Luukas 13

₁Eidu ton ääigi Jeesus kuuvl pottii ulmuuh muštâliđ Pilatus kodettem galilealijn. Sun lâi siävuttâm uhrediđ puáttám galilealij voorâ uhre-ellei voorân. ₂Jeesus eeđâi toos: »Juurdâšvetteđ-uv tij, et sij lijjii stuárráábeh suddogâsah ko puoh eres galilealiih, tondiet et sij finnejii tyeggáár loopâ? ₃Iä lamaš – siämmáánáál tij puohah tuššâvetteđ, jis tij eppeđ jorgeet Immeel piälán. ₄Nabâi toh käävcinubáloves, kiäh jammii ko Siloa tornâ viirâi sii oolâ? Juurdâšvetteđ-uv tij, et sij lijjii sujâliih moosnii viärráábân ko eres jerusalemliih? ₅Iä lamaš – siämmáánáál tij puohah tuššâvetteđ, jis eppeđ jorgeet Immeel piälán.»

₆Jeesus muštâlij vala viärdádâs: »Mottoom almast lâi viinikärdistis šoddâmin viigunmuorâ. Sun moonâi uuccâđ tast heđâlmijd, mut ij kavnâm. ₇Talle sun eeđâi viinikärditipšoi: ’Jo kulmâ ive mun lam iällám ucâmin heđâlmijd taan viigunmuorâst, mut jiem lah kavnâm. Čuopâ tom, tothân tuše tuálvu vyeimi enâmist.’ ₈Mut käärdi tipšoo västidij: ’Hiärrá, tipte tom orroođ vala oovtâ ive. Mun kiändám eennâm já sondiim ton pirrâs. ₉Jispa tot puáttee ive ráhtá heeđâlm. Jis nuuvt ij keevâ, kočo talle čuoppâđ tom.’»

₁₀Jeesus lâi sabattin mottoom synagogast máttátmin. ₁₁Tobbeen lâi nissoon, kiäm lâi puácuvuođâ jieggâ väividâm käävcinubáloh ihheed. Suu čielgi lâi čuuvtij kaavren, ige sun áppádâm njuolgiđ jieijâs. ₁₂Nissoon uáinidijn Jeesus kočoi suu jieijâs kuuvl já eeđâi: »Nissoon, tun lah peessâm väivistâd.» ₁₃Sun piejâi kieđâs nissoon oolâ, já tállân taat njuolgij seelgis já alestij Immeel.

₁₄Ko synagoga ovdâolmooš ooinij, et Jeesus pyeredij pyeccee sabattin, sun suutâi já eeđâi ulmuid, kiäh tast lijjii: »Ohhoost láá kuttâ peeivi pargoi várás, puáttiđ talle pyeredemnáál, elleđge sabattin.» ₁₅Hiärrá västidij: »Tij passaah! Juáháš tist kale luáštá sabattin vuávsás tâi aasis luovâs já tuálvu tom juuhâđ. ₁₆Taam Áábráhâm nieidâ Sáttán lii toollâm čonnâsijnis jo käävcinubáloh ihheed. Ij-uv suu liččii uážžum pestiđ luovâs sabbaatpeeivi?» ₁₇Jeesus vástádâs kulâdijn puoh suu vuástálisteeh hepânâššii, mut aalmug ilodij puoh imâšlâš tavoin, maid sun poorgâi.

₁₈Talle Jeesus eeđâi: »Maggaar lii Immeel väldikodde? Moos mun verdidiččim tom? ₁₉Tot lii tegu siinapsiemâ, mon almai koolvij šaddokárdásis. Ton vesa šoodâi já lâi loopâst tegu muorâ, já alme lodeh huksejii piervâlijd ton ovssijd.»

₂₀Vala sun eeđâi: »Moos mun verdidiččim Immeel väldikode? ₂₁Tot lii tegu suvre. Ko nissoon siävuttij tom kuulmâ tievâ kiijsán jáávuid, te ubâ täigi suvroi.»

₂₂Jeesus vajâldij Jerusalem kulij. Sun juuđij kaavpugist kaavpugân já siijdâst siijdân já máttááttij. ₂₃Kiinii koijâdij sust: »Hiärrá, lii-uv nuuvt, et tuše häärvih piäluštuvvojeh?»

Jeesus västidij: ₂₄»Kištottâllâđ vâi pesâvetteđ siisâ poskis uuvsâst. Mun eeđâm tijjân: maaŋgah keččâleh moonnâđ siisâ, mut iä áppád. ₂₅Puátá puddâ, kuás táálu iššeed čyežžil já tappa uuvsâ. Ko tij talle čuážžuvetteđ olgon, špuáhutvetteđ uuksân já čuárvuvetteđ: ’Hiärrá, leehâst mijjân!’, te sun västid: ’Kiäh tij leppeđ? Mun jiem tuubdâ tii.’ ₂₆Talle tij čielgiiškyetvetteđ: ’Mijhân puurâim já juuvâim oovtâst tuin, já tun máttááttih mii kááđui alne.’ ₂₇Mut sun iätá: ’Kiäh tij leppeđ? Mun jiem tuubdâ tii. Moonnâđ meddâl muu kulen, puoh puástuvuođâ tahheeh.’

₂₈Tobbeen tij čiäruvetteđ já käskivetteđ panijdâd ko uáinivetteđ Áábráhâm já Issáák já Jáákkup já puoh profetijd Immeel väldikoddeest, mut huámmášvetteđ, et tij jiejah leppeđ leggistum olgos. ₂₉Nuorttân, viestârist, tavveen já mäddin puátih ulmuuh, kiäh čokáneh purâdiđ Immeel väldikoddeest. ₃₀Maaŋgah majemuuh šaddeh talle vuosmužžân, maaŋgah vuosmuuh majemužžân.»

₃₁Eidu talle pottii motomeh fariseuseh ettâđ Jeesusân: »Vyelgi meddâl tääbbin, Herodes áigu koddeđ tuu.»

₃₂Mut sun västidij:

»Moonnâđ já ettâđ tuon riämnjás: ’Onne já itten mun vuájálitám ulmuin paas jiegâid já pyeredâm pyecceid, já kuálmád peeivi mun finniim pargon valmâšin.’ ₃₃Mut onne já itten já tovnpeeivi-uv mun ferttiim juátkiđ jotemân – ijhân lah máhđulâš, et proofeet koddeh monnii eres saajeest ko Jerusalemist. ₃₄Jerusalem, Jerusalem! Tun kodáh profetijd já keđgiih taid, kiäh láá vuolgâttum tuu kuuvl. Kollii mun lamgin táttum čokkiđ párnáidâd, tego kääni čuákkee uđâgáid suájáidis vuálá! Mut tij eppeđ halijdâm puáttiđ. ₃₅Kuullâđ tääl: tii temppâl páácá ävđin. Já mun eeđâm tijjân, et tij eppeđ muu uáini ovdilgo ton peeivi, kuás tij etâvetteđ: ’Sivnedum liävus sun, kote puátá Hiärá noomâst!’»