Luukas 12

₁Viehâ lâi ton puudâ čokkânâm tuháttij mield, nuuvt et ulmuuh tuolmii jo nubijdis.

Jeesus sárnuškuođij vist máttááttâspárnáidis:

»Váruttiđ fariseusij suuvrest, passaavuođâst. ₂Ij lah čiähá, mii ij kavnuuččii, ige syeligâsvuotâ, mii ij iđáččii uáinusân. ₃Nuuvtpa tot, maid tij etâvetteđ sevŋâdâsâst, kulloo peeivičuovâst, já maid tij neelji seeini siste sovkkâlvetteđ nube ulmuu piälján, tot kulluuttuvvoo káátu alne.»

₄»Mun eeđâm tijjân, ustevijdân: Elleđ poolâ tain, kiäh koddeh rummâš mut kiäi väldi ij ole tađe olgoláá. ₅Tij kulâvetteđ, kiäst tij kolgâvetteđ poollâđ. Poollâđ sust, kiäst lii väldi sehe koddeđ ulmuu ete leggistiđ suu helvitân. Nuuvt, mun eeđâm tijjân: sust tij kolgâvetteđ poollâđ. ₆Varbusijd uážžu kuovttijn šlanttáin vittâ, ij-uvks nuuvt? Kuittâg Immeel ij vájáldit oovtâgin tain. ₇Tii jyehi vuoptâkuolgâ-uv lii rekinistum. Elleđ tääl poolâ. Leppeđhân tij tivrâsuboh ko puoh varbusiih.»

₈»Mun eeđâm tijjân: Kote tuubdâst jieijâs muu uámmin ulmui oovdâst, tom puátá Ulmuu Alge tubdâstiđ jieijâs uámmin Immeel eŋgâlij oovdâst. ₉Mut kote ulmui oovdâst kiäldá muu, tot šadda kielduđ Immeel eŋgâlij oovdâst. ₁₀Já juáhâžân, kote iätá maidnii Ulmuu Alge vuástá, adeluvvoo addâgâs, mut toos, kote pilkked Pase Jiegâ, ij adeluu addâgâs. ₁₁Ko tij tolvuuvetteđ synagogaid já virgeomâhái já esivääldi oovdân, elleđ huolât tast, maid sárnuvetteđ já maht piäluštvetteđ jieijâd. ₁₂Ko tot puddâ puátá, Pase Jieggâ rävvee, maid tij kolgâvetteđ sárnuđ.»

₁₃Mottoom almai olmoošjuávhust eeđâi Jeesusân: »Máttáátteijee, eeđâ viljâsân, et sun mieđâččij ärbijyehimân.» ₁₄»Maid?» koijâdij Jeesus. »Lam-uv mun pieijum tii tuámárin teikâ jyehimalmajin?» ₁₅Sun eeđâi sijjân puohháid: »Váruttiđ tárkká puohlágán snielahvuođâst. Ij kihheen pyevti huksiđ elimis omâduv oolâ, veik tot ličij mon ennuv peri.»

₁₆Sun muštâlij sijjân viärdádâs:

»Lâi riges almai, kote finnij eennâmstis šiev šaddovalje. ₁₇Sun smietâi ohtuunis: ’Maid mun porgâččim? Muu šaddovalje ij innig šietâ kuussân.’ ₁₈Sun meridij: ’Munba poorgâm tánávt: mun račom aitijdân já huksiim stuárráábijd toi sajan. Nuuvt mun nuurâm ubâ šaddovalje já puoh tom, maid omâstâm. ₁₉Talle mun eeđâm olssân: Tust lii šiev eellimtile! Tust lii puoh pyeri vuárhást maaŋgâ ihán. Vuoiŋâst tääl, puurâ, juuvâ já naavdâš elimist!’ ₂₀Mut Immeel eeđâi sunjin: ’Tun mielâttem! Taan iijâ tuu siälu váttoo tust maassâd. Já puoh, maid tun lah olssâd väridâm – kiäs tot šadda?’

₂₁»Näävt kiävá toos, kote norá rigesvuođâ olssis mut kiäst ij lah riggodâh Immeel kulen.»

₂₂Jeesus eeđâi máttááttâspárnáidis:

»Tondiet mun eeđâm tijjân: elleđ huolâttiđ jiegâstâd, tast maid purâččijd, elleđ jieijâd rummâšist, tast moin kárvuttiččijd tom. ₂₃Liihân jieggâ eenâb ko purrâmâš já ruumâš eenâb ko káárvuh. ₂₄Keččâđ káránâsâid: iä toh kalve iäge čuopâ, ij tain lah puvre ige vuárkká, já liikjá Immeel piämmá taid. Mon ennuv tibrâsuboh tij leppeđgin ko lodeh! ₂₅Kii tist puáhtá muurâštmáin lasettiđ elimis kukkoduv äälnigin verd? ₂₆Ko kerd näävtkin uccâ áášáš ij lah tii haaldust, te maid tij eres aašijn huolâtvetteđ?

₂₇Keččâđ raasijd, maht toh pajaneh enâmist: iä toh uáini vääivi iäge pane. Mun eeđâm tijjân: ij ubâ Salomo puoh šerrâdvuođâinis lamaš nuuvt kárvuttum ko mii ihenis tain. ₂₈Ko Immeel tyenávt káárvut sino, mii onne šadda kiedist já itten šadda uuvnân, te čuuvtij eenâb sun tist ana huolâ, tij uccááoskoliih!

₂₉»Elleđ tast muurâšt, maid tij purâččijd teikâ juvâččijd. Elleđge tom uusâ. ₃₀Taam puoh maailm ulmuuh háputteleh; tii Eeči kale tiätá, et maid tij taarbâšvetteđ. ₃₁Uuccâđ suu väldikode, te uážžuvetteđ meid puoh taam.»

₃₂»Ele poolâ, muu uccâ čuurâš. Tuu Eeči lii meridâm adeliđ tijjân väldikode.»

₃₃»Vyebdiđ, mii tist lii, já adeliđ kievhijd. Skappuđ puursâid, moh iä kuorrân, čokkiđ olmijd aarni, mii ij nuuvâ. Tobbeen ij suolâ peesâ taid kieđâvuššâđ ige hevâttiđ. ₃₄Kost muu aarni lii, tobbeen lii meid muu váimu.

₃₅»Anneeđ huolâ, et tii pihtâseh láá puáhánjistum já laampuh pyelimin. ₃₆Kolgâvetteđ leđe tego palvâleijeeh, kiäh vyerdih išedis heejâin, valmâšin tállân lehâstiđ uuvsâ, ko sun puátá já špuáhut. ₃₇Avdâgâsah toh palvâleijeeh, kiäid sii iššeed puáđidijnis kávná kocemin! Tuođâi: sun puáhánjist, koččo sii piävdán já páácá jieš palvâliđ sii. ₃₈Avdâgâsah tuoh palvâleijeeh, jis sun kávná sii näävt kocemin, poođijba sun ovdil koskâiijâ teikâ ton maŋa!

₃₉Ibbeerdvetteđhân tij, et jis táluiššeed tiädáččij, mon ääigi iho suolâ puátá, te sun ij tiptáččii kiškođ jieijâs táálun. ₄₀Kolgâvetteđ tij-uv leđe kiärguseh, tastko Ulmuu Alge puátá taggaar ääigi, mon tij eppeđ aavâšt.»

₄₁Piättár eeđâi: »Hiärrá, tárguttah-uv tun tai viärdádâsâiguin puohâid vâi tuše mii?»

₄₂Hiärrá västidij:

»Kii lii oskolâš já vijses tálutuállee – taggaar kiäm iššeed piäjá palvâlusvievâs uáiváámuššân jyehiđ sijjân meriuási purrâmâšâst ääigild? ₄₃Avdâgâs tot palvâleijee, kiäm suu iššeed puáđidijnis kávná näävt porgâmin! ₄₄Tuođâi: suu tiipšon iššeed osko ubâ omâduvâs.

₄₅Taat palvâleijee sáttá liijká jurdâččiđ: ’Iššeed ij puáđi vala kuhes ááigán!’ Nuuvt sun riämá cäimiđ eres palvâleijeid já palvâlusnieidâid sehe purâdiđ, juuhâđ já julástâllâđ. ₄₆Mut ton peeivi, mon tuot palvâleijee ij ervid, ton puudâ, mon sun ij tieđe, suu iššeed puátá já huško suu jaamâs, já nuuvt palvâleijee uážžu siämmáá uási ko epioskovááh.

₄₇»Jis palvâleijee tiätá, maid suu iššeed táttu, mut ij rahttât toos ige tooimâ suu táátu mield, sun finnee maŋgâ suábičaskem. ₄₈Jis vuod palvâleijee tieđehánnáá taha maidnii tagarijd, mast ráŋgáštuvvoo sobbijn cäimimáin, sun piäsá ucebáin časkemáin. Kiäs lii ennuv adelum, tast ennuv váttoo, já kiäs lii ennuv uskum, tot piäijoo västidiđ ennust.»

₄₉»Tuulâ mun lam puáttám pyehtiđ eennâm oolâ – já maht mun tuáivumgin, et tot ličij jo cokkânâm. ₅₀Mut muu kalga kastuin kästiđ – maggaar atâštâsâst mun lamgin, ovdilgo mun lam peessâm tast čoođâ! ₅₁Jurdevetteđ-uv tij, et mun lam puáttám pyehtiđ eennâm oolâ ráávhu? Jiem eissigin, pic riijdo! ₅₂Täst ovdâskulij siämmáá perruu jesâneh láá sierâ pele: vittâsist láá kuulmâs kuáhtás vuástá, já kyevtis lává kulmâs vuástá. ₅₃Eeči kárttá vuástáluvâi olgijnis, alge ejijnis, enni nieidâinis já nieidâ enijnis, vyene monjijnis já manje vuonijnis.»

₅₄Jeesus eeđâi tastoo aalmugân:

»Ko tij uáinivetteđ poolvâ paijaanmin viestârist, tij etâvetteđ tállân: ’Tääl arvaa, já nuuvt taha-uv. ₅₅Teikâ ko piäggá mäddin, tij etâvetteđ: Šadda paahâs’, já nuuvt šadda. ₅₆Tij passaas ulmuuh! Eennâm já alme almonijd tij kale mättivetteđ tulkkuđ, maht talle eppeđ taam ääigi?»

₅₇»Mane tij eppeđ jo jiejah čuávdi, mii lii olmânáál? ₅₈Ko lah jieijâd vyestipeelijn monâmin vuoigâdvuotân, te määđhi ääigi toovâ puoh, et tuoi pesâččáid sovâdâttâđ. Mudoi sun viešid tuu tuámmár oovdân, já tuámmár luovât tuu vaahtân, kote piäjá tuu fangâlân. ₅₉Osko muu: tobbeen tun jieh peesâ, ovdilgo lah máksám puoh majemuu-uv šlaanti.»