavzâid uálgispel já kaaicâid čižetpel. 34Talle kunâgâs iätá toid, kiäh suu uálgispeln láá: ’Puáttiđ teehin, tij kiäid Iäččám lii sivnedâm! Tij uážžuvetteđ tääl arbiđ väldikode, mii lii lamaš valmâšin tii várás maailm sivnedem rääjist. 35Must lâi nelgi, já tij adelijd munjin purrâmâš. Must lâi koško, já tij adelijd munjin juhâmâš. Mun lijjim viereshiäimusâš, já tij vaaldijd muu jieijâd kuuvl. 36Mun lijjim piättáá, já tij pivtâstijd muu. Mun lijjim pyeccee, já tij eelijd muu keččâmin. Mun lijjim faŋgâlist, já tij poođijd muu kuuvl.’
37»Talle vanhurskáh västideh sunjin: ’Hiärrá, kuás mij ooinijm tuu niälgumin já adelijm tunjin purrâmâš, teikâ kuškâluumin já adelijm tunjin juhâmâš? 38Kuás mij ooinijm tuu päihitteemmin já vaaldijm tuu jieččân luusâ, teikâ piättáá já pivtâstijm tuu? 39Kuás mij ooinijm tuu pyeccen teikâ faŋgâlist já eelijm tuu kulen?’ 40Kunâgâs västid sijjân: ’Tuođâi: puoh, maid tij leppeđ porgâm oohtân täin muu hiäjumuin viiljâin, tom tij leppeđ porgâm munjin.’
41»Talle sun iätá suu čižetpeln leijeid: ’Moonnâđ meddâl muu kulen, tij karodum ulmuuh, avalii tuulân, mii lii väridum Sátánân já suu eŋgâláid. 42Must lâi nelgi, mut tij eppeđ adelâm munjin purrâmâš. Must lâi koško, mut tij eppeđ adelâm munjin juhâmâš. 43Mun lijjim viereshiäimusâš, mut tij eppeđ váldám muu jieijâd kuuvl. Mun lijjim piättáá, mut tij eppeđ pivtâstâm muu. Mun lijjim pyeccee já faŋgâlist, mut tij eppeđ iällám muu keččâmin.’
44»Talle taah-uv koijâdeh: ’Hiärrá, kuás mij ooinijm tuu niälgumin teikâ kuškâluumin, viereshiäimusâžžân teikâ piättáá, teikâ pyeccen teikâ faŋgâlist epke išedâm tuu?’ 45Talle sun västid sijjân: ’Tuođâi: puoh, maid tij leppeđ kuáđđám porgâhánnáá oohtân täin hiäjumuin, tom tij leppeđ kuáđđám porgâhánnáá munjin.’
46»Já nuuvt sij vyelgih, nubeh nuvâhánnáá ráŋgáštâsân, mut vanhurskáseh nuvâhánnáá elimân.»
