Matteus 27

₁Tooláá iđedist puoh ollâpaapah já aalmug puárásumoseh čokkânii já soppii koskânis Jeesus koddemist. ₂Jeesus čonnui ooráid, tolvui meddâl já adelui Pilatusân, eennâmhiärán.

₃Ko Juudas, Jeesus kävildeijee, ooinij, et Jeesus lâi tuommiittâttâm jämimân, sun kaađâi tavvoos. Sun tuálvui kulmâlov silbâruttâd, maid sun lâi uážžum, maassâd ollâpappáid já puárásumosáid ₄já eeđâi: »Mun porgim puástud, ko kävildim vavettes voorâ.» Mut sij västidii: »Maid tot mijjân kulá? Tot lii tuu äšši.» ₅Talle Juudas leggistij ruuđâid temppâlân, moonâi meddâl já horcâstij jieijâs.

₆Ollâpaapah valdii ruuđâid já ettii: »Taah láá vorrâruuđah, täid ij lah lope pieijâđ temppâl ruttâráájun.» ₇Sij ráđádellii já meridii uástiđ toiguin njajâlitteaptee piäldu viärásij hävdisaijeen. ₈Vala onnáá peeivi-uv tot piäldu iättoo Vorrâpiäldun. ₉Näävt olášui taat proofeet Jeremia sääni:

₁₁Jeesus tolvui tääl eennâmhiärá oovdân. Taat koijâdij: »Lah-uv tun juudalij kunâgâs?» »Tun tom ettih», Jeesus västidij. ₁₂Já ko ollâpaapah já puárásumoseh sujâttii suu, sun ij västidâm maiden. ₁₃Talle Pilatus eeđâi sunjin: »Jieh-uv tun kuulâ, mon korrâ sujâttâsâid sij pyehtih oovdân tuu vuástá?» ₁₄Mut Jeesus ij västidâm oohtângin suu koččâmâšân. Taat imâštutij čuuvtij eennâmhiärá.

₁₅Tääppin lâi, et eennâmhiärrá ain juuhlij ääigi luoštij luovâs oovtâ faaŋgâ, kiäm olmoošjuávkku uážui valjiđ. ₁₆Faaŋgâi juávhust lâi tääl Barabbas-nommâsâš pegâlmâs almai. ₁₇Ko olmoošjuávkku lâi čuáhist, Pilatus koijâdij: »Kuábbáá tij haalijdvetteđ? Luáštám-uv Barabbas vâi Jeesus, kiäm kočodeh Kristusin?» ₁₈Sun uáináh tieđij, et Jeesus lâi tuše kađâšvuođâ keežild kuođđum suu kieđáid.

₁₉Ko Pilatus čokkái tuámmársajestis, sun uážui kálgustis sääni: »Ele poorgâ maiden paaid ton pase almai. Mun nievdim sust moonnâm iijâ peinijáá.» ₂₀Mut ollâpaapah já puárásumoseh kihtâlii olmoošjuávhu pivdeđ Barabbasân ärmittâs já Jeesusân jämmimtuámu. ₂₁Eennâmhiärrá koijâdij tääl: »Kuábbáá taan kuáhtást tij haalijdvetteđ? Kuábbáá luáštám luovâs?» Juávkku västidij: »Barabbas.» ₂₂Pilatus koijâdij: »Maid mun talle poorgâm Jeesusân, kiäm kočodeh Kristusin?» Puohah västidii: »Riistânnävlejus!» ₂₃»Maid paaid sun lii porgâm?» Pilatus koijâdij. Mut sij tuše čuorvuu korrâsubbooht: »Riistânnävlejus!»

₂₄Ko Pilatus ooinij, et maiden ij puáhtám innig porgâđ, já ko larmâ tuše koorâi, sun vaaldij čääsi, poosâi kieđâidis olmoošjuávhu uáinidijn já eeđâi: »Mun lam sujâttem taan almaa voorân. Taat lii tii äšši.» ₂₅Puohah čuorvuu oovtâ jienân: »Suu vorrâ uážžu puáttiđ mii já mii párnái oolâ!» ₂₆Talle Pilatus mieđâi sii vátámâšân já luoštij Barabbas, mut Jeesus sun ruáiskuttij já adelij riistânnavlimnáál.

₂₇Eennâmhiärá suáldátteh tolvuu Jeesus siisâ palaccân já čuákkejii ubâ suáldátjuávhu suu pirrâ. ₂₈Sij nuollii Jeesus já kárvuttii suu ruopsis kiessâmmááccuhân, ₂₉punnjii säggišaddoin ruuvnâ suu uáiván já pieijii ruáhusuábi suu uálgiskietân. Sij luáštádâttii idduidis oolâ suu oovdân já ettii sunjin pilkkedmáin: »Tiervâ, juudalij kunâgâs!» ₃₀Sij čulgii suu oolâ, valdii sust suábi já čoskii suu toin uáiván. ₃₁Ko sij lijjii pilkkedâm mottoom ääigi, sij nuollii sust pihtâs, kárvuttii suu jieijâs pihtâsáid já vuolgii tuálvuđ suu riistânnavlimnáál.

₃₂Määđhi ääigi sij teivii Simmoon-nommâsáin kyrenelijn almain já päggejii suu kyeddiđ Jeesus riistâ. ₃₃Ko sij pottii sajan, mon kočodeh Golgatan, Kállupäikkin, ₃₄sij fallii Jeesusân juhâmâššân viini, moos lâi siävuttum säppi. Sun smakkij tast, mut ij halijdâm juuhâđ.

₃₅Ko sij lijjii riistânnavlim Jeesus, sij juohhii koskânis suu pihtâsijd vuárbádmáin. ₃₆Te sij paccii tohon čokkáđ já vähtejii suu. ₃₇Suu uáivi paajaabel sij kiddejii čalluu, mast oinui suu tuámu suijâ: »Taat lii Jeesus, juudalij kunâgâs.» ₃₈Ohtân Jeesusáin riistânnävlejuin riävvárkyevtis, nubbe suu uálgispel, nubbe suu čižetpel.

₃₉Lappâdjotteeh pilkkedii suu. Uáivis nuáigutmáin ₄₀sij ettii: »Tunhân puávtáh pieđgiđ temppâl já rähtiđ tom uđđâsist kuulmâ peeivist. Piälušt tääl jieijâd jis kerdi lah Immeel Alge. Puáđi vuálus riistâst!» ₄₁Ollâpaapah-uv pilkkedii ohtân laavâmáttáátteijeiguin já puárásumosijguin. Sij ettii: ₄₂»Iärásijd sun kale lii išedâm, mut jieijâs sun ij pyevti išediđ. Liihân sun Israel kunâgâs, puáđus tääl riistâst vuálus! Talle mii oskop sunjin! ₄₃Sun lii pieijâm luáttámâšâs Imelân – piäluštus Immeel tääl suu, jis lii sunjin mielâstum! Liihân sun ettâm, et sun lii Immeel Alge!» ₄₄Siämmáánáál pilkkedáin meiddei riävvárkyevtis, kiäh láin riistânnävlejum ohtân suin.

₄₅Mut koskâpeeivi, kuuđâd tiijme ääigi, poođij sevŋâd ubâ eennâm oolâ, já tot piištij oovcád tiijme räi. ₄₆Oovcád tiijme suulâin Jeesus čuárvui korrâ jienáin: »Eeli, Eeli, lama sabaktani?» Tot meerhâš: Imelâm, Imelâm, mondiet tun hilguh muu? ₄₇Taam kulâdijnis motomeh tobbeen orroin ettii: »Sun čuárvu Elia.» ₄₈Ohtâ suin tuámittij viežžâđ sape, kaastij tom suvreviinin, piejâi suábbikiäčán já faalâi tast sunjin juhâmâš. ₄₉Iäráseh ettii: »Uáinip tibi tääl, puátá-uv Elia suu iššen.» ₅₀Mut Jeesus čuárvui oppeet korrâ jienáin já adelij jiegâs.

₅₁Talle temppâl ovdâloovdâ rottâsij kyevti uásán, paijeen aaibâs vuálus. Eennâm tuárgistij, källeeh luoddânâddii, ₅₂häävdih lekkâsii, já maaŋgâi jáámmám poosij rummâšeh pajanii pajas. ₅₃Sij vuolgii havdijnis, já Jeesus pajaspajanem maŋa sij pottii pase kaavpugân já almostuvvii tobbeen maŋgâsân.

₅₄Ko čyeđeuáivalmai já almaah, kiäh suin vähtejii Jeesus, oinii eennâm tuárgistem já puoh, mii tábáhtui, sij suorgânii čuuvtij já ettii: »Taat lâi tuođâi Immeel Alge!»

₅₅Tobbeen lijjii meiddei maaŋgah nisoneh määđhi keččin taam keččâmin. Galilea rääjist sij lijjii jottáám Jeesus mieldi já palvâlâm suu. ₅₆Sii koskâvuođâst lijjii Magdala Máárjá, Jáákkup já Joovsep enni Máárjá já Sebedeus oolgij enni.

₅₇Ehidist poođij Joovsep, riges arimatialâš, kote sun-uv lâi Jeesus máttááttâspärni. ₅₈Sun moonâi Pilatus savváid já koijâdij Jeesus rummâš. Pilatus kočoi adeliđ tom sunjin. ₅₉Joovsep vaaldij rummâš, kiesâi tom putes piellivâspihtâsân ₆₀já piejâi háávdán, mon sun kieskâd lâi jieijâs várás rähtittâm källei. Sun vierâttij häävdi uksârääigi oovdân stuorrâ keeđgi já vuolgij meddâl. ₆₁Magdala Máárjá já tot nubbe Máárjá láin suoi-uv tobbeen; suoi čokkáin häävdi puotâ.

₆₂Nube peeivi, ko sabbaat valmâštâspeivi lâi moonnâm, te ollâpaapah já fariseuseh vuolgii oovtâst Pilatus kuuvl. ₆₃Sij ettii: »Kunnijâttum eennâmhiärrá, mist poođij mielân, et eledijnis tuot tájutteijee eeđâi: ’Kuulmâ peeivi keččin mun pajanâm jämimist.’ ₆₄Kočo tondiet vahtiđ häävdi tárkká kuálmád peeivi räi, amas suu máttááttâspárnááh peessâđ suáládiđ suu já ettâđ ulmuid: ’Sun lii pajanâm jämimist.’ Majemuš vildáskittem ličij talle vala paab ko vuosmuš.» ₆₅Pilatus västidij sijjân: »Tij uážžuvetteđ vahtimvievâ. Moonnâđ já orniđ häävdi vahtim nuuvt pyereest ko mättivetteđ.» ₆₆Sij monnii já visásmittii häävdi nuuvt et pieijii seeilâ kiäđgán já asâttii vaavtâid.