Matteus 24

₁Ko Jeesus lâi puáttám olgos temppâlist já lâi vuolgâdmin meddâl, máttááttâspárnááh pottii suu kuuvl čäittiđ sunjin temppâl viistijd. ₂Mut Jeesus eeđâi sijjân: »Uáinivetteđ-uv tij puoh taam? Tuođâi: puoh mottejuvvoo enâmân, teehin ij pääsi keđgi keeđgi oolâ.»

₃Ko Jeesus tastoo lâi čokkáámin Oljovääri alne, iäge tobbeen lamaš iäráseh, máttááttâspárnááh pottii suu kuuvl já koijâdellii: »Eeđâ mijjân, kuás tot puoh tábáhtuvá? Mii lii merkkân tuu puátimist já taan maailm loopâst?»

₄Jeesus västidij:

»Váruttiđ, et kihheen ij čájádit tii. ₅Maaŋgah puátih muu noomâst. Sij eteh: ’Mun lam Messias’ já čájáditeh maaŋgâid. ₆Tij kulâvetteđ taištâlemjienâid já saavâid soođijn, mut elleđ paalaask. Nuuvt kalga keevvâđ, mut tot ij vala meerhâš loopâ. ₇Aalmug paijaan aalmugid vuástá já väldikodde väldikodded vuástá, já maaŋgâin kuávluin šaddeh neelgieđeh já eennâmtuárgástusah. ₈Mut puoh taat lii esken šoddâdemtuuskij algâ.

₉»Talle tijjân puátih atâštâsah, maaŋgah tist koddojeh já puoh aalmugeh vajedeh tii muu noomâ tiet. ₁₀Maaŋgah lyepih talle, sij kävildeh kyeimis já vajedeh kyeimi kyeimis. ₁₁Maaŋgah puástuprofeteh iteh, já sij čájáditeh maaŋgâid. ₁₂Já ko lavâttesvuotâ lassaan, maaŋgâi rähisvuotâ čuásku. ₁₃Mut tot kote killáá loopâ räi, piäluštuvvoo. ₁₄Taat väldikode evaŋgelium kulluuttuvvoo jyehi sajan maailmist, puoh almugáid tuođâštâssân, já talle puátá loppâ.»

₁₅»Ko tij uáinivetteđ pase sajan cegâttum hiävu kovlottetteevuođâ, mast proofeet Daniel lii sárnum – huámášus lohhee taam! – ₁₆te talle kalgeh puoh Juudeast ässeeh patâriđ vaarij oolâ. ₁₇Tot, kote lii káátu alne, ij innig koolgâ moonnâđ viežžâđ maiden tävirijd tálustis, ₁₈ige tot, kote lii piäldust, koolgâ maccâđ viežžâđ kiessâmmááccuhis. ₁₉Vuoi toh, kiäh toi peeivij láá párnáá vuástá teikâ njomâtteh! ₂₀Ruhâdâllâđ, amas tij kolgâđ patâriđ täälvi ääigi teikâ sabattin. ₂₁Atâštâs lii nuuvt styeres, et taggaar ij lah lamaš maailm aalgâst onnáá peeivi räi ige koolgâ kuássin šoddâđ. ₂₂Jis tot äigi ij uániduuččii, te ohtâgin olmooš ij šeštuuččii. Mut väljejum ulmui tiet tot äigi uániduvvoo.

₂₃»Jis kiinii talle iätá tijjân: ’Tääbbin lii Messias’ teikâ ’Messias lii tyebbin’, te elleđ osko. ₂₄Tastko puástumessiasah já puástuprofeteh iteh, já sij pargeh stuorrâ tavoid já imâšijd, nuuvt et sij čájáditeh, jis máhđulâš, väljejum ulmuid-uv. ₂₅Taam mun lam tijjân tääl muuneeld almottâm.

₂₆»Jis te tijjân iättoo: ’Sun lii tyebbin ävđinkuávlust’, te elleđ vyelgi tohon, teikâ jis iättoo: ’Sun lii siste táálust’, te elleđ osko toos. ₂₇Tastko tego aldâkkâs šleđgee nuorttân já čuává alme uárji räi, nuuvt kalga leđe Ulmuu Alge puáttim. ₂₈Kost lii ráátu, tohon čokkâneh káránâsah.»

₂₉»Mut forgâ toi peeivij maŋa piäiváš siävŋán ige mánudâš čuovvii. Tääsnih kaččeh almeest já oolmij vyeimih lihâttuvvojeh. ₃₀Talle aalman almostuvá Ulmuu Alge merkkâ. Puoh eennâm suhâkodeh luoimâškyeteh, ko toh uáinih Ulmuu Alge puátimin alme poolvâi alne stuorrâ vyeimistis já kirkkâdvuođâstis. ₃₁Stuorrâ toorvi čuojâdijn sun vuolgât eŋgâlijdis neelji čiehân čokkiđ jyehi saajeest, maailm jyehi kuávlust taid, kiäid sun lii valjim.

₃₂»Oppâđ viärdádâsâst, mon viigunmuorâ fáálá: ko ton uáksi iälláá já rähtiškuát loostâid, te tij tietivetteđ, et keesi lii alda. ₃₃Siämmáánáál tij taam puoh uáinidijn tietivetteđ, et tot äigi lii alda, aaibâs uksânjäälmist. ₃₄Tuođâi: taat suhâpuolvâ ij lappuu ovdilgo puoh taat tábáhtuvá. ₃₅Alme já eennâm láppojeh, mut muu säänih iä lappuu.

₃₆»Mut tom peeivi já puudâ ij tieđe ohtâgin, iä alme eŋgâleh ige ubâ Algegin, tom tiätá tuše Eeči. ₃₇Nuuvtko keevâi Nooa peeivij, nuuvt kalga keevvâđ talle-uv, ko Ulmuu Alge puátá. ₃₈Ovdil tulve ulmuuh purrii já juhhii, najâdii já naittii nieidâidis ain ton peeivi räi, ko Nooa moonâi aarkân. ₃₉Kihheen ij avâštâm maiden, ovdilgo tulve poođij já tuálvui monâdijnis sii puohâid. Siämmáánáál kiävá, ko Ulmuu Alge puátá. ₄₀Almaakyevtis lává piäldust: nubbe váldoo, nubbe páácá. ₄₁Nissoonkyevtis lává millomin valje: nubbe váldoo, nubbe kuáđđoo.

₄₂»Kocceeđ, tastko tij eppeđ tieđe, mon peeivi tii Hiärrá puátá. ₄₃Ibbeerdvetteđhân, et jis táluiššeed tiäđáččij, mon ääigi iho suolâ puátá, te sun kosáččij ige suovâččii kiškođ táálun. ₄₄Kolgâvetteđ tij-uv leđe valmâšin, tastko Ulmuu Alge puátá ton puudâ, mon tij eppeđ aavâšt.»

₄₅»Kii talle lii oskolâš já vijses palvâleijee, kiäm táluiššeed piäjá palvâlusvievâs uáiváámussân keččâđ, et juáháš uážžu purrâmâš ääigild? ₄₆Avdâgâs tot palvâleijee, kiäm suu iššeed puáđidijnis kávná näävt porgâmin! ₄₇Tuođâi: suu tuáhá iššeed osko ubâ omâduvâs.

₄₈»Mut jis palvâleijee lii kiälbuttem, sun juurdâš: ’Muu Hiärrá ij puáđi vala kuhes ááigán’, ₄₉já sun cäimiškuátá skipárijdis já porá já juhá juhheiguin. ₅₀Mut ton peeivi, mon tuot palvâleijee ij ervid, ton ääigi, mon sun ij tieđe, suu hiärrá puátá, ₅₁huško suu jaamâs já tyemmee suu siämmáá sajan, kost tohâluddeeh láá. Tobbeen lii čiärrum já paanij kiccâm.