Saahâ laavâmáttáátteijei já fariseusij vuástá
Jieijâs pajedem kuáttá
1Talle Jeesus sáárnui olmoošjuávkun já máttááttâspárnáidis:
2»Mooses čokkámsaje lii tääl laavâmáttáátteijei já fariseusij haaldust. 3Porgâđ talle tego sij eteh já nuávdittiđ sii máttááttâs. Elleđ kuittâg poorgâ sii tavoi mield, tastko sij iä jiejah poorgâ jieijâs máttááttâs mield. 4Sij čaneh lusis já vaigâdis noođijd já piejih ulmuid kyeddiđ taid, mut jiejah sij iä haalijd taid suormâiniskin lihâttistiđ. 5Puoh, maid sij pargeh, sij pargeh tuše tondiet, vâi ulmuuh huámášiččii sii. Sij kevttih kubdâ ráámmátceelhâskuápuid já piejih stuorrâ tiepijd kiessâmmááccuhsis, 6sij čokkájeh tuáluin mielâstis kunneesaajeest já synagogast ovdemui peeŋkâi alne 7já láá mielâstum, ko ulmuuh markkânpaaihijn tiervâtteh sii já kočodeh sii rabbin.
8»Elleđ tij suovâ kočodiđ jieijâd rabbin, tastko tist lii tuše ohtâ máttáátteijee já tij leppeđ puohah viiljah. 9Elleđge kočo eeččin kiämmán, kote lii eennâm alne, tastko tuše ohtâ lii tijjân eeči, sun, kote lii oolmijn. 10Elleđ suovâ kočodiđ jieijâd oppâmiäštárin, tastko tist lii tuše ohtâ miäštár, Kristus. 11Kote tist lii stuárráámus, tot liävus nuubij palvâleijee. 12Kote tastoo jieijâs paajeed, tot vyeleduvvoo, mut kote jieijâs vyeleed, tot pajeduvvoo.
Vuoi tij!
13»Vuoi tij, laavâmáttáátteijeeh já fariseuseh! Tij tohâluddeeh! Tij toppâvetteđ oolmij väldikode uuvsâid ulmui oovdâst. Tij jiejah eppeđ moonâ siisâ eppeđge lyešti taidgin, kiäh monâččii.
[ 14»Vuoi tij, laavâmáttáátteijeeh já fariseuseh! Tij väldivetteđ leeskâin tááluid já luuvâdvetteđ kuhes rukosijd tuše uáinu tiet. Tađe korrâsub lii tii tuámu.]
15»Vuoi tij, laavâmáttáátteijeeh já fariseuseh! Tij tohâluddeeh! Tij juuttâlvetteđ enâmij já meerâi mield vâi uážuččijd kuittâg oovtâ jorgetteijee, já ko tij tast luhostuuvetteđ, tij tohâvetteđ sust helvit uámi, kyehti keerdi paab ko tij jiejah leppeđ.
16»Vuoi tij, čalmettes uápisteijeeh! Tij etâvetteđ: ’Jis vuárnu temppâl peht, tot ij lah mihheen, mut jis vuárnu temppâl kole peht, vyernis lii čannee.’ 17Tij čalmettes tuávhih! Kuábáš lii tehálub, kolle vâi temppâl, mii tom kole passoot? 18Tij etâvetteđ meiddei: ’Jis vuárnu álttár peht, tot ij lah mihheen, mut jis vuárnu álttár oolâ pieijum uhreläähji peht, te vyernis lii čannee.’ 19Tij čalmettemeh! Kuábáš lii tehálub, uhrelähji vai álttár, mii läähji passoot? 20Tot, kote vuárnu álttár peht, vuárnu álttár já puoh tom alne orroo peht, 21já tot, kote vuárnu temppâl peht, vuárnu siämmást suu peht, kiän aassâmsaje tot lii. 22Nuuvt meiddei tot, kote vuárnu alme peht, vuárnu Immeel väldičokkámsaje peht já suu peht, kote tast čokkáá.
23»Vuoi tij, laavâmáttáátteijeeh já fariseuseh! Tij tohâluddeeh! Tij mäksivetteđ lovádâsâid valaba miintust, tiilist já kuminast, mut eppeđ peerust tast, mii laavâst lii tehálumos: vuoigâdvuođâst, läđisvuođâst já oskolâšvuođâst. Täid tij kolgâččijd nuávdittiđ, tuoid iärásijdgin vájáldithánnáá. 24Tij čalmettes uápisteijeeh! Tij silliivetteđ čuoškâ, mut njielâstvetteđ kaameel!
25»Vuoi tij, laavâmáttáátteijeeh já fariseuseh! Tij tohâluddeeh! Tij putteestvetteđ cerhijdâd já kovlijdâd ulguubeln, mut mii tain lii siskiibeln: nistem já merettesvuotâ! 26Tun čalmettes fariseus, putteest ceerhi vistig siskiibeln, mudoi tom ij uážu ulguubelngin putesin!
27»Vuoi tij, laavâmáttáátteijeeh já fariseuseh! Tij tohâluddeeh! Tij leppeđ tego kalháin viälgudittum häävdih. Ulguubeln toh kale láá muččâdeh mut siskiibeln tievâ jämmei taavtijn já puohlágán tuolvâst. 28Siämmáánáál tij-uv leppeđ hurskáh ulguubeln, ulmui čoolmijn, mut siskiibeln tievâ kyehtilâsvuođâst já verivuođâst.
29»Vuoi tij, laavâmáttáátteijeeh já fariseuseh! Tij tohâluddeeh! Tij rähtivetteđ profetij havdij oolâ muštomeerhâid, tij heervâtvetteđ vanhurskái hävdikeeđgijd 30já etâvetteđ: ’Jis mij liččijm iällám ejijdân ääigi, te ep liččii siiguin tuolvâdâm kieđâidân profetij voorân.’ 31Näävt tij kuittâg jiejah tuubdâstvetteđ, et tij leppeđ toi maajeeldpuátteeh, kiäh kuddii profetijd. 32Juátkiđ aainâs ejijdâd täävi mield, tassaaš ko mitto tiävá! 33Tij kyevđih, tij kyevdišohânâsah! Maht tij puávtáččijd velttiđ káđuttâstuámu?
34»Kuullâđ tääl: Mun vuolgâttâm tii kuuvl profetijd, vijses almaid já laavâmáttáátteijeid. Nuubijd sist tij koddevetteđ já riistânnavliivetteđ, nuubijd ruáiskuvetteđ synagogainâd já vyejeetvetteđ kaavpugist nuubán. 35Näävt tij šoddâvetteđ sujalâžžân puoh ton vavettes voorân, mii eennâm alne lii kulgâttum, hurkes Abel voorâst ain Sakarja, Barakja alge, voorâ räi, suu, kiäm tij kuudijd temppâl já álttár kooskân. 36Tuođâi: taat suhâpuolvâ kárttá vala västidiđ puoh täst!
Jeesus váidá Jerusalem korrâváimuvuođâ
37»Jerusalem, Jerusalem! Tun kodáh profetijd já keđgiih taid, kiäh láá vuolgâttum tuu kuuvl. Mon kollii mun lamgin táttum čokkiđ párnáidâd, tego kääni čuákkee uđâgáidis suájáidis suáján! Mut tij eppeđ halijdâm puáttiđ. 38Kuullâđ tääl: tii temppâl šadda pääcciđ ässeettáá. 39Tastko mun eeđâm tijjân, et tij eppeđ muu tästmaŋa uáini ovdilgo etâvetteđ: ’Sivnedum liävus sun, kote puátá Hiärá noomâst!’»
