Luukas 11

₁Motomin, ko Jeeus lâi lamaš ruhâdâlmin, mottoom suu máttááttâspárnáin táátui: »Hiärrá, máttát mii ruhâdâllâđ, nuuvt tegu Juhánâs-uv máttááttij máttááttâspárnáidis.»

₂Jeesus eeđâi sijjân: »Ko tij ruhâdâlvetteđ, te ettâđ näävt:

₅Jeesus eeđâi vala:

»Kuvâttâllâđ, et kiinii tist mana kaskoo iijâ ustevis kuuvl já iätá: ’Pyeri viljâ, lovnii munjin kulmâ leeibi. ₆Mottoom ustev orostij mäđhistis muu kuuvl, ige must lah mihheen, maid faallâđ sunjin.’ ₇Nubbe västid siskiibeln: ’Ele hettii muu. Uksâ lii jo luuhâst, já mun lam uáđimin párnáidânguin. Jiem mun pyevti pajaniđ adeliđ maiden.’ ₈Mut mun eeđâm tijjân: veik sun ij pajaniččiigin adeliđ leeibi nuubán tuše ustevvuođâ tiet, sun liijká taha tom ánnoo siđhesvuođâ tiet já addel nuuvt ennuv ko nubbe taarbâš.

₉Nuuvtpâ mun eeđâm tijjân: Áánnuđ, te tijjân adeluvvoo. Uuccâđ, te tij kavnâvetteđ. Špuáhuttiđ, te tijjân lehâstuvvoo. ₁₀Tastko ánnoo uážžu, occee kávná, já juáhážân, kote špuáhut, lehâstuvvoo. ₁₁Ij vissâ kihheen tist lah taggaar eeči, et sun addel algasis kyevdi, ko alge táttu kyele. ₁₂Teikâ skorpion, ko sun táttu mane? ₁₃Jis kerdi tij paas ulmuuh mättivetteđ adeliđ párnáidâd puoh puorijd, te tiäđust-uv tii Eeči ennuv eenâb addel oolmijn Pase Jiegâ toid, kiäh tom sust áánuh.»

₁₄Jeesus vuájálitij paas jiegâ kielâttes almast. Ko jieggâ lâi vuálgám, te kielâttes almai sárnuškuođij, já puohah hiämáskii. ₁₅Motomeh kuittâg ettii: »Belsebul, jieijâs uáivipahakkâs vievâst sun paas jiegâid vyejeet.» ₁₆Nubeh oppeet halijdii keččâlâddâđ suu já vattii sust meerhâ almeest.

₁₇Mut Jeesus tieđij, maid sij jurdâččii, já eeđâi:

»Jyehi väldikodde, mii juáhás já taištâl jieijâs vuástá, tuššá, já tááluh vireh nubijdis oolâ. ₁₈Jis Sáttán taištâl jieijâs vuástá, te maht ton väldikodde puáhtá cevziđ? Tijhân etâvetteđ, et mun vuájálitám paas jiegâid ulmust Belsebul vievváin. ₁₉Mut jis mun vuájálitám paas jiegâid Belsebul vievváin, te kiän vievâst tastoo tii ulmuuh taid vuájáliteh? Sist tij uážžuvetteđ olssâd tuámárijd. ₂₀Ton sajan jis mun vuájálitám paas jiegâid ulmuin Immeel suormáin, tallehân Immeel väldikodde lii jo puáttám tii kuuvl.

₂₁Ko áppáás almai vähtee lannees viärju kieđâst, te suu omâdâh lii torvoost. ₂₂Mut jis nubbe vala-uv kievrâb vollit suu já váldá sust viärjuid já riäiduid, moid sun luotij, já juáhá salâsis. ₂₃Kote ij lah muin, lii muu vuástá, já kote ij oovtâst muin čokkii, tot pieđgee.

₂₄»Ko epiputes jieggâ vuálgá olgos ulmust, tot čájádât ävđin kuávluin já ocá vuoiŋâstemsaje, mut ij kaavnâ. Talle tot meerrid: ’Mun maacâm páikkásân, kost mun vuolgim.’ ₂₅Ko tot tastoo puátá já kávná jieijâs viste, mii lii suopâlistum já šiev oornigist, ₂₆tot ocá čiččâm vala paab jieggâd, já toh puátih siisâ já tiälláádeteh toho aassâđ. Näävt tom ulmuu tile lii loopâst viärráb ko tot lâi aalgâst.»

₂₇Ko Jeesus lâi näävt sárnumin, te mottoom nissoon olmoošjuávhust eeđâi korrâ jienáin: »Avdâgâs tot kuáhtu, mii lii tuu kuáddám! Avdâgâsah toh njamah, maid tun lah njoommâm!» ₂₈Toos Jeesus eeđâi: »Naa, avdâgâsah láá puohah, kiäh kuleh Immeel sääni já nuávditteh tom.»

₂₉Ko ulmuuh čokkânii ain lase, te Jeesus sárnuškuođij sijjân:

»Taat suhâpuolvâ lii paas suhâpuolvâ. Tot váátá meerhâ, mut áinoo merkkâ, mii toos adeluvvoo, lii Joona merkkâ. ₃₀Tego Joona lâi merkkân niniveláid, te lii Ulmuu Alge merkkân taan suhâpuolvân. ₃₁Määdi roonnig koccáá tuámun oovtâst taan suhâpuolvâ ulmuiguin já tyemmee sii. Sun poođij maailm roobdâin kuullâđ Salomo vijsesvuođâ, já täst tijjân lii eenâb ko Salomo! ₃₂Ninive ässeeh pajaneh tuámun oovtâst täin suhâpuolváin já sij tyemmejeh tom. Sij jorgettii Immeel piälán, ko Joonâ särnidij sijjân, já täst tijjân lii eenâb ko Joona!»

₃₃»Ij kihheen cokkit laampu já tastoo čievâ tom. Laampujuálgán tot piäijoo, vâi siisâ puátteeh uáináččii čuovâ. ₃₄Čaalmad lii tuu rummâš lamppu. Ko čaalmad lii tiervâs, ubâ ruumâš lii tuossum. Ko tuu čalmeh láá hyeneh, ruumâš lii sevŋâd. ₃₅Nuuvtpa ane huolâ, et tot čuovâ, mii tust lii, ij liččii sevŋâdâs. ₃₆Jis ubâ rummâšâd lii tuossum, ige mihheen oosijd tust lah sevŋâdin, te lii rummâšâd ollásávt čuovvâd, aaibâs tegu lamppu tuosâččij tuu čuovâinis.»

₃₇Jeesus máttátdijn mottoom fariseus kočoi suu páikkásis purâdiđ. Sun moonâi toho já čokánij piävdán. ₃₈Fariseus hiämáskij ko huámášij, et sun ij posâdâttâm ovdil purâdem.

₃₉Mut Jeesus eeđâi sunjin:

»Tij fariseuseh kale putteestvetteđ kuvsijdâd já kovlijdâd ulguupele, mut tii siiskiš lii tievâ nistemist já paavuođâst. ₄₀Tij mielâttemeh! Ij-uv siämmáš, kote lii ráhtám ulguupele, lah ráhtám siskiipele-uv? ₄₁Mii kuuvsest lii siste, te adeliđ tom kievhijd. Talle puoh lii tijjân putes.

₄₂»Vuoi tij, fariseuseh! Tij mäksivetteđ lovádâsâid joba miintust já ruutaloostâin já puoh ruonâsijn, mut uccáá tij peerustvetteđ vuoigâlâšvuođâst já rähisvuođâst Imelân. Täidhân tij kolgâččijd nuávdittiđ, ige kuáridiđ taidgin eres pákkumijd.

₄₃»Vuoi tij, fariseuseh! Tij čokkáávetteđ synagogast mielâstubbooht ovdemuin soojijn já leppeđ pyerimielâst tast, ko ulmuuh tiervâtteh tii toorijn. ₄₄Vuoi tij! Tij leppeđ tegu merkkiihánnáá häävdih, maid ulmuuh tieđehánnáá tyelmih.»

₄₅Talle mottoom laavâmáttáátteijee huámášitij sunjin: »Máttáátteijee, tyeggáár savváin tun luávkkááh meid mii.»

₄₆Jeesus västidij:

»Vuoi tij-uv, laavâmáttáátteijeeh! Tij piejâvetteđ ulmui ärdei oolâ noođijd, maid lii lussâd kyeddiđ, mut jiejah eppeđ kuoskâ toid ubâ ovttáingin suormáin.

₄₇»Vuoi tij! Tij huksiivetteđ muštomeerhâid profetij haavdij oolâ, mut kiäh kuddii sii? Tii eejih. ₄₈Näävt tij tuubdâstvetteđ já tuhhitvetteđ ejijdâd tavoid: sij kuddii profetijd, já tij huksiivetteđ profetáid muštomeerhâid. ₄₉Taan keežild lii-uv Immeel Vijsesvuotâ ettâm: ’Mun vuolgâttâm sii kuuvl profetijd já apostolijd, já sij koddeh já váinudeh taid.’ ₅₀Nuuvtpa taat suhâpuolvâ uážžu mäksiđ puoh profetij voorâst, mii maailm sivnedem rääjist lii kulgâttum, ₅₁Abel voorâst kiddâ Sakarja voorâ räi, suu, kote kuddui álttár já temppâl kooskân. Naa, mun eeđâm tijjân: taat suhâpuolvâ váttoo vala ovdâsvástádâsân.

₅₂»Vuoi tij, laavâmáttáátteijeeh! Tij leppeđ tuálvum tiäđu čovduu. Jiejah tij eppeđ lah moonnâm siisâ, já taid-uv tij leppeđ iästám, kiäh liččii halijdâm moonnâđ.»

₅₃Ko Jeesus vuolgij tobbeen, te laavâmáttáátteijeeh já fariseuseh atâštii suu ohtânmaanoost koččâmušâidiskuin já valdii oovdân jyehimuđušijd aašijd já keččâlii hokâttâllâđ suu kiddâ. ₅₄Sij kuldâlii tárkká suu, vâi uážuččii suu kiddâ suu jieijâs saanijn.