Roma 16

₁Mun ávžžuhan din váldit vuostá oabbámet Foibe, Kenkrea searvegotti bálvaleaddji. ₂Váldet su vuostá Hearrás, nugo lea heivvolaš bassi olbmuide, ja veahkehehket su buot áššiin main son dárbbaša din veahki. Son lea ieš veahkehan eatnagiid, maiddái mu.

₃Celket dearvvuođaid Priskai ja Akvilai, mu bargoguimmiide Kristus Jesusis. ₄Soai leaba leamaš gergosat mannat heakkavárrii mu dihte. Sudno in giitte duššefal mun, muhto maiddái buot báhkiniid searvegottit. ₅Celket dearvvuođaid maiddái searvegoddái mii čoaggana sudno vissui. Celket dearvvuođaid mu ráhkis Epainetosii, gii lei Asia barggu vuosttaš šaddu Kristusii. ₆Celket dearvvuođaid Mariai, gii lea rahčan sakka din ovddas. ₇Celket dearvvuođaid Andronikosii ja Juniasii, geat leaba juvddálaččat dego mun ja mu fáŋgaguoimmit. Sudnos lea buorre beaggin apostaliid gaskkas, ja soai oskkuiga Kristusii ovdal go mun. ₈Celket dearvvuođaid Ampliatusii, mu ráhkis villjii Hearrás. ₉Celket dearvvuođaid Urbanusii, min bargoguoibmái Kristusis, ja mu ráhkis Stakysii. ₁₀Celket dearvvuođaid Apellesii, Kristusa oskkáldas bálvaleaddjái. Celket dearvvuođaid Aristobulosa dálu olbmuide. ₁₁Celket dearvvuođaid Herodionii, gii lea juvddálaš dego mun. Celket dearvvuođaid daidda Narkissosa viesu olbmuide geat gullet Hearrái. ₁₂Celket dearvvuođaid Tryfainai ja Tryfosai, geat áŋgiruššaba Hearrá barggus. Celket dearvvuođaid ráhkis Persisii, gii lea rahčan ollu Hearrá bálvalusas. ₁₃Celket dearvvuođaid Rufusii, gean Hearrá lea válljen, ja maiddái su eadnái, gii lea leamaš dego eadni munnje maid. ₁₄Celket dearvvuođaid Asynkritosii, Flegonii, Hermesii, Patrobasii, Hermasii ja vieljaide geat leat sin luhtte. ₁₅Celket dearvvuođaid Filologosii, Juliai, Nereusii ja su oabbái, ja Olympasii ja buot bassi olbmuide sin luhtte. ₁₆Buorástahttet guhtet guimmiideattet bassi cummáin. Buot Kristusa searvegottit celket didjiide dearvvuođaid.

₁₇Vieljat, mun rávven din váruhit sis geat dagahit riidduid ja jorralahttet din eret dan oahpas maid dii lehpet oahppan. Allet guoibmádala singuin. ₁₈Dakkár olbmot eai bálval min Hearrá Kristusa muhto iežaset čoavjji. Čáppa ja fillejeaddji sániiguin sii čádjidahttet ovttageardánis olbmuid. ₁₉Din jegolašvuohta lea beaggán buohkaide. Danne mun lean ilus din dihte ja sávan din leat čeahpit das mii lea buorre, muhto čuorbbit das mii lea bahá. ₂₀Vare ráfi Ipmil cuvkešii fargga Sáhtána din julggiid vuollái! Hearrámet Jesus Kristusa árbmu lehkos dinguin.

₂₁Mu bargoguoibmi Timoteus cealká didjiide dearvvuođaid, ja dearvvuođaid celket maiddái mu álbmoga olbmot Lukius, Jason ja Sosipatros. ₂₂Mun, Tertius, gii lean čállán dán girjji Hearrá bálvalusas, cealkkán didjiide dearvvuođaid. ₂₃Dearvvuođaid cealká didjiide Gaius, gii lea rahpan viesus munnje ja oppa searvegoddái. Erastos, gávpoga rehketdoalli, ja min viellja Kvartus cealkiba didjiide dearvvuođaid. ₂₄Hearrámet Jesus Kristusa árbmu lehkos dinguin buohkaiguin! Amen.

₂₅Máidnojuvvon lehkos Ipmil, geas lea fápmu nanosmahttit din mu evangeliumiin, mii lea sáhka Jesus Kristusa birra. Dan čiegusvuohta lea leamaš čihkkojuvvon agálaš áiggiid rájes, ₂₆muhto lea dál almmustuvvan profehtalaš čállagiin agálaš Ipmila gohččuma mielde, vai buot álbmogat dolvojuvvošedje oskku gulolašvuhtii. ₂₇Sutnje, áidna viissis Ipmilii, lehkos gudni ja agálaš rámádus Jesus Kristusa bokte! Amen.