Roma 15

₁Mii geat leat nannosat leat geatnegasat guoddit rašis olbmuid headjuvuođaid. Mii eat oaččo jurddašit dušše dan masa ieža liikot. ₂Juohkehaš mis galgá jurddašit iežas lagamučča ja dahkat dan mii lea sutnje buorre ja mii nanosmahttá su. ₃Ii Kristusge jurddašan iežas. Lea čállojuvvon: Du hiddjideddjiid hiddjádusat deive munnje. ₄Buot mii ovdal lea čállojuvvon, lea čállojuvvon midjiide oahpahussan, vai mii oažžut das gierdavašvuođa, jeđđehusa ja doaivvu. ₅Vare gierdavašvuođa ja jeđđehusa Ipmil dagašii din ovttamielalažžan Jesus Kristusa dáhtu mielde, ₆nu ahte dii buohkat ovttain njálmmiin máinnošeiddet Hearrámet Jesus Kristusa Ipmila ja Áhči.

₇Vuostáiváldet dan dihte guhtet guimmiideattet, nugo Kristus lea vuostáiváldán din, Ipmila gudnin. ₈Mun oaivvildan dán: Kristus šattai birračuhppojuvvon olbmuid bálvaleaddjin. Son lea boahtán nannet lohpádusaid mat ledje addojuvvon áhčiide, ja čájehit ahte Ipmil doallá iežas sáni. ₉Son lea boahtán maiddái dan várás ahte báhkinat besset máidnut Ipmila su váibmoláđisvuođa dihte, nugo lea čállojuvvon: Dan dihte mun rámidan du álbmogiid gaskkas ja máinnun du nama. ₁₀Ja maiddái: Ávvudehket, báhkinat, oktan su álbmogiin. ₁₁Ja velá: Máidnot Hearrá, buot báhkinat, rámidehket su, buot álbmogat. ₁₂Ja Jesaja cealká: Isaja ruohttasis boahtá vesá gii čuožžila ráđđet buot báhkiniid; sutnje báhkinat bidjet doaivvu.

₁₃Vare doaivvu Ipmil deavddášii iluin ja ráfiin din geat oskubehtet, ja attášii didjiide ain riggáset doaivvu Bassi Vuoiŋŋa fámus.

₁₄Vieljaidan, mun lean vissis das ahte dis lea dievva buorrevuohta ja doarvái diehtu nu ahte dii máhttibehtet neavvut guhtet guimmiideattet. ₁₅Almmatge mun muhtun dáfus lean čállán didjiide rahpasit ja roahkkadit ja muittuhan didjiide muhtun áššiid. Mun lean dahkan dan danne go Ipmil lea árpmustis rávkan mu ₁₆doaibmat Kristus Jesusa bálvaleaddjin báhkiniid gaskkas. Mu bálvalus báhppan lea sárdnidit Ipmila evangeliuma, vai báhkinat šaddet oaffarin mii lea Ipmila miela mielde ja maid Bassi Vuoigŋa lea basuhan.

₁₇Dan dihte mu rápmi lea Kristus Jesusis go bálvalan Ipmila. ₁₈Mun in duostta sárdnut maidege eará go dan maid Kristus lea dahkan mu bokte vai báhkinat šaddet gulolažžan. Dan mun lean dahkan sániiguin ja daguiguin, ₁₉mearkkaid ja oavdudaguid fámuin ja Vuoiŋŋa fámuin. Nu mun lean sárdnidan Kristusa evangeliuma buot báikkiin Jerusalema rájes gitta Illyria rádjái. ₂₀Mu áigumuš lea álo leamaš sárdnidit evangeliuma doppe gos Kristusa namma ii leat dovddus, aman hukset dan vuođu ala maid earát leat bidjan. ₂₁Dasgo lea čállojuvvon: Sii geaidda ii leat sárdniduvvon su birra, oidnet, ja sii geat eai leat gullan, áddejit.

₂₂Dát lea eatnat gerddiid hehtten mu boahtimis din lusa. ₂₃Muhto dál munnje eai leat šat barggut dáin guovlluin, ja mus lea máŋga jagi leamaš miella galledit din ₂₄dalle go lean mannamin Espannjai. Mun sávan ahte dohko mátkkoštettiin mun beasan deaivvadit dinguin ja dii veahkehehpet mu mannat dohko, go mun vuos lean beassan muhtun áiggi galledit din.

₂₅Muhto dál mun vuolggán Jerusalemii bálvalit bassi olbmuid doppe. ₂₆Makedonia ja Akaia searvegottit leat mearridan addit oktasaš attáldaga daidda bassi olbmuide geat ellet geafivuođas Jerusalemis. ₂₇Dan sii ieža leat mearridan dahkat, ja dan sii leatge sidjiide velggolaččat. Go báhkinat leat ožžon oasi Jerusalema bassi olbmuid vuoiŋŋalaš buriin, de sii leat geatnegasat veahkehit sin áiggálaš buriid dáfus. ₂₈Go mun dasto lean ollašuhttán dán doaimma ja dolvon čohkkejuvvon attáldaga, de mun áiggun vuolgit Espannjai ja go vuos lean fitnan din luhtte. ₂₉Mun dieđán ahte go boađán din lusa, de mun buvttán Kristusa valljugas buressivdnádusa.

₃₀ Hearrámet Jesus Kristusa dihte ja Vuoiŋŋa ráhkisvuođa dihte mun bivddán din, vieljat, soahtat munnje veahkkin ja rohkadallat Ipmilii mu ovddas. ₃₁Rohkadallet ahte mun gáddjojuvvošin Judea eahpeoskkolaččaid gieđas, ja ahte Jerusalema bassi olbmot válddášedje bures vuostá dan veahki maid mun buvttán. ₃₂Dalle mun sáhtán boahtit din lusa iluin ja vuoiŋŋastit din luhtte, jos Ipmil dáhttu. ₃₃Ráfi Ipmil lehkos dinguin buohkaiguin! Amen.